மாணவர் முரசு
இ-பேப்பர்
அக்கி அம்மை குறித்த ஒரு முன்னோடி விழிப்புணர்வு முயற்சி, ‘அக்கி அம்மையிலிருந்து காத்துக்கொள்வோம்’ என்ற பெயரில் செவ்வாய்க்கிழமை (அக்டோபர் 28) தொடங்கப்பட்டது.
ஐந்து சமூகச் சேவை அமைப்புகளின் கூட்டமைப்பால் இந்த இயக்கம் தொடங்கப்பட்டுள்ளது. முதியோரும் அவர்களின் பராமரிப்பாளர்களும் அக்கி அம்மைத் தடுப்பு குறித்து மருத்துவர்களுடன் கலந்துரையாட ஊக்குவிப்பதே இதன் நோக்கம்.
சிங்கப்பூர் நீரிழிவுச் சங்கம், லயன் பிஃப்ரெண்டர்ஸ், பிரஸ்பிட்டேரியன் சமூகச் சேவைகள், சாஸ்கோ, டச் சமூகச் சேவைகள் ஆகியவற்றால் வழிநடத்தப்படும் இந்த இயக்கத்துக்கு ஜிஎஸ்கே ஆதரவளித்துள்ளது. நூற்றுக்கும் மேற்பட்ட முதியோருக்காக பழைய நினைவுகளைப் போற்றும் நிகழ்வும் இடம்பெற்றது.
இந்த இயக்கம், அக்கி அம்மையின் ஆபத்துக்கும் குறைந்த செயல்பாட்டுக்கும் இடையே உள்ள இடைவெளியைக் குறைப்பதை நோக்கமாகக் கொண்டுள்ளது.
சிங்கப்பூரில் ஆண்டுதோறும் ஏறக்குறைய 30,000 பேர் அக்கி அம்மையால் பாதிக்கப்படுகின்றனர். ஆனால், நான்கில் ஒருவர் மட்டுமே மருத்துவருடன் இந்நோயைப் பற்றி ஆலோசித்ததாக அல்லது பேசத் திட்டமிட்டதாக அண்மைய ஆய்வு ஒன்று தெரிவிக்கிறது.
தொலைக்காட்சி நடிகை சிந்தியா கோ, தம் தாயாருக்கு கடுமையான அக்கி அம்மை ஏற்பட்டபோது அவரைப் பராமரித்த கடினமான தருணங்களை நினைவுகூர்ந்தார்.
“உங்கள் உடலை நீங்கள் கவனித்து, உடல்நலம் சரியாக இல்லை என்று நினைத்தால், உடனடியாக மருத்துவமனைக்குச் செல்லுங்கள், அல்லது உங்கள் மருத்துவரை அழையுங்கள்,” என்று அவர் வலியுறுத்தினார்.
ஏற்கெனவே மருத்துவப் பிரச்சினை உள்ளவர்களுக்கு அக்கி அம்மை ஆபத்தை அதிகரிப்பதாகப் பொதுநல மருத்துவர் ஹபீப் ஷகீலா பானு, 40, கூறினார்.
தொடர்புடைய செய்திகள்
மேலும், இதுகுறித்த விழிப்புணர்வு நடைமுறையில் குறைவாக இருப்பதாகச் சொன்ன அவர், நான்கில் ஒருவர் மட்டுமே இதுபற்றித் தெரிந்துகொள்ள முன்வருவதாகக் கூறினார். முதியோர், குறிப்பாக நீரிழிவு போன்ற மருத்துவ நிலைகளைக் கொண்டவர்கள், பாதுகாப்பு தேட வேண்டிய அவசரத் தேவையை இது கோடிட்டுக் காட்டுகிறது.
உடலின் நோய் எதிர்ப்புச் சக்தி குறைவாக இருக்கும்போது சின்னம்மை வைரஸ் மீண்டும் செயல்படுவதால் அக்கி அம்மை ஏற்படுகிறது. கடுமையான வலி, ஒரு பக்கத்தில் தடிப்புகள், காய்ச்சல் போன்ற அறிகுறிகள் ஏற்படும்.
மூன்றில் ஒருவருக்கு அக்கி அம்மை ஏற்பட சாத்தியமுள்ளது. மேலும் கடுமையான, நீண்டகால நரம்பு வலி போன்ற பிரச்சினைகள் சாதாரணமாகக் காணப்படுகின்றன.
72 மணி நேரத்திற்குள் சிகிச்சை தொடங்கப்பட வேண்டும். 50 வயதுக்கு மேற்பட்டவர்கள், நாட்பட்ட உடல்நலப் பிரச்சினைகள் உள்ளவர்கள் நோயின் தீவிரத்தைக் குறைக்க தடுப்பூசி போட்டுக்கொள்ள பரிந்துரைக்கப்படுகிறது.