மின்னிலக்க வங்கிகளுக்கு எதிரான மோசடிகள் அதிகரிப்பு

சிங்கப்பூரில் மின்னிலக்க வங்கிகளுக்கு எதிரான மோசடிகள் அதிகரித்துள்ளன. இந்த ஆண்டின் முதல் எட்டு மாதங்களில் மட்டும் 94 மோசடி சம்பவங்கள் பதிவாகியுள்ளன.

2024ஆம் ஆண்டு மின்னிலக்க வங்கிகளுக்கு எதிராகப் பதிவான மோசடி சம்பவங்களின் எண்ணிக்கை 42 மட்டுமே என்பது குறிப்பிடத்தக்கது.

94 மோசடி சம்பவங்களில் மட்டும் கிட்டத்தட்ட 2.5 மில்லியன் வெள்ளி இழப்பு ஏற்பட்டுள்ளது என்று நிதித் தொழில்துறைக்கான சர்ச்சைகள் தீர்வு நிலையம் ஸ்ட்ரெய்ட்ஸ் டைம்சிடம் தெரிவித்தது.

பெரும்பாலான மோசடிகள், ஆள்மாறாட்டம் செய்வது அல்லது தனிநபர் தகவல்கள் திருடப்படுவது கீழ் நடக்கிறது என்று சர்ச்சைகள் தீர்வு நிலையம் குறிப்பிட்டது.

நச்சு நிரல்கள் கொண்டு தனிநபர் தகவல்கள் திருடப்படுகின்றன. அதைக்கொண்டு மோசடியாளர்கள் பாதிக்கப்படுபவரின் வங்கிக் கணக்குகளையும் மின்னிலக்கப் பணப்பைகளையும் கட்டுக்குள் கொண்டு வந்து நிதியைத் திருடுகின்றனர்.

ஆள்மாறாட்ட மோசடி என்பது குடும்ப உறுப்பினர்கள், நண்பர்கள், வங்கி அல்லது அரசு அதிகாரிகள்போல் நடித்து மோசடியாளர்கள் நிதியை வசூல் செய்கின்றனர்.

மொத்தம் ஐந்து மின்னிலக்க வங்கிகள் பாதிக்கப்பட்டுள்ளன. டிரஸ்ட் வங்கி (Trust Bank), ஜிஎக்ஸ்எஸ் வங்கி (GXS Bank), மாரி வங்கி (MariBank), அனெக்ஸ்ட் வங்கி (Anext Bank) மற்றும் கிரின் லிங்க் வங்கி (Green Link Digital Bank) ஆகியவை அவை.

டிரஸ்ட் வங்கி, ஜிஎக்ஸ்எஸ் வங்கி, மாரி வங்கி ஆகியவை சில்லறை வாடிக்கையாளர்களுக்குச் சேவை வழங்குகின்றன. அனெக்ஸ்ட் வங்கி மற்றும் கிரின் லிங்க் வங்கி சிறு, குறு, நடுத்தர நிறுவனங்களுக்குச் சேவை வழங்குகின்றன.

தொடர்புடைய செய்திகள்

ஆள்மாறாட்ட மோசடி தொடர்பில் மலேசிய ஆடவர்மீது குற்றச்சாட்டு

நிதி நிலையங்களுக்கான எதிரான ஒட்டுமொத்த மோசடிகளை ஒப்புநோக்க, மின்னிலக்க வங்கிகளுக்கு எதிரான மோசடிகள் சிறிய விழுக்காடுதான் என்றாலும் அப்போக்கு தொடர்ந்து அதிகரித்து வருகிறது.

2023ஆம் ஆண்டு தரவுகளின்படி ஒட்டுமொத்த மோசடி எண்ணிக்கையில் மின்னிலக்க வங்கிகளுக்கு எதிரான மோசடிகள் 2.1 விழுக்காடாகும். ஆனால் 2024ஆம் ஆண்டின் முதல் எட்டு மாதங்களில் மட்டும் அது 8.7 விழுக்காடாக அதிகரித்தது.

“மின்னிலக்க வங்கிகள் முழுக்க முழுக்க இணையத்தில் செயல்படுகிறது. வாடிக்கையாளர்களின் ஒவ்வொரு நடவடிக்கையும் செயலி அல்லது இணையத்தளம் மூலம் மட்டுமே செய்யமுடியும். அதனால் மோசடியாளர்கள் போலியான குறுந்தகவல்கள்மூலம் நச்சு நிரல்களை அனுப்பி எளிதாக மக்களை மோசடி செய்கிறார்கள்,” என்று தகவல் கட்டமைப்புகளுக்கான பேராசிரியர் ஜான் ஓன்டர்ஸ் குறிப்பிட்டார்.

“மின்னிலக்க வங்கிகளுக்குக் கிளைகள் இல்லை, இதனால் வாடிக்கையாளர்கள் நேரடியாக வங்கி ஊழியர்களைச் சந்திக்க முடியாது. இது சற்று சவாலான ஒன்று,” என்று அவர் கூறினார்.

இருப்பினும், மின்னிலக்க வங்கிகள் தனது வாடிக்கையாளர்களை மோசடியாளர்களிடமிருந்து பாதுகாக்க நிகழ்நேர மோசடி எச்சரிக்கைகள் மற்றும் 24 மணி நேர வாடிக்கையாளர் சேவை ஆதரவு இருக்க வேண்டும் என்று கவனிப்பாளர்கள் கருதுகின்றனர்.