பரம்பரை மரபணுத் திருத்தம் குறித்து உயிர்நெறி ஆலோசனைக் குழு எச்சரிக்கை

மரபணுத் திருத்தத் தொழில்நுட்பங்களில் அண்மைய முன்னேற்றங்களுடன் விஞ்ஞானிகள் இப்போது மரபணுக்களை வேகமாகவும் மிகவும் துல்லியமாகவும் குறைந்த செலவிலும் மாற்றியமைக்க முடியும்.

இது ஆபத்தான அல்லது வாழ்க்கையை மாற்றும் நோய்களைத் தடுக்க, சிகிச்சையளிக்க, எதிர்காலத் தலைமுறையினருக்கு அவை கடத்தப்படுவதைத் தடுக்க அல்லது மலட்டுத்தன்மையைப் போக்க உதவுகிறது.

எதிர்காலத்தில், பெற்றோர் தங்களின் பிறக்காத குழந்தையின் மரபணுப் பண்புகளையும் மேம்படுத்த முடியும்.

இருப்பினும், சிங்கப்பூரின் உயிர்நெறி ஆலோசனைக் குழு (பிஏசி) புதிதாக வெளியிட்ட அறிக்கையில், சிங்கப்பூரில் மருத்துவ ஆராய்ச்சி அல்லது பயன்பாட்டிற்கு பரம்பரை மரபணுத் திருத்தம் பரிந்துரைக்கப்படவில்லை என்று முடிவுசெய்துள்ளது.

அறியப்படாத நீண்டகால விளைவுகள், தொழில்நுட்பத்தின் பாதுகாப்பு மற்றும் செயல்திறனை முழுமையாகச் சரிபார்க்க வேண்டியதன் அவசியம் ஆகியவை அதற்கான காரணங்கள். எடுத்துக்காட்டாக, மரபணு மாற்றங்களின்போது அறிமுகப்படுத்தப்படும் எதிர்பாராத திருத்தங்கள் எதிர்காலத் தலைமுறையினரிடத்தில் தாக்கத்தை ஏற்படுத்தலாம் என்று அறிக்கை கூறியது.

அதன் பாதுகாப்புக்கான போதுமான ஆதாரங்கள் தற்போது இல்லை என்ற காரணத்துக்காகப் பரம்பரை மரபணுத் திருத்தத்தைச் சுகாதார அமைச்சு அங்கீகரிக்கவில்லை.

மனித அணு மரபணுத் திருத்தத்திலிருந்து எழும் நெறிமுறை, சட்ட மற்றும் சமூக சிக்கல்கள் என்ற தலைப்பில் உயிர் மருத்துவ ஆராய்ச்சி மற்றும் மருத்துவப் பயன்பாடுகளில் மனித அணு மரபணுத் திருத்தம், தொழில்நுட்பங்களின் நெறிமுறைப் பயன்பாடு குறித்த ஆலோசனை வெளியீட்டில் பிஏசியின் பரிந்துரைகள் இடம்பெற்றுள்ளன.

இது அக்டோபர் 23, 24ஆம் தேதிகளில் சிங்கப்பூர் தேசியப் பல்கலைக்கழகத்தில் உயிர்நெறி ஆலோசனைக் குழு மற்றும் உயிர்மருத்துவ நெறிமுறைகளுக்கான மையம் ஆகியவை இணைந்து ஏற்பாடு செய்த முதலாவது ஆசிய உயிர்நெறிமுறைகள் கட்டமைப்பு மாநாட்டின்போது தொடங்கப்பட்டது.

மனித உயிர்மருத்துவ அறிவியல் மற்றும் ஆராய்ச்சியிலிருந்து எழும் நெறிமுறை, சட்ட மற்றும் சமூகப் பிரச்சினைகள் குறித்த கொள்கைப் பரிந்துரைகளை ஆராய்ந்து உருவாக்குவதற்காக, சிங்கப்பூர் அமைச்சரவையால் 2000ஆம் ஆண்டு உயிர்நெறி ஆலோசனைக் குழு ஒரு தன்னிச்சையான தேசிய ஆலோசனை அமைப்பாக நிறுவப்பட்டது.

மாநாட்டின் தொடக்க விழாவில், சிங்கப்பூரின் சுகாதாரத் துறையின் தலைமை இயக்குநர் பேராசிரியர் கென்னத் மாக், உயிர்தொழில்நுட்பம் மற்றும் உயிர்மருத்துவ அறிவியலில் ஏற்பட்டுள்ள விரைவான முன்னேற்றங்களை எடுத்துரைத்தார்.

செயற்கை நுண்ணறிவு, துல்லிய மருத்துவம், மரபணுத் திருத்தம் மற்றும் மனிதனின் நீண்ட ஆயுளை மேம்படுத்தும் புதுமைகள் போன்ற முன்னேற்றங்கள், ஒரு காலத்தில் கற்பனை செய்ய முடியாத ஒன்றை, பரம்பரை நோய்களுக்கான சிகிச்சைகள் மற்றும் நீட்டிக்கப்பட்ட நலமான ஆயுட்காலம் போன்றவை எவ்வாறு நெருங்கி வந்துள்ளன என்பதை அவர் எடுத்துரைத்தார்.