மாணவர் முரசு
இ-பேப்பர்
தெம்பனிஸ், தானா மேரா நிலையங்களுக்கு இடையே ரயில் சேவை தற்காலிகமாக நிறுத்தப்படுவதாக சமூக ஊடகங்கள், நிலையங்கள், ரயில்களில் முன்கூட்டியே அறிவிக்கப்பட்டும் முதல் நாளான சனிக்கிழமை (டிசம்பர் 7) சில பயணிகளுக்கு இதுகுறித்து தெரியவில்லை.
சனிக்கிழமை முதல் செவ்வாய்க்கிழமை (டிசம்பர் 10) வரை ரயில் சேவை நிறுத்திவைக்கப்படுவது குறித்து கிழக்கு-மேற்கு பாதையில் செல்லும் பெரும்பாலான பயணிகள் குழப்பமடையவில்லை.
கிழக்கு-மேற்கு பாதையுடன் அப்பர் சாங்கி ரோடு ஈஸ்ட்டில் உள்ள ஈஸ்ட் கோஸ்ட் ஒருங்கிணைந்த பணிமனையைப் பாதுகாப்பாக இணைக்க, ரயில் சேவை தற்காலிகமாக நிறுத்திவைக்கப்படுவது அவசியம்.
வழக்கமான ரயில் சேவைக்குப் பதிலாக தெம்பனிஸ், பாசிர் ரிஸ் நிலையங்களுக்கு இடையே ஐந்து நிமிடங்களுக்கு ஒருமுறை இணைப்பு ரயில்கள் இயக்கப்படுகின்றன. தானா மேரா, எக்ஸ்போ நிலையங்களுக்கு இடையே எட்டு நிமிடங்களுக்கு ஒருமுறையும் எக்ஸ்போ, சாங்கி விமான நிலையங்களுக்கு இடையே 11 நிமிடங்களுக்கு ஒருமுறையும் இணைப்பு ரயில்கள் இயக்கப்படுகின்றன.
ரயில் சேவை இல்லாத பகுதியில், ‘ஷட்டில் 7’ எனும் இணைப்புப் பேருந்துச் சேவை வழங்கப்படுகிறது. தெம்பனிஸ், சீமெய், தானா மேரா நிலையங்களில் நிறுத்தும் இச்சேவை, மூன்று முதல் ஐந்து நிமிடங்களுக்கு ஒருமுறை இயக்கப்படுகிறது.
தானா மேரா, சீமெய், தெம்பனிஸ் நிலையங்களுக்கு வெளியே இணைப்பு பேருந்துகளில் ஏறுவதற்கான இடங்களில், பயணிகள் முறையாக வரிசையில் நிற்க தடுப்புகளும் வெயில், மழையிலிருந்து பாதுகாக்க கூரைகளும் அமைக்கப்பட்டுள்ளன. மூத்தோருக்காகவும் தனிநபர் நடமாட்டச் சாதனங்களைப் பயன்படுத்துவோருக்காகவும் பிரத்தியேக வரிசை உள்ளது.
இணைப்புப் பேருந்துச் சேவைக்காக நாள்தோறும் 55 ஈரடுக்குப் பேருந்துகள் வரை இயக்கப்படும் என நிலப் போக்குவரத்து ஆணையம் முன்னதாகத் தெரிவித்திருந்தது.
சனிக்கிழமை தங்கள் எம்ஆர்டி பயணங்கள் சுமுகமாக இருந்ததாக பெரும்பாலான பயணிகள் கூறினர்.
தொடர்புடைய செய்திகள்
இருந்தாலும் சிலரிடையே, குறிப்பாக சிங்கப்பூர் வரும் சுற்றுப் பயணிகளிடையே குழப்பம் தென்பட்டது.
தெம்பனிஸ், தானா மேரா நிலையங்களுக்கு இடையே நான்கு நாள்களுக்கு ரயில் சேவை நிறுத்தப்படும்போது, கூட்டத்தைச் சமாளிக்கும் முயற்சிகளை மேம்படுத்த நிலப் போக்குவரத்து ஆணையத்துடன் சேர்ந்து தான் பணியாற்றியதாக எஸ்எம்ஆர்டி நிறுவனம் சொன்னது.
தினமும் சராசரியாக 100,000 பயணிகள் பாதிக்கப்படலாம் என ஆணையம் முன்னதாகக் கணித்திருந்தது. பயண நேரம் 20 முதல் 30 நிமிடங்கள் வரை நீளலாம்.
