மாணவர் முரசு
இ-பேப்பர்
சிங்கப்பூரிலுள்ள குடும்பங்கள் பிள்ளைகளின் துணைப்பாட வகுப்புகளுக்கு 2023ஆம் ஆண்டில் $1.8 பில்லியனைச் செலவிட்டதாகத் தெரியவந்துள்ளது.
கல்விச் சேவைகளுக்கான செலவுகள் தொடர்ந்து அதிகரிக்கும் நிலையில், குடும்பச் செலவுகள் குறித்த அரசாங்கத்தின் அண்மைய ஆய்வில் இது தெரியவந்தது.
2023ஆம் ஆண்டு கல்விச் சேவைகளுக்கான செலவுகள் அதிகரித்ததற்கு, துணைப்பாட வகுப்புகளுக்கும் பாலர் பள்ளிக் கல்விக்கும் குடும்பங்கள் செலவழித்ததே காரணம் என்று ஆய்வு கூறுகிறது.
துணைப்பாட நிலையங்களிலோ மாணவர்களின் வீட்டிலோ நடத்தப்படும் துணைப்பாட வகுப்புகளுக்கான செலவு கடந்த பல ஆண்டுகளில் ஏறுமுகமாகவே உள்ளது. 2013ல் $1.1 பில்லியனாகப் பதிவான அந்தத் தொகை 2018ஆம் ஆண்டில் $1.4 பில்லியனாக அதிகரித்தது.
சிங்கப்பூர் புள்ளிவிவரத் துறை டிசம்பர் 2024ல் அண்மைய புள்ளிவிவரங்களை வெளியிட்டது.
2022ஆம் ஆண்டு டிசம்பருக்கும் 2023ஆம் ஆண்டு டிசம்பருக்கும் இடையில் ஏறத்தாழ 13,100 குடும்பங்களிடம் ஆய்வு நடத்தப்பட்டது.
சிங்கப்பூர்க் குடும்பங்களின் செலவு, சேமிப்பு, வருவாய் தொடர்பான தகவல்களைச் சேகரிக்கும் இத்தகைய ஆய்வு ஐந்து ஆண்டுகளுக்கு ஒருமுறை நடத்தப்படுகிறது. இதற்கு முன்னர் 2017ஆம் ஆண்டுக்கும் 2018ஆம் ஆண்டுக்கும் இடையிலான புள்ளிவிவரங்கள் சேகரிக்கப்பட்டன.
அண்மைய கருத்தாய்வில் கலந்துகொண்ட குடும்பங்கள் சராசரியாக ஒரு மாதத்திற்கு $104.80ஐத் துணைப்பாட வகுப்புக்குச் செலவிட்டதாகக் கூறின. 2018ல் இந்தத் தொகை $88.40ஆகவும் 2013ல் $79.90ஆகவும் பதிவானது.
தொடர்புடைய செய்திகள்
குடும்பத்தினரின் வருவாயைப் பொறுத்து, துணைப்பாட வகுப்புக்குச் செலவிடப்பட்ட தொகை $162.60 முதல் $36.30 வரை இருந்தது.
கல்விக்குக் குடும்பங்கள் செலவிட்ட மாதாந்தர தொகை 2023ஆம் ஆண்டில் $404.20 எனக் கூறப்பட்டது. முந்தைய கருத்தாய்வில் அது $340ஆக இருந்தது. இது பாலர் பள்ளி முதல் பல்கலைக்கழகம் வரையிலான பள்ளிக் கட்டணம் ஆகும். உள்ளூர், வெளிநாட்டுப் பல்கலைக்கழகங்களுக்கு இது பொருந்தும்.
துணைப்பாட வகுப்பு, இதர வகுப்புகள், பள்ளிப் பாடப் புத்தகம் போன்றவற்றுக்கான செலவுகளும் கருத்தில் கொள்ளப்பட்டன.
2023ஆம் ஆண்டில் சிங்கப்பூர்வாசிகளைக் கொண்ட 1.42 மில்லியன் குடும்பங்கள் இருப்பதாக மதிப்பிடப்பட்டது.
பிள்ளைகளின் கல்விச் சுமையைக் குறைக்கும் முயற்சியாகக் கல்வி அமைச்சு அண்மையில் சீர்திருத்தங்களை நடைமுறைப்படுத்தியபோதும் துணைப்பாட வகுப்புகளை நாடும் போக்கு குறைவதாகத் தெரியவில்லை என்கின்றனர் கல்வித்துறை வல்லுநர்கள்.
ஆண்டிடைத் தேர்வுகள் அகற்றப்பட்டது, தொடக்கப்பள்ளி இறுதியாண்டுத் தேர்வு மதிப்பெண் முறையில் மாற்றம், முழுமையான பாட அடிப்படையிலான வகைப்பாடு, மீத்திறன் கல்வித் திட்டத்தில் மாற்றம் போன்ற நடவடிக்கைகளை அவர்கள் சுட்டினர்.
கொள்கை மறுசீரமைப்புக்கு ஏற்ப துணைப்பாடத் துறையும் வளர்ச்சி அடைந்து வருவதாக அவர்கள் குறிப்பிட்டனர். எடுத்துக்காட்டாக, நேரடி மாணவர் சேர்க்கைக்குப் பிள்ளைகளைத் தயார்ப்படுத்தும் விதமாக விளையாட்டுக் கல்விக்கழகங்கள் முளைக்கத் தொடங்கியுள்ளதை அவர்கள் சுட்டினர்.