மாணவர் முரசு
இ-பேப்பர்
எதிர்காலத்தில் மருந்துகளை எதிர்க்கக்கூடிய கிருமிகள் பரவுவதைக் கட்டுப்படுத்துவது தொடர்பான திட்டம் குறித்து சிங்கப்பூர் பரிசீலனை செய்து வருகிறது.
தற்போது நடப்பில் உள்ள செயல் திட்டத்தை மேம்படுத்த நடவடிக்கை மேற்கொள்ளப்படுகிறது.
தேசிய உத்திபூர்வச் செயல் திட்டம் 2017ஆம் ஆண்டில் அறிமுகப்படுத்தப்பட்டது.
மருந்து எதிர்ப்பு கிருமித்தொற்றுகளைக் குறைக்கும் இலக்குடன் இத்திட்டம் தொடங்கிவைக்கப்பட்டது.
கல்வி, கண்காணிப்பு, ஆய்வு, தொற்றுத் தடுப்பு, கட்டுப்பாடு போன்றவை மூலம் இந்த இலக்கை எட்ட திட்டமிடப்பட்டுள்ளது.
தற்போது சிங்கப்பூரில் மருந்துகளை எதிர்க்கும் கிருமித்தொற்றின் விகிதம் உலகளாவிய நிலையைவிட குறைவு என்று உலகச் சுகாதார நிறுவனம் சமர்ப்பித்த தரவுகள் மூலம் தெரியவந்துள்ளது.
2023ஆம் ஆண்டில், உலகளாவிய நிலையில், ஆறில் ஒரு ஆய்வுக்கூடத்தில் மருந்துகளை எதிர்க்கும் ஆற்றல் கொண்ட கிருமிகள் கண்டுபிடிக்கப்பட்டதாக ஐநாவின் சுகாதாரப் பிரிவு எச்சரிக்கை விடுத்தது.
மருந்துகளை எதிர்க்கக்கூடிய கிருமி விகிதம் சிங்கப்பூரில் குறைவாக இருப்பினும், 2019ஆம் ஆண்டிலிருந்து அது சீராக இருக்கும்போதிலும் அது தொடர்ந்து மிரட்டலாக இருப்பதாக தொற்றுநோய் தடுப்பு அமைப்பைச் சேர்ந்த இணைப் பேராசிரியர் டியோ யீ லியோங் ஸ்ட்ரெய்ட்ஸ் டைம்ஸ் நாளிதழிடம் தெரிவித்தார்.
தொடர்புடைய செய்திகள்
மருந்துகளை எதிர்க்கும் ஆற்றல் கொண்ட கிருமிகளுக்கு எதிரான போரைத் தொடர வேண்டும் என்று அவர் வலியுறுத்தினார்.
இத்தகைய கிருமிகளின் விகிதத்தைக் குறைக்க தொற்றுநோய் தடுப்பு அமைப்பு, மருத்துவமனைகளுடன் இணைந்து செயல்படுகிறது.
அவை குறித்த சமூக விழிப்புணர்வை அதிகரிக்க மருத்துவர்கள், மருந்தியல் நிபுணர்கள் ஆகியோருடன் அது அணுக்கமாகச் செயல்பட்டு வருகிறது.
மருந்துகளை எதிர்க்கும் கிருமிகளால் நோயாளிகள் பாதிக்கப்பட்டிருக்கிறார்களா என்பதைக் கண்டறிய தேசிய தொற்றுநோய் தடுப்பு நிலையமும் டான் டோக் செங் மருத்துவமனையும் பரிசோதனை நடத்துகின்றன. குறிப்பாக, தொடர்ந்து பலமுறை மருத்துவமனையில் அனுமதிக்கப்படும் நோயாளிகளுக்கு இது பொருந்தும்.
மருந்துகளை எதிர்க்கக்கூடிய கிருமிகளால் நோயாளிகள் பாதிப்படைந்திருப்பது தெரியவந்தால் முன்னெச்சரிக்கை நடவடிக்கைகளை அவ்விரு நிலையங்களும் எடுக்கின்றன.
உதாரணத்துக்கு, பாதிப்படைந்த நோயாளிகள் தனி அறைகளில் வைக்கப்படுகின்றனர்.