மாணவர் முரசு
இ-பேப்பர்
தம்முடைய பத்து வயது மகனும் 14 வயது மகளும் இணையத்தில் அதிக நேரம் செலவிடுவது திருவாட்டி ஏடலின் டானுக்கு அச்சத்தை உண்டாக்கியது.
“என் மகன் இணைய விளையாட்டுகள், யூடியூப் தளங்களிலேயே அதிகமாக நேரத்தைச் செலவிடுகிறான். அப்போது, அவற்றில் தோன்றும் விளம்பரங்கள் அவனுக்குத் தவறான விஷயங்களைக் காட்டுகின்றன. என் மகளிடம் சமூக ஊடகங்களில் அவளைப் பற்றி அளவுக்கதிகமாக வெளிப்படுத்தக்கூடாது என்றும் அடிக்கடி நினைவுறுத்துவேன்,” என்றார் திருவாட்டி ஏடலின்.
இணையப் பயன்பாடு குறித்து கட்டுப்பாடுகள் விதிப்பதால் தன் பிள்ளைகளுக்கும் தனக்கும் ஒரு இடைவெளி ஏற்பட்டுவிடுமோ என்று அவர் வருந்தினார். என்ன செய்வது எனக் குழம்பி இருந்தபோது அவருக்குக் கைகொடுத்தது 2021ல் தொடங்கப்பட்ட ‘டிஜிட்டல் ஃபார் லைஃப்’ இயக்கம்.
‘டிஜிட்டல் ஃபார் லைஃப்’ இணையத்தளத்தில் (https://www.digitalforlife.gov.sg/parent) உள்ள பெற்றோருக்கான பல வழிகாட்டிக் குறிப்புகள் அவருக்குத் துணைபுரிந்தன.
அவற்றின்மூலம், தன் பிள்ளைகளின் அனுமதியின்றி, அவர்களின் புகைப்படங்களைத் தனது சமூக ஊடகப் பக்கங்களில் பதிவேற்றிவந்த திருவாட்டி ஏடலின், அது தன் பிள்ளைகளை சங்கடப்படுத்தக்கூடும், அவர்களின் எதிர்காலத்தைப் பாதிக்கக்கூடும் என்பதை உணர்ந்தார்.
இணையத்தை நல்வழியில் பயன்படுத்துவது குறித்து தன் பிள்ளைகளை மேலும் ஊக்குவிப்பது எப்படி என்பதைத் தெரிந்துகொள்ள அவர் நவம்பர் 9, 10ஆம் தேதிகளில் விவோசிட்டியில் முதன்முறையாக ஏற்பாடு செய்யப்பட்டிருந்த ‘டிஜிட்டல் ஃபார் லைஃப்’ விழாவில் பங்கேற்றுப் பயனடைந்தார்.
நவீன மின்னிலக்கத் தொழில்நுட்பங்கள் பற்றி அனைத்து வயது சிங்கப்பூரர்களுக்கும் தெரியப்படுத்தும் ‘டிஜிட்டல் ஃபார் லைஃப்’ விழாவைத் தகவல் தொடர்பு ஊடக மேம்பாட்டு ஆணையம் (ஐஎம்டிஏ) மூன்றாவது ஆண்டாக ஏற்பாடு செய்துள்ளது. இந்நிகழ்ச்சிக்கு அனுமதி இலவசம்.
இவ்விழாவில் நூற்றுக்கும் மேற்பட்ட பங்காளிகளின் சாவடிகள்மூலம் வளர்ந்துவரும் தொழில்நுட்பங்களைச் சோதித்துப் பார்க்க அனைவருக்கும் வாய்ப்புகள் உள்ளன.
தொடர்புடைய செய்திகள்
நவம்பர் 9ஆம் தேதி விழாவிற்குச் சிறப்பு விருந்தினராக வருகையளித்தார் ‘டிஜிட்டல் ஃபார் லைஃப்’ இயக்கத்தின் புரவலரான அதிபர் தர்மன் சண்முகரத்னம்.
தகவல், மின்னிலக்க மேம்பாட்டு அமைச்சரும் உள்துறை இரண்டாம் அமைச்சருமான ஜோசஃபின் டியோவும் நிகழ்ச்சியில் கலந்துகொண்டார்.
“சென்ற மாதம் பிரதமர் லாரன்ஸ் வோங் அறிவார்ந்த தேசம் 2.0 திட்டத்தைத் தொடங்கிவைத்தார். அதனால், மின்னிலக்கத்தில் அனைவரையும் உள்ளடக்குவதில் நாம் தொடர்ந்து முயற்சி செய்வோம்.
“இவ்விழாவில், சென்ற ஆண்டுகளில் முதியோரையும் கூடுதல் உதவி தேவைப்படுவோரையும் முன்னிலைப்படுத்தினோம். இவ்வாண்டு பெற்றோரை நாம் மையப்படுத்துகிறோம். நல்ல வளங்களைக் கொண்ட குடும்பங்கள் மட்டுமன்றி, அனைத்துப் பெற்றோரையும் சென்றடைய விரும்புகிறோம்.
“சென்ற ஆண்டைவிட இவ்வாண்டு கூடுதலாக 30 விழுக்காட்டுப் பங்காளிகள் விழாவில் பங்கேற்றுள்ளனர் என்பதில் மகிழ்ச்சியடைகிறேன்,” என்றார் அமைச்சர் ஜோசஃபின் டியோ.
இவ்வாண்டு ஏற்கெனவே இரண்டு வார இறுதிகளில் வெவ்வேறு இடங்களில் இவ்விழா நடைபெற்றது. விவோசிட்டிக்குமுன், அக்டோபர் 26, 27ஆம் தேதிகளில் கியட் ஹாங் சமூக மன்றத்திலும், நவம்பர் 2,3ஆம் தேதிகளில் ‘ஹார்ட்பீட்@பிடோக்’கிலும் அந்நிகழ்ச்சி நடைபெற்றது.
அனைவரையும் உள்ளடக்கும் மின்னிலக்கச் சேவைகள், இணையப் பாதுகாப்பு வழிமுறைகள், செயற்கை நுண்ணறிவுமூலம் கற்றல் என அரசாங்கத்தின் அறிவார்ந்த தேசம் 2.0 திட்டத்தின் முயற்சிகள் பற்றியும் மக்கள் இவ்விழா மூலம்தெரிந்துகொண்டனர்.
பெற்றோரை ஆற்றல்படுத்த நோக்கம்
இவ்வாண்டு விழா மையப்படுத்தும் முக்கியக் கூறுகளில் ஒன்று, மின்னிலக்கமயமான இன்றைய காலகட்டத்தில் பிள்ளைகளை வளர்க்கவும் வழிகாட்டவும் பெற்றோரை ஆற்றல்படுத்துவதே ஆகும்.
‘யுஓபி’ வழங்கும் ‘மை டிஜிட்டல் ஸ்பேஸ்’ சாவடியில் உண்மைப் படங்களுக்கும் செயற்கை நுண்ணறிவுப் படங்களுக்கும் இடையேயான வேறுபாடுகளையும், லெகோ குழுமத்தின் விளையாட்டுகள்மூலம் இணையப் பாதுகாப்பு வழிமுறைகளையும் குடும்பங்கள் கற்றுக்கொண்டன.
