பேருந்துடன் மோதல்; மோட்டார் சைக்கிளோட்டி மரணம்

எஸ்பிஎஸ் டிரான்சிட் பேருந்துடன் ஏற்பட்ட விபத்தில் மோட்டார் சைக்கிளோட்டி ஒருவர் உயிரிழந்தார்.

இச்சம்பவம் கடந்த வியாழக்கிழமை (அக்டோபர் 9) தீவு விரைவுச்சாலையில் நிகழ்ந்தது. மோட்டார் சைக்கிளோட்டி பேருந்துடன் மோதியதால் விபத்து நேர்ந்தது.

சாங்கியை நோக்கிச் செல்லும் தீவு விரைவுச்சாலையில் பிடோக் ரெசர்வோயர் நுழைவாயிலுக்கு முன்பு நடந்த விபத்து குறித்து வியாழக்கிழமை மாலை ஐந்து மணியளவில் தகவல் வந்ததாக காவல்துறையும் சிங்கப்பூர் குடிமைத் தற்காப்புப் படையும் தெரிவித்தன. விபத்தில் சிக்கிய பெண் மோட்டார் சைக்கிளோட்டி சாங்கி மருத்துவமனைக்குக் கொண்டு செல்லப்பட்டபோது சுயநினைவுடன் இருந்தார். பிறகு மருத்துவமனையில் அவர் உயிரிழந்தார்.

விபத்து நிகழ்ந்தபோது சம்பந்தப்பட்ட எஸ்பிஎஸ் டிரான்சிட் பேருந்து சேவையில் இல்லை. சாலையின் மூன்றாவது தடத்தில் இருந்த அப்பேருந்தில் இருக்கும் சிசிடிவி கேமராவில் பதிவான காணொளியில் மோட்டார் சைக்கிளோட்டி விழுந்தது பதிவானது. அந்த மோட்டார் சைக்கிள் வலது புறம் இரு வாகனங்களுக்கு நடுவே இருந்தது.

விழுந்த வேகத்தில் மோட்டார் சைக்கிளோட்டி சாலையின் மூன்றாவது தடத்துக்கு வீசியெறியப்பட்டார். அப்போது பேருந்து ஓட்டுநர் அவர் மீது மோதுவதைத் தவிர்க்க முயன்றதாகவும் ஆனால் அவரால் அவ்வாறு செய்ய முடியவில்லை என்றும் எஸ்பிஎஸ் டிரான்சிட் பேச்சாளர் சொன்னார்.

காவல்துறை விசாரணை தொடர்கிறது.