மாணவர் முரசு
இ-பேப்பர்
போய்சி (அமெரிக்கா): சிங்கப்பூர் ஆயுதப்படையின் ‘எக்சர்சைஸ் ஃபோர்ஜிங் சேபர்’ பயிற்சி 10வது முறையாக அமெரிக்காவில் நடைபெற்றுவருகிறது.
ஈராண்டுகளுக்கு ஒருமுறை நடைபெறும் இப்பயிற்சி ஐடஹோ மாநிலத்தின் மவுன்டன் ஹோம் ஆகாயப் படைத் தளத்தில் நடைபெறுகிறது.
இவ்வாண்டின் பயிற்சியில் 800க்கும் அதிகமான வீரர்கள் பங்கேற்கின்றனர். இப்பயிற்சியில் இதுவரை இல்லாத அளவில் ஆளில்லா வானூர்திகள் பயன்படுத்தப்படுகின்றன.
ஆளில்லா வானூர்திகளைப் பொறுத்தவரை உக்ரேன்-ரஷ்யா போர், அண்மையில் ஈரானுக்கும் இஸ்ரேலுக்கும் இடையே சில நாள்கள் நீடித்த போர் ஆகியவை பாடமாக அமைந்ததென ‘எக்சர்சைஸ் ஃபோர்ஜிங் சேபர்’ இயக்குநரான பிரிகேடியர் ஜெனரல் டியோ சூ இயாவ், 48, குறிப்பிட்டார்.
மேலும், சிங்கப்பூர் குடியரசு ஆகாயப் படையில் புதிதாகத் தொடங்கப்பட்டுள்ள மின்னிலக்கப் பிரிவான ‘ரெயிட்’ (RSAF Agile innovation Digital) முதன்முறையாக ‘எக்சர்சைஸ் ஃபோர்ஜிங் சேபர்’ பயிற்சியில் ஈடுபடுவதாகவும் அவர் சொன்னார்.
“போர்க்களம் எப்போதும் அப்படியே இருக்கும் என்று நாம் என்றும் எதிர்பார்க்க முடியாது. அது மாறிக்கொண்டேதான் இருக்கும். அப்படி மாறிக்கொண்டே இருக்கும் சூழலைக் கையாள உதவும் நீக்குப்போக்கான அணுகுமுறையைப் பின்பற்ற வகைசெய்யும் ஆற்றலை நாம் வளர்த்துக்கொள்ளவேண்டும். இது, நாங்கள் குறிப்பிட்ட மென்பொருள் பொறியாளர்களுக்குப் பொருந்தும்,” என்று அவர் தமிழ் முரசின் கேள்விக்கு ‘ரெயிட்’ பிரிவைப் பற்றி விளக்கமளித்தார்.
மின்னிலக்க அம்சங்களில் சிங்கப்பூர் குடியரசு ஆகாயப் படையைப் புத்தாக்க முயற்சிகளில் ஈடுபடச் செய்வதும் மாற்றங்களுக்கு ஏற்றவாறு படையைச் செயல்படவைப்பதும் ‘ரெயிட்’ பிரிவின் பொறுப்பாகும்.
இதுபற்றிப் பேசிய அதன் ராணுவ வல்லுநர் 5 (ME5) அதிகாரியான ரிஸ்வான் ஜேக்கப், “சரியான செயல்பாட்டுத் தொடர்புகளும் சம்பந்தப்பட்ட தொழில்நுட்பத் திறன்களும் இருப்பதால்தான் எங்கள் பிரிவால் இதைச் செய்ய முடிகிறது. எங்களால் போர்ப் படையினருக்குத் தேவையான தீர்வுகளை உருவாக்கி மேம்படுத்த முடியும். எங்கள் செயல்பாடுகளைத் துரிதப்படுத்த பல தானியக்க அம்சங்கள், செயற்கை நுண்ணறிவு முறைகளையும் நாங்கள் பயன்படுத்துகிறோம்,” என்று கூறினார்.
தொடர்புடைய செய்திகள்
தற்காப்பு, அறிவியல், தொழில்நுட்ப அமைப்பின் பொறியாளர்களுடன் தாங்கள் அணுக்கமாகச் செயல்பட்டதாகவும் திரு ரிஸ்வான் தெரிவித்தார்.
இம்மாதம் ஆறாம் தேதி தொடங்கிய இவ்வாண்டின் ‘எக்சர்சைஸ் ஃபோர்ஜிங் சேபர்’ பயிற்சியின் கருப்பொருள், ‘ஒன்றுபடுதல், மாற்றங்களுக்கு ஏற்ப செயல்படுதல், துல்லியமாக இயங்குதல்’ (‘Integrated, Adaptive, Precise’) ஆகும். பயிற்சி இம்மாதம் 21ஆம் தேதி வரை நடைபெறும்.