மாணவர் முரசு
இ-பேப்பர்
கடந்த ஓராண்டில் அடகுக்கடைகள் வழங்கிய கடன்கள் ஏறத்தாழ 30 விழுக்காடு ஏற்றம் கண்டுள்ளன. தங்க விலை அதிகரிப்பு, பொருளியல் நிச்சயமற்ற நிலை மோசமடைவது ஆகியவை இதற்கு முக்கிய காரணங்கள்ளாக அமைந்துள்ளன.
இவ்வாண்டு ஜூன் மாதத்தில் அடகுக்கடைகள் $884 மில்லியன் பெறுமானமுள்ள கடன்களை வழங்கின.
2024ஆம் ஆண்டு ஜூன் மாதம் வழங்கப்பட்ட $686.4 மில்லியன் பெறுமானமுள்ள கடன்களைவிட இது 29 விழுக்காடு அதிகம்.
2020ஆம் ஆண்டு ஜூன் மாதத்தில், கொவிட்-19 நெருக்கடிநிலையின்போது அடகுக்கடைகள் $467 மில்லியன் பெறுமானமுள்ள கடன்கள் வழங்கின.
இவ்வாண்டு ஜூன் மாதம் அது ஏறத்தாழ இருமடங்கு அதிகரித்துள்ளது.
சிங்கப்பூர் புள்ளிவிவரத்துறையின் இணையப்பக்கத்தில் இத்தகவல் வெளியிடப்பட்டுள்ளது.
இதற்கிடையே, கடன் வாங்குவதற்காக அடைமானம் வைக்கப்பட்ட பொருள்களின் எண்ணிக்கை 2024ஆம் ஆண்டு ஜூன் மாதத்துடன் ஒப்பிடுகையில் இவ்வாண்டு ஜூன் மாதத்தில் 8 விழுக்காடு அதிகரித்தது.
கடந்த ஜூன் மாதத்தில் 341,490 பொருள்கள் அடைமானம் வைக்கப்பட்டன.
தொடர்புடைய செய்திகள்
2020ஆம் ஆண்டு ஜூன் மாதத்தில் 323,549 பொருள்கள் அடைமானம் வைக்கப்பட்டன.
கடன் விலை அதிகரித்திருப்பதால் அடகுக்கடைகள் வழங்கும் கடன்களும் ஏற்றம் கண்டுள்ளதாக மனிமேக்ஸ் ஃபைநேன்ஷியல் சர்வீசஸ் நிறுவனத்தின் குழுமத் தலைமை மேலாளர் திரு லிம் சுன் செங் தெரிவித்தார்.
அடகுக்கடைத் துறையில் கடன் பெறுவதற்கு முக்கியமான அடைமானப் பொருளாகத் தங்கம் இருப்பதை அவர் சுட்டினார்.
செப்டம்பர் 1ஆம் தேதி நிலவரப்படி, சிங்கப்பூரில் 241 பதிவுசெய்யப்பட்ட அடகுக்கடைகள் இருப்பதாக அடகுக்கடைகள் பதிவகத்தின் இணையப்பக்கத்தில் தெரிவிக்கப்பட்டுள்ளது.