பலதுறைத் தொழிற்கல்லூரிப் பட்டதாரிகளுக்குக் குறைந்த வேலைவாய்ப்புகள்

பலதுறைத் தொழிற்கல்லூரி பட்டதாரிகளின் வேலை நியமனம் முந்தைய ஆண்டைக் காட்டிலும் 2024ஆம் ஆண்டு பின்தங்கியுள்ளது.

இதற்கு, 2024ஆம் ஆண்டு குறைந்த அளவிலான ஆட்சேர்ப்பு, குறைவான காலிப் பணி இடங்கள் ஆகியன காரணமாக இருக்கலாம் என்று கல்வி அமைச்சர் சான் சுன் சிங் விளக்கமளித்துள்ளார்.

இந்தக் குறைவான வேலைவாய்ப்புகள் பலதுறைத் தொழிற்கல்லூரிகளில் உள்ள பல வகையான பாடத் திட்டங்களைப் பொறுத்து ஏற்ற இறக்கமான சூழல் நிலவுவதாக அவர் கூறினார்.

இதற்கு உதாரணமாக, சுகாதார அறிவியல், மானுடவியல், சமுதாய அறிவியல் போன்ற பாடங்களில் பட்டதாரிகளாக இருப்போருக்கான தேவை அதிகமாக உள்ளது என்று அவர் கூறினார். மாறாக, பொறியியல், தகவல், மின்னிலக்க தொழில்நுட்பத் துறையில் தேர்ச்சி பெற்றோருக்கு இடையே வேலையின்மை விகிதம் அதிகமாக உள்ளதை அமைச்சர் சுட்டினார்.

“இது தொழில்நுட்பத் துறை போன்ற பொருளியலில் சில துறைகளில் ஏற்படும் ஏற்ற இறக்க சுழற்சியின் பாதிப்பாக இருக்கலாம். அது ஆட்சேர்ப்பில் தாக்கத்தை ஏற்படுத்தியுள்ளது,” என்று அமைச்சர் தமது நாடாளுமன்ற உரையில் செவ்வாய்க்கிழமை (பிப்ரவரி 4ஆம் தேதி) தெளிவுபடுத்தினார்.

புக்கிட் பாஞ்சாங் உறுப்பினர் திரு லியாங் எங் ஹுவா, பாட்டாளிக் கட்சி தலைவர் பிரித்தம் சிங் ஆகியோர் பலதுறைத் தொழிற்கல்லூரி பட்டதாரிகளிடையே வேலையின்மை விகிதம் அதிகரித்து வருவது பற்றி கேட்ட கேள்விகளுக்கு அமைச்சர் பதிலளித்தபோது மேற்கண்டவாறு தெரிவித்தார்.

மேலும், சில பட்டதாரிகள் முழு நேர வேலைவாய்ப்பை, வேலை-வாழ்க்கை சமநிலை, ஊதியம் போன்ற பல்வேறு காரணங்களால் நிராகரித்ததையும் அமைச்சர் சுட்டினார்.