மாணவர் முரசு
இ-பேப்பர்
சிங்கப்பூரின் உற்பத்தி மற்றும் சேவைத் துறைகளின் வர்த்தகப் போக்குகள் அடுத்த ஆறு மாதங்களுக்கு தொடர்ந்து மேம்படும் நிலையில் உள்ளன. இருப்பினும், உலகப் பொருளியலின் நிச்சயமற்ற நிலை தொடருவதால் அந்தத் துறைகளில் இடம்பெற்றுள்ள நிறுவனங்கள் மிகவும் எச்சரிக்கையுடன் செயல்படுகின்றன.
அரசாங்கம் நடத்திய ஆய்வில் இது தெரியவந்துள்ளது.
நான்காம் காலாண்டிற்கான அந்த ஆய்வு, சேவைத் துறைகளைச் சேர்ந்த 1,500 நிறுவனங்களிடமும் உற்பத்தித் துறைகளில் உள்ள 406 நிறுவனங்களிடமும் மேற்கொள்ளப்பட்டது.
வர்த்தக எதிர்பார்ப்புகள் என்ற தலைப்பில் நடத்தப்பட்ட ஆய்வின் முடிவுகள் வெள்ளிக்கிழமை (அக்டோபர் 31) வெளியிடப்பட்டன.
உற்பத்தித் துறையின் 23 விழுக்காட்டு நிறுவனங்கள் இவ்வாண்டின் அக்டோபர் முதல் அடுத்த ஆண்டின் மார்ச் வரையிலான ஆறு மாத காலத்தில் வர்த்தக நிலவரம் மேம்படும் என்று நம்பிக்கை தெரிவித்துள்ளதை ஆய்வு கண்டறிந்தது.
இதற்கு முன்னர், ஜூலை 31ஆம் தேதி வெளியிடப்பட்ட மூன்றாம் காலாண்டு வர்த்தக நிலவர அறிக்கையில், 10 விழுக்காட்டு நிறுவனங்களே நம்பிக்கையை வெளிப்படுத்தி இருந்தன.
அதேபோல, தங்களது உற்பத்தி உயரும் என எதிர்பார்த்த உற்பத்தி நிறுவனங்களின் விகிதமும் 2 விழுக்காட்டில் இருந்து 7 விழுக்காட்டுக்கு அதிகரித்துள்ளது.
ஏற்றுமதிக்கான ‘ஆர்டர்’களைப் பெறுவதில் இரு பெரும் சவால்களை எதிர்நோக்குவதாக கூறியுள்ளன.
தொடர்புடைய செய்திகள்
வெளிநாடுகளில் பொருள்களின் விலையில் ஏற்பட்டிருக்கும் போட்டி, தற்போதைய புவிசார் அரசியல் பதற்றம் மற்றும் வரிகள் ஆகியன அந்த இரு சவால்கள் என்று ஆய்வில் அவை குறிப்பிட்டுள்ளன.
சவால்களுக்கு இடையே உற்பத்தித் துறையின் மின்னணுப் பிரிவு நிறுவனங்களே அதிக நம்பிக்கையை வெளிப்படுத்தி உள்ளன. கடந்த காலாண்டைக் காட்டிலும் உற்பத்தி அதிகரிக்கும் என்று அவை எதிர்பார்க்கின்றன.
குறிப்பாக, பகுதி மின்கடத்திப் பிரிவு அதிக நம்பிக்கையுடன் உள்ளது. செயற்கை நுண்ணறிவு தொடர்பான சந்தைகளில் நீடிக்கும் தேவைகளைப் பூர்த்தி செய்யும் வகையில் தனது உற்பத்தி இன்னும் அதிகமாகக்கூடும் என்பது அந்தப் பிரிவின் எதிர்பார்ப்பு.