மாணவர் முரசு
இ-பேப்பர்
பட்டம் பெற்றவுடன் அதிகமானோர் வேலைச் சந்தைக்குள் நுழைவதால் இவ்வாண்டின் (2025) புதிய பட்டதாரிகள் வேலை தேடுவதில் கடும் போட்டியை உணர்வதாக மனிதவள அமைச்சர் டான் சீ லெங் கூறியிருக்கிறார்.
கடந்த ஆண்டு (2024) ஜூன் மாதத்துடன் ஒப்பிடுகையில் இவ்வாண்டு ஜூன் மாதம் கிட்டத்தட் 2,400 புதிய பட்டதாரிகள் ஊழியரணியில் இணைந்ததாக அமைச்சர் கூறினார். பொதுவாக அவர்கள் மேற்படிப்புக்குப் போவார்கள் அல்லது அடுத்த கட்டத்திற்குப் போகச் சிறிது காலம் எடுத்துக்கொள்வார்கள்.
சென்ற ஆண்டுடன் ஒப்புநோக்க, இவ்வாண்டு பட்டம் பெற்றோரின் எண்ணிக்கையும் ஏறக்குறைய 700 கூடியது. வேலையின்றி இருக்கும் புதிய பட்டதாரிகளின் எண்ணிக்கை அதிகரிக்க அது காரணமாக அமைந்தது.
அதிகரித்துவரும் வர்த்தகப் பதற்றத்தால் மெதுவடையும் பொருளியல் வளர்ச்சி, புதிய வரிகள், புவிசார் அரசியல் பூசல்கள், ஆரம்பக்கட்ட வேலைகளைச் செயற்கை நுண்ணறிவுத் தொழில்நுட்பம் எடுத்துக்கொண்டுவிடுமோ என்ற அக்கறைகள் முதலிய வெளிப்புறக் காரணங்களாலும் வேலை தேடுவோரிடையே கவலை கூடியதாக டாக்டர் டான் சொன்னார்.
புதிய பட்டதாரிகளுக்கான வேலைவாய்ப்பு விகிதம் சென்ற ஆண்டுடன் ஒப்பிடுகையில் இவ்வாண்டு உயர்ந்திருப்பதைப் புள்ளிவிவரங்கள் காட்டுவதாக அவர் கூறினார்.
ஜூன் நிலவரப்படி, இவ்வாண்டு பட்டம் பெற்றோரில் கிட்டத்தட்ட 9,300 அல்லது 52 விழுக்காட்டுப் பட்டதாரிகளுக்கு வேலை கிடைத்துவிட்டது.
சென்ற ஆண்டின் அதே காலக்கட்டத்துடன் ஒப்புநோக்க அது 700 அதிகம். 2024ஆம் ஆண்டு பட்டம் பெற்றோரில் ஏறக்குறைய 8,600 அல்லது 48 விழுக்காட்டுப் பட்டதாரிகள் வேலையில் சேர்ந்தனர்.
தொடர்புடைய செய்திகள்
நிரந்தர வேலையில் சேர்ந்த பட்டதாரிகளின் விகிதமும் உயர்ந்துள்ளது.
சென்ற ஆண்டில் சுமார் 37 விழுக்காடாக இருந்த அது இவ்வாண்டு 44 விழுக்காட்டுக்குக் கூடியது.
“பட்டதாரிகளில் பலர் ஜூன் மாதந்தான் வேலை தேடத் தொடங்கினர். அதனால் இந்தப் புள்ளிவிவரங்கள் இன்னும் மேம்படும்,” என்றார் டாக்டர் டான்.
சென்ற ஆண்டு பட்டம் பெற்றவர்களில் வேலை கிடைத்தோர் விகிதம் போன ஆண்டு ஜூனில் 48 விழுக்காடாக இருந்தது. அது இவ்வாண்டு ஜூனில் 88 விழுக்காட்டுக்கு ஏற்றங்கண்டதை அமைச்சர் டான் சுட்டினார்.
புதிய பட்டதாரிகளுக்கான வேலை நிலவரம் குறித்து 17 நாடாளுமன்ற உறுப்பினர்கள் கேள்விகளை முன்வைத்திருந்தனர். நாடாளுமன்றத்தில் அவற்றுக்குப் பதிலளிக்கையில் டாக்டர் டான் அந்த விவரங்களைப் பகிர்ந்துகொண்டார்.