மாணவர் முரசு
இ-பேப்பர்
தம் பள்ளியில் தோழி மயங்கி விழுந்தபோது பதைபதைத்துப் போனார் பெண்கள் சாரணர் படையைச் சேர்ந்த அமிர்தவர்ஷினி, 16.
உடனடியாக அவர் தன் ஆசிரியரை உதவிக்கு அழைத்தார். தோழிக்கு மயக்கம் தெளிந்தபின்பும் அவர் அருகிலேயே இருந்து நலம் விசாரித்தார்.
அமிர்தவர்ஷினி போன்ற இளையர்களிடம் அவசரநிலையைக் கையாண்டு உயிர்காக்கும் ஆற்றலை வளர்க்க சிங்கப்பூரின் முதல் இளையர் சமூக அவசரகாலச் செயற்குழுக்கள் (சர்ட்) ஞாயிற்றுக்கிழமை (அக்டோபர் 26) தொடங்கப்பட்டன.
நிகழ்ச்சியில், 15 வயதுக்கு மேற்பட்ட 200 உயர்நிலைப்பள்ளி சாரணியர்கள், சாரணர்கள் 1,000 முதலுதவிப் பைகளைத் தயார்செய்து சிங்கப்பூர் சாதனைப் புத்தகத்திலும் இடம்பெற்றனர். இந்தப் பைகள், அவசரகாலப் பயன்பாட்டிற்காக தீவு முழுவதுமுள்ள மக்கள் கழகத்தின் சமூக அவசரகால, ஈடுபாட்டுக் குழுக்களுக்கும் குழுத்தொகுதி அவசரகாலச் செயல்பாட்டு நிலையங்களுக்கும் வழங்கப்படும்.
இளையர் ‘சர்ட்’ திட்டத்தை மக்கள் கழகம், சிங்கப்பூர் சாரணர் படை, சிங்கப்பூர் சாரணியர் படையுடன் இணைந்து அறிமுகப்படுத்தியுள்ளது. திட்டத்தின் தொடக்க உறுப்பினர்களாக அந்த 200 மாணவர்கள் செப்டம்பர் 6ஆம் தேதிமுதல் பயிற்சிபெற்றுவருகின்றனர். தற்போது சங்காட் சாங்கி உயர்நிலைப்பள்ளியில் படிக்கும் அமிர்தவர்ஷினியும் அவர்களில் ஒருவர். அவர்கள் இத்திட்டத்தில் ஈராண்டுகாலம் பங்கேற்பர்.
“சிங்கப்பூர், நெடுங்காலமாக உலகின் பாதுகாப்பான நாடுகளில் ஒன்றாகக் கருதப்படுகிறது. ஆனால், இந்த நிலை எப்போதும் நீடிக்கும் என நம்மால் உறுதியாகக் கூற முடியாது,” என்றார் உள்துறை, வெளியுறவு மூத்த துணை அமைச்சர் சிம் ஆன்.
“அண்மைய ஆண்டுகளில், சுயமாகத் தீவிரவாதச் சிந்தனையை வளர்த்துக்கொண்ட இளையர்கள் பலரும் கைதாகியுள்ளனர். அவர்களில் சிலருக்கு 15 வயதுதான். அவர்கள் இணையவழித் தீவிரவாதச் சிந்தனைகளை வளர்த்துக்கொள்ள உந்துதல் பெற்றனர்,” எனக் கூறிய திருவாட்டி சிம் ஆன், எவரிடமாவது அத்தகைய சிந்தனைக்குரிய அறிகுறிகள் தென்பட்டால் உடனடியாக அதிகாரிகளிடம் தெரிவிக்குமாறு இளையர்களிடம் வலியுறுத்தினார்.
இளையர் ‘சர்ட்’ தொண்டூழியர்களின் பயணம், சமூக விழிப்புணர்வை வளர்த்துக்கொள்வதிலிருந்து தொடங்கும் என்றார் திருவாட்டி சிம் ஆன்.
தொடர்புடைய செய்திகள்
மக்கள் கழக சமூக அவசரகால ஈடுபாட்டுக் குழுக்கள், அடித்தள அமைப்புகளுடன் இணைந்து தீப்பாதுகாப்பு, டெங்கி தடுப்பு போன்றவற்றைப் பற்றிப் பொதுமக்களிடம் இளையர் ‘சர்ட்’ தொண்டூழியர்கள் எடுத்துச் சொல்வர். அவசரகாலத்தில் குடியிருப்பாளர்கள் எவ்வாறு ஒன்றிணைவர், எத்தகைய சவால்களைச் சந்திப்பர் என்பதை அவர்கள் நேரடியாகக் காண்பர்.
ரத்த தானம், அவசரகாலத்துக்குத் தயார்செய்யும் நடவடிக்கைகளிலும் சிங்கே, தேசிய தினக் கொண்டாட்டங்கள் போன்ற முக்கியச் சமூக நிகழ்ச்சிகளிலும் இத்தொண்டூழியர்கள் பங்கேற்பர். பண்பாட்டு விழிப்புணர்வுப் பயிலரங்குகள்மூலம் அவசரகாலத்தில் உதவக்கூடிய மொழி, பண்பாட்டு நுணுக்கங்களையும் அவர்கள் கற்றுக்கொள்வர்.
“நீங்கள் வளர வளர முதலுதவி, இதய இயக்க உயிர்ப்பிப்பு சிகிச்சை (சிபிஆர்) பயிற்சியைத் தாண்டி, கூட்டத்தைச் சமாளிப்பது எப்படி, நிதானமாக இருந்து பெரிய கூட்டங்களைப் பாதுகாப்பான முறையில் வழிநடத்துவது போன்றவற்றைக் கற்றுக்கொள்வீர்கள்,” என்றார் திருவாட்டி சிம் ஆன்.
“நீங்கள் உளவியல் முதலுதவிப் பயிற்சியும் பெறுவீர்கள். இதன்மூலம், அதிர்ச்சியிலும் பயத்திலும் இருப்பவர்களை நீங்கள் கையாளுவீர்கள்,” என்றார் திருவாட்டி சிம் ஆன்.
எஸ்ஜி60 கொண்டாட்டங்களை முன்னிட்டு, ஒரு சிறப்பு ‘எஸ்ஜி60 வோகுல்’ நிகழ்ச்சியில் அறிமுகமானது.