மாணவர் முரசு
இ-பேப்பர்
பணிப்பெண்ணைப் பாலியல் வன்கொடுமைக்கு ஆளாக்கிய 68 வயது ஆடவருக்கு ஜனவரி 24ஆம் தேதி, பத்தொன்பதரை ஆண்டுச் சிறைத்தண்டனை விதிக்கப்பட்டுள்ளது.
அந்த ஆடவர் 2020ஆம் ஆண்டு, குடும்பத்தினர் வெளிநாடு சென்றிருந்தபோது அவ்வாறு குற்றச்செயலில் ஈடுபட்டார்.
கண்காணிப்பு கேமராவில் அவரது நடவடிக்கைகளில் சில பதிவாகியிருந்தன.
அப்போது 35 வயதாகியிருந்த அந்தப் பணிப்பெண்ணுக்கு ‘ஒயின்’ பானத்தோடு துணை உணவுப் பொருள் கொண்ட ஊசியை ஆடவர் செலுத்தினார். அப்பெண்ணின் அடையாளத்தைக் காக்கும் பொருட்டு ஆடவரின் பெயரை வெளியிட அனுமதி இல்லை.
முன்னதாக, தன் மீது சுமத்தப்பட்ட ஐந்து குற்றச்சாட்டுகளையும் உயர் நீதிமன்ற விசாரணையின்போது அவர் மறுத்தார். ஆனால் நான்கு குற்றச்சாட்டுகளில் அவர் குற்றவாளி என்று தீர்ப்பளிக்கப்பட்டது.
இந்த வழக்கில் அந்த ஆடவரைப் பிரதிநிதித்து வழக்கறிஞர் யாரும் வாதாடவில்லை.
தீர்ப்புக்குப் பிறகு மேல்முறையீடு செய்ய ஒரு வழக்கறிஞரை நாட விரும்புவதாக அவர் கூறியதை அடுத்து அவருக்கு வழங்கப்பட்ட $80,000 பிணை நீட்டிக்கப்பட்டுள்ளது.
ஆடவர் சில வழக்குகள் பற்றித் தனது விண்ணப்பங்களில் குறிப்பிட்டிருந்தார். அதுகுறித்துக் கேட்ட நீதிபதியிடம் ‘சேட்ஜிபிடி’ மூலம் அந்த விவரங்களைத் தான் தேடிப் பெற்றதாக ஆடவர் கூறினார்.
தொடர்புடைய செய்திகள்
அவர் குறிப்பிட்டதுபோல் எந்த வழக்கும் இடம்பெறவில்லை என்று சொன்ன நீதிபதி, ‘சேட்ஜிபிடி’ சட்டபூர்வமான ஆய்வுக் கருவியன்று என்று ஆடவரிடம் கூறினார்.