மாணவர் முரசு
இ-பேப்பர்
மூத்தோருக்கான சத்துணவு விழிப்புணர்வுத் திட்டமொன்று வகுக்கப்படவுள்ளது.
‘ஸ்டே ஸ்ட்ராங்’ அதாவது ‘வலுவாக இருங்கள்’ என்பது திட்டத்தின் பெயர். ஃபேர்பிரைஸ் அறநிறுவனமும் டான் டோக் செங் மருத்துவமனையும் இணைந்து அடுத்த ஆண்டு (2026) இறுதிக்குள் அதனை உருவாக்கும். ஆரோக்கியமான முறையில் மூப்படைவதை ஊக்குவிக்கும் முயற்சிகளின் ஒரு பகுதியாக அது அமையும். சிறந்த உணவுமுறைகளின் மூலம் அதனை எட்டுவது இலக்கு.
திட்டத்தின் தொடர்பில் ஃபேர்பிரைசும் டான் டோக் செங் மருத்துவமனையும் புதன்கிழமை (நவம்பர் 5) புரிந்துணர்வுக் குறிப்பில் கையெழுத்திட்டன. மூத்தோர் உட்கொள்ளும் சத்துணவில் சேர்த்துக்கொள்ள வேண்டியவற்றைத் திட்டம் எடுத்துச் சொல்லும்.
ஃபேர்பிரைஸ் அறநிறுவனம் மூத்தோர் உட்கொள்ளும் உணவு குறித்துப் புதிய கருத்தாய்வை மேற்கொண்டது. ஆரோக்கியமான உணவில் என்னென்ன இருக்கவேண்டும் என்பது பத்தில் ஆறு மூத்தோருக்குத் தெரிந்திருக்கவில்லை என்பது கருத்தாய்வில் தெரியவந்தது.
சிங்கப்பூரில் முதியவர்களிடையே ஊட்டச்சத்துக் குறைபாடு, அதிகரித்துவரும் பிரச்சினையாக உருவெடுத்துள்ளதாக ஸ்ட்ரெய்ட்ஸ் டைம்ஸ் அண்மையில் செய்தி வெளியிட்டிருந்தது. இது கவலையளிப்பதாக மருத்துவர்கள் கூறுகின்றனர்.
உடல்நலத்துக்கு அத்தியாவசியமான ஊட்டச்சத்துகள் பற்றி மூத்தோர் அறிந்துகொள்ள இருவழித் தொடர்பு வகுப்புகள் நடத்தப்படும் என்று எதிர்பார்க்கப்படுகிறது. ஆரோக்கியமான உணவை உட்கொள்ளும் எளிய வழிமுறைகளைத் தெரிந்துகொள்ள உதவும் விளையாட்டு நிகழ்ச்சிகளுக்கும் ஏற்பாடு செய்யப்படும் என்று நம்பப்படுகிறது.
பேரங்காடிகளிலும் ஊட்டச்சத்து குறித்த விழிப்புணர்வு நிகழ்ச்சிகள் இடம்பெறக்கூடும்.
மூத்தோர், தனியாக மூப்படைவதில் மிகவும் உறுதியுடன் இருப்பதைக் காணமுடிவதாக ஃபேர்பிரைசின் குழுமத் தலைமை நிர்வாகி விப்புல் சாவ்லா கூறினார்.
தொடர்புடைய செய்திகள்
“நாட்டின் ஆகப்பெரிய சில்லறை விற்பனைக் கடை என்ற முறையில் சிங்கப்பூரில் அதிகரித்துவரும் மூத்தோரின் தேவைகளை நாங்கள் புரிந்துகொண்டிருக்கிறோம். அவற்றை நிறைவேற்றுவதற்கு ஆதரவளிப்பதில் எங்களின் பங்கையாற்ற விரும்புகிறோம்,” என்றார் அவர்.
முதியோர்நல மருத்துவத்திலும் உணவுமுறையிலும் தங்களுக்குள்ள நிபுணத்துவத்தைக் குடியிருப்புப் பேட்டைகளுக்குக் கொண்டுசெல்லப் புதிய கூட்டு முயற்சி உதவும் என்று டான் டோக் செங் மருத்துவமனையின் தலைமை நிர்வாக அதிகாரி டாங் கோங் சூங் தெரிவித்தார்.