மாணவர் முரசு
இ-பேப்பர்
சிங்கப்பூரின் குழுத்தொகுதிக் கட்டமைப்பு உள்ளிட்ட கொள்கைகள் மக்களிடையே பிளவை உண்டாக்காமல் சமத்துவம், பிரதிநிதித்துவம், நல்லிணக்கம் ஆகியவற்றைப் பாதுகாக்கின்றன என்று சட்ட, போக்குவரத்து மூத்த துணை அமைச்சர் முரளி பிள்ளை கூறியுள்ளார்.
ஜூரோங் ஈஸ்ட் - புக்கிட் பாத்தோக் குழுத்தொகுதிக்கான நாடாளுமன்ற உறுப்பினருமான அவர், அத்தகைய கொள்கைகள் அமைதியான, நிலையான சமூகத்தை உருவாக்க உதவியுள்ளதாக ஃபேஸ்புக்கில் ஞாயிற்றுக்கிழமை (நவம்பர் 2) பதிவிட்டார்.
ஒருவருக்கொருவர் மரியாதை, பொதுவான முன்னேற்றம் ஆகியவற்றை அடிப்படையாகக் கொண்டு அந்தக் கொள்கைகள் உருவாக்கப்பட்டன என்று திரு முரளி பிள்ளை வலியுறுத்தினார்.
கடந்த காலங்களில் மக்கள் செயல் கட்சி அரசாங்கம் வகுத்த கொள்கைகள் சிங்கப்பூர்ச் சமூகத்தில் இனம், சமயம் தொடர்பான பிளவுகளுக்கும் பிரிவினைகளுக்கும் வழியமைத்ததாகச் சிங்கப்பூர் ஜனநாயகக் கட்சித் தலைவர் டாக்டர் சீ சூன் ஜுவான் அண்மையில் காணொளி ஒன்றை வெளியிட்டார்.
அது தொடர்பில் திரு முரளி பிள்ளை ‘இனமும் என் அரசியல் பயணமும்’ என்ற தலைப்பில் ஃபேஸ்புக்கில் காணொளிப் பதிவை வெளியிட்டார்.
“டாக்டர் சீ கூறுவது உண்மையல்ல என்பது அவருக்குத் தெரிந்திருக்கவேண்டும். சிங்கப்பூரில் உள்ள இன ரீதியான பிரிவினைகளை முறியடிக்கவும் சிங்கப்பூரர்களிடையே உள்ள ஒற்றுமையை வலுப்படுத்தவுமே மசெக அரசாங்கம் கொள்கைகளை வகுத்துள்ளது,” என்று திரு முரளி பிள்ளை வலியுறுத்தினார்.
அந்த வகையில் 2016ஆம் ஆண்டு நடைபெற்ற புக்கிட் பாத்தோக் தனித்தொகுதி தேர்தலின்போது தமக்கு ஏற்பட்ட சொந்த அனுபவத்தைத் திரு முரளி பிள்ளை குறிப்பிட்டார். புக்கிட் பாத்தோக் தனித்தொகுதியில் திரு முரளியை எதிர்த்துக் களமிறங்கினார் டாக்டர் சீ.
அனைத்து குழுத்தொகுதியிலும் இனத்திற்கு அப்பாற்பட்டு அனைவரும் தம்மிடம் நல்ல விதத்தில் பேசிப் பழகியதைத் திரு முரளி நினைவுகூர்ந்தார்.
தொடர்புடைய செய்திகள்
அப்படியிருந்தும், தேர்தலின்போது இனத்தை ஓர் ஆயுதமாகப் பயன்படுத்தி தம்மைக் குறிவைத்துத் தாக்க ஒரு சிலர் முற்பட்டதைத் திரு முரளி சுட்டினார்.
2020ஆம் ஆண்டு தமது படத்தில் வேண்டுமென்றே சிலர் தாடியையும் நெற்றியில் கறுப்பு, சிவப்பு பொட்டையும் வரைந்து அவதூறு செய்ததைத் திரு முரளி குறிப்பிட்டார்.
அத்தகைய செயல் அரசியல் ஆதாயத்துக்காக ஒரு சிறு கூட்டத்தால் செய்யப்பட்டது என்ற அவர், நல்லிணக்கத்தைச் சிங்கப்பூரில் மெத்தனமாக எடுத்துக்கொள்ளக்கூடாது என்பதை அது தமக்கு உணர்த்தியதாகச் சொன்னார்.
சம்பவம் குறித்து தமக்குக் கோபத்தைவிட வருத்தமே அதிகம் இருந்தது என்றும் இனம் எவ்வளவு சுலபமாக வெறுப்புணர்ச்சியைத் தூண்ட பயன்படுத்தப்படலாம் என்பதைப் புலப்படுத்தியது என்றும் கூறினார்.
“டாக்டர் சீ போன்ற சிலர் இனத்தைப் பற்றி பேசுவதை நிறுத்தவேண்டும். பிளவுகள் இல்லை என்பது போல வாழ்வது எப்படியாவது நம்மிடையே ஒற்றுமையை வலுப்படுத்திவிடும் என்று கூறுகின்றனர். ஆனால் என் அனுபவம் அதற்கு நேர் எதிராக இருக்கிறது. இனத்தை ஓரங்கட்டிவிடுவதால் அது மறைந்துவிடாது,” என்று திரு முரளி வலியுறுத்தினார்.
உலக அளவில் இனம் எவ்வாறு மிக விரைவாகப் பிளவுகளுக்கு இட்டுச் செல்கிறது என்பதை நம்மால் காண முடிகிறது என்ற திரு முரளி பிள்ளை, சிங்கப்பூரின் அணுகுமுறை மாறுபட்டது என்றார்.
அனைத்து இனத்துக்கும் சமூகத்தில் சமமான இடத்தைப் பிடிப்பதற்கான உரிமை உள்ளது என்று திரு முரளி மீண்டும் வலியுறுத்தினார்.