சிங்கப்பூர் தொழிற்சாலை உற்பத்தி செப்டம்பர் மாதத்தில் 16.1% உயர்வு

சிங்கப்பூரின் தொழிற்சாலை உற்பத்தி, ஆகஸ்ட் மாதத்தில் அடைந்த அதன் சரிவை மாற்றியமைத்து, செப்டம்பர் மாதத்தில் வியக்கத்தக்க வகையில் பெரிய மீட்சியை அடைந்தது. அதற்கு முக்கிய காரணமாக விளங்குகிறது மருந்தியல் துறை.

உற்பத்தித் துறை ஆண்டுக்கு ஆண்டு 16.1 விழுக்காடு உயர்ந்தது. இது புளூம்பர்க் கருத்தாய்வில் பங்கேற்ற ஆய்வாளர்களின் கணிப்பை விட அதிகமாகும். அவர்கள் வெறும் 0.4 விழுக்காடு மட்டுமே உயரும் என்று முன்னுரைத்திருந்தனர்.

ஆகஸ்ட் மாதத்தில் 90க்கும் மேற்பட்ட நாடுகள் மீதான அமெரிக்க வரிகள் அதிகரித்ததைத் தொடர்ந்து, திருத்தப்பட்ட ஒன்பது விழுக்காட்டுச் சரிவின் தலைகீழ் மாற்றமாகவும் இது அமைந்தது.

செப்டம்பர் மாதத்தின் வலுவான செயல்திறன் மருந்து உற்பத்தியில் ஏற்பட்ட அதிகரிப்பின் விளைவாக வந்தது. உயிர்மருத்துவ உற்பத்தியைத் தவிர்த்து, அதன் உற்பத்தி 5.4 விழுக்காடு அதிகரித்துள்ளது.

பருவத்துக்கு ஏற்ப சரிசெய்யப்பட்ட மாத அடிப்படையில் பார்க்கையில், உற்பத்தித் துறை 26.3 விழுக்காடு உயர்ந்தது.

உயிர்மருத்துவ உற்பத்தி செப்டம்பர் மாதத்தில் ஆண்டுக்கு ஆண்டு அடிப்படையில் 45.9 விழுக்காடு அதிகரித்துள்ளது.

ஒட்டுமொத்தமாக, உயிர்மருத்துவ உற்பத்தித் துறை ஜனவரி முதல் செப்டம்பர் வரை 2024ஆம் ஆண்டின் இதே காலகட்டத்துடன் ஒப்பிடும்போது 5.5 விழுக்காடு உயர்ந்துள்ளது.

தொடர்புடைய செய்திகள்

சிங்கப்பூர்ப் பொருளியல் மூன்றாம் காலாண்டில் 2.9% வளர்ச்சி

மற்றொரு முக்கிய துறையான மின்னணுவியல் துறையும் ஆண்டுக்கு ஆண்டு அடிப்படையில் 13.2 விழுக்காடு அதிக உற்பத்தியைக் கண்டது. இணையத் தொடர்பு தயாரிப்புகளின் உற்பத்தி அதிகரித்ததால் தகவல்தொடர்பு மற்றும் பயனீட்டாளர் மின்னணுவியல் துறை 80.6 விழுக்காடு உயர்வு கண்டது.

போக்குவரத்துப் பொறியியல் துறையும் 13.8 விழுக்காடு அதிக உற்பத்தியைப் பதிவு செய்துள்ளது.

கடல்துறை மற்றும் கடல்சார் பொறியியல் பிரிவு 1.1 விழுக்காடு வளர்ச்சியடைந்தது. ஆனால் நிலப் பிரிவு 20.8 விழுக்காடு சரிந்தது. செப்டம்பர் மாதத்தில் ரசாயனத் துறை உற்பத்தியில் 1.2 விழுக்காடு உயர்வைக் கண்டது.

துல்லிய பொறியியல் உற்பத்தி 5.9 விழுக்காடு சரிந்தது. இந்தக் குழுமத்துக்குள், துல்லிய உபகரணங்கள் துறை அதிகரித்தது. பிளாஸ்டிக் துல்லிய உபகரணங்கள், அச்சுகள், மின்னணு இணைப்புகள், கேமரா, தொலைநோக்கி போன்ற கருவிகளைத் தயாரிக்கும் தொழிற்துறைகள் போன்றவை அதிக உற்பத்தியால் வளர்ச்சி கண்டன.

இயந்திரங்கள் மற்றும் அமைப்புகள் துறைகள் சரிந்தது, இது பெரும்பாலும் பகுதிமின்கடத்தி உபகரணங்களின் உற்பத்தி குறைந்ததால் ஏற்பட்டது.