கணினி ஊடுருவலில் திறன் படைத்தோருக்கு அரசாங்க வெகுமதி

தகவல்தொடர்பு நிறுவனத்தில் இணையப் பாதுகாப்புப் பிரிவில் மூத்தப் பொறியாளராகப் பணியாற்றுகிறார் நிரஞ்சன் முருகன், 24.

அரசாங்கத்தின் மின்னிலக்கத் தளங்களில் இருக்கக்கூடிய நிரல்பிழைகளை (bug) ஆராய்ந்து அவற்றைச் சரிசெய்வதற்கான ஆலோசனைகளை அவர் வழங்குகிறார்.

‘கவ்டெக் சிங்கப்பூர்’ நடத்தும் ‘அரசாங்க நிரல்பிழை வெகுமதி’ திட்டத்தில் (Government Bug Bounty Programme/ஜிபிபிபி) அவர் சென்ற ஆண்டு இணைந்தார்.

அரசாங்கத்தின் மின்னிலக்கச் சேவைகளைச் சோதித்துப் பார்க்க உலகளாவிய நிபுணர்களை வரவேற்கும் இத்திட்டம், 2018 முதல் 115 அரசாங்கக் கட்டமைப்புகளில் 586 நிரல்பிழைகளைக் கண்டறிந்துள்ளது; கிட்டத்தட்ட S$800,000 வெகுமதி வழங்கியுள்ளது.

“என் திறன்களைக் கொண்டு நாட்டுக்கும் ஏதேனும் செய்ய வேண்டும் என விரும்பினேன். அதனால், வேலை முடித்தபின் சில சமயம் இரவு முழுவதும்கூட இம்முயற்சியில் இறங்கியுள்ளேன்,” என்றார் நிரஞ்சன்.

குடிமக்களின் அடையாள அட்டை எண், தொலைபேசி எண்கள் போன்ற முக்கிய தரவுகளைக் கட்டிக்காப்பதில் இவர் உதவியுள்ளார்.

இத்திட்டத்தின்கீழ் இவ்வாண்டுக்கான ‘நுண்திற அருஞ்செயல்’ விருதை (Most Strategic Exploit Award) அவர் வென்றார்.

இவ்வாண்டுக்கான 'நுண்திற அருஞ்செயல்’ விருதை வென்ற நிரஞ்சன் முருகன், 24. 4pfsec.com எனும் தம் சொந்த இணையத்தளம்வழி சமூகத்துக்கு முக்கிய இணையப் பாதுகாப்புக் குறிப்புகளைக் கொண்டுசெல்லவும் செய்கிறார். - படம்: கவ்டெக் சிங்கப்பூர்

செவ்வாய்க்கிழமை (அக்டோபர் 21) தகவல், மின்னிலக்க மேம்பாட்டு, சுகாதார மூத்தத் துணையமைச்சர் டான் கியட் ஹாவ் அவருக்கு அவ்விருதை வழங்கினார்.

தொடர்புடைய செய்திகள்

இணையப் பாதுகாப்பு, செயற்கை நுண்ணறிவுக்கு அமைச்சுகள் முன்னுரிமை

இவ்வாண்டு அரசாங்க நிரல்பிழை வெகுமதித் திட்ட விருதுகளை வென்ற நிரஞ்சன் முருகன், கெவின் பூக், டேனியல் சுவா (இடமிருந்து). - படம்: ரவி சிங்காரம்

“சில அரசாங்கங்களே தம் கட்டமைப்புகளை இந்த வகையில் திறந்துவிடுகின்றன; அவற்றினும் சிலவே அவ்வாறு தொடர்ச்சியாகச் செய்கின்றன. பாதுகாப்புச் சோதனைகளில் பலரையும் ஈடுபடுத்துவதால் நிரல்பிழைக்அளை கண்டறிவது மட்டுமன்றி, நம் குடிமக்கள், உலகச் சமூகத்தினருடன் நம்பிக்கையையும் வளர்க்கிறோம்,” என்றார் திரு டான்.

மரினா பே சேண்ட்ஸ் கண்காட்சி, மாநாட்டு மையத்தில் நடைபெற்ற பரிசளிப்பு விழாவில் ‘சிங்கப்பூர் ஏஐ கேப்சர் த ஃபிளாக் 2025’ (SG AI Capture The Flag) போட்டிக்கான பரிசுகளையும் அவர் வழங்கினார்.

அப்போட்டி, செயற்கை நுண்ணறிவு தொடர்பான பாதுகாப்பு அச்சுறுத்தல்களை முறியடிப்பதில் மாணவர்கள், தொழில்நுட்ப வல்லுநர்களின் திறன்களைச் சோதித்தது. ‘கவ்டெக் சிங்கப்பூர்’ இரண்டாம் ஆண்டாக அதற்கு ஏற்பாடுசெய்திருந்தது. இவ்வாண்டு சிங்கப்பூர் இணையப் பாதுகாப்பு அமைப்பும் ஏற்பாட்டில் இணைந்தது. கவ்டெக் சிங்கப்பூர் சொந்தமாகப் போட்டிக்கான சவால்களை உருவாக்கியது.

இவ்வாண்டிற்கான போட்டி, 462 அணிகளிலிருந்து 1,000க்கும் மேற்பட்ட போட்டியாளர்களை வரவேற்றது. 48 மணி நேர இணையச் சுற்றுக்குப் பின் 20 அணிகள் இறுதிச் சுற்றுக்குத் தகுதிபெற்றன.

செவ்வாய்க்கிழமை (அக்டோபர் 21) நடந்த இறுதிச் சுற்றில் 17 சிங்கப்பூர் அணிகள், மூன்று வெளிநாட்டு அணிகள் போட்டியிட்டன. நான்கு மணி நேரத்திற்குள் அவை பல்வேறு சவால்களை எதிர்கொண்டன.

முதல் மூன்று நிலைகளில் வந்த ஒரே இந்தியப் போட்டியாளர் சிங்கப்பூர்ப் பலதுறைத் தொழிற்கல்லூரி கணினிப் பொறியியல் மாணவர் முகமது உக்காஷ், 19. அவரது அணி பல்கலைக்கழக புகுமுக வகுப்புப் (pre-university) பிரிவில் மூன்றாம் நிலையில் வந்து, S$1,000 வென்றது.

மூன்றாம் நிலையைப் பிடித்த சிங்கப்பூர்ப் பலதுறைத் தொழிற்கல்லூரி அணிக்குப் பரிசை வழங்குகிறார் தகவல், மின்னிலக்க மேம்பாட்டு மூத்தத் துணையமைச்சர் டான் கியட் ஹாவ். - படம்: கவ்டெக் சிங்கப்பூர்

“இப்போட்டிக்கு வருமுன் சென்ற ஆண்டுப் போட்டியைக் கண்டு சற்று அச்சப்பட்டோம். இறுதிச் சுற்றில் எங்களால் கிட்டத்தட்ட நான்கு, ஐந்து சவால்களையே முடிக்க முடிந்தது. ‘ஏஐ’ உதவியோடு கிட்டத்தட்ட 1,000 அங்கங்கள் கொண்ட ஜிக்சா புதிருக்கு விடைகண்டோம். அது சற்று எளிதாக இருந்தது,” என்றார் உக்கா‌ஷ்.

சேட்போட் அங்கம் தமக்குப் பெருஞ்சவாலை அளித்ததாகக் கூறினார் அணித் தலைவர் டேனியல், 19. “பலதுறைத் தொழிற்கல்லூரியின் முதலாமாண்டு இணைப்பாட நடவடிக்கை விழாவில் நாங்கள் நண்பர்களாகினோம். அதன்மூலம்தான் இக்குழு அமைந்தது,” என்றார் அவர்.

பொதுப் பிரிவிலும் முதல் பரிசையும் மூன்றாம் பரிசையும் சிங்கப்பூர் அணிகள் வென்றன. இரண்டாம் பரிசை இந்தோனீசிய அணி வென்றது.

போட்டியில் மும்முரமாக ஈடுபட்ட சிங்கப்பூர்ப் பலதுறைத் தொழிற்கல்லூரிக் குழுவினர். - படம்: ரவி சிங்காரம்