அதிகரிக்கும் குடும்பச் செலவுகள் குறித்து பெரும்பாலான சிங்கப்பூரர்கள் அக்கறை

அதிகரிக்கும் குடும்பச் செலவுகள் கிட்டத்தட்ட 70 விழுக்காடு சிங்கப்பூரர்களுக்கு அக்கறைக்குரிய அம்சமாக இருப்பதாகக் கூறியுள்ளனர். சென்றாண்டு நடத்தப்பட்ட இதே ஆய்வுடன் ஒப்பிடும்போது, இந்த எண்ணிக்கை 11 விழுக்காடு புள்ளிகள் அதிகம். நிச்சயமற்ற பொருளியல் சூழல், உயரும் பணவீக்கம் ஆகிய காரணங்களால் அதிகமான சிங்கப்பூரர்கள் குடும்பச் செலவுகள் குறித்து அக்கறை கொண்டுள்ளனர். யுஓபி வங்கி நடத்திய ஆய்வில் இத்தகவல்கள் தெரியவந்துள்ளன.

இன்னும் ஆறே மாதங்களில் சிங்கப்பூரின் பொருளியல் மந்தநிலையை அடையலாம் என்று ஆய்வில் கலந்துகொண்ட 70 விழுக்காடு சிங்கப்பூரர்கள் கருதுகின்றனர். இது கடந்த ஆண்டுடன் ஒப்பிடுகையில் ஏழு விழுக்காடு அதிகம்.

பல வயதினர் மற்றும் வெவ்வேறு வருமான நிலைகளில் உள்ள 1,000க்கும் மேற்பட்ட சிங்கப்பூரர்கள் இந்த ஆய்வில் பங்கெடுத்தனர்.

போதுமான சேமிப்பு வைத்திருப்பது, ஓய்வுகாலத்துக்குத் திட்டமிடுவது, தங்களுக்கும் தங்கள் குடும்பத்தாருக்கும் அத்தியாவசியப்பொருட்களை வாங்க வசதி இருப்பது ஆகிய அம்சங்கள் சிங்கப்பூரர்களின் முக்கியமான அக்கறைகள் என இந்த ஆய்வு சுட்டிக்காட்டியது.

நிதி நிர்வாகத்தோடு வேலையைத் தக்கவைத்துக்கொள்வது முக்கியம் என்று ஆய்வில் கலந்துகொண்டவர்கள் குறிப்பிட்டனர். கொவிட்-19 சிங்கப்பூரர்களை எதிர்பாராத சம்பவங்களுக்கு தயார்செய்ய கற்றுக்கொடுத்துள்ளது என்று வங்கி சொன்னது.

மூன்றிலிருந்து ஆறு மாதம் வரையிலான சம்பளத்தை சேமிப்பு வைத்திருப்பது முக்கியம். எதிர்பாராத நேரங்களில், இந்தச் சேமிப்பு ஓரளவு பாதுகாப்பு அளிக்கும் என்று கூறப்பட்டது.