மாணவர் முரசு
இ-பேப்பர்
ஒரு குழந்தை வளர வளர ஒவ்வொரு கட்டத்திலும் வெவ்வேறு சவால்களை எதிர்கொள்ளவேண்டிய நெருக்கடி தாய்மார்களுக்கு உண்டு என்று ஒரு தாயாகத் தம் அனுபவத்தைப் பகிர்ந்துகொண்டார் தகவல், மின்னிலக்க மேம்பாட்டு அமைச்சர் ஜோசஃபின் டியோ.
வேலையையும் குடும்பத்தையும் சமாளிப்பது மிகவும் கடினம் என்றும், தமக்கு உறுதுணையாக இருந்து ஆதரவு வழங்கும் தம் கணவருக்கு நன்றி என்றும் கேலாங் வெஸ்ட் சமூக மன்றத்தில் நடந்த அன்னையர் தின நிகழ்ச்சியில் ஆற்றிய உரையில் அவர் கூறினார்.
தந்தைகளுக்கான மையமும் ‘மம்ஸ் ஃபார் லைஃப்’ (MUMs for life) என்ற அமைப்பும் இணைந்து ‘அன்னையர்க்கான விடுமுறை நாள் நிகழ்வு’ (Mum’s Day Out) என்ற நிகழ்ச்சிக்கு ஏற்பாடு செய்தன.
சனிக்கிழமை (மே 10) காலை 10 மணி முதல் மாலை 5 மணி வரை கேலாங் வெஸ்ட் சமூக மன்றத்தில் நடந்தேறிய இந்நிகழ்ச்சியில், அமைச்சர் ஜோசஃபின் டியோ கலந்துகொண்டார்.
தாய்மையின் மகத்துவத்தை எடுத்துரைப்பதோடு, தாயார் அதீத மனவுளைச்சலுக்கு ஆளாகும்போதும் குடும்பத்தில் மற்றவர்கள் மனத்தால் பாதிக்கப்பட்டிருக்கும்போதும் கைகொடுப்பது குடும்பம்தான் என்று குடும்பப் பிணைப்பின் இன்றியமையாமையை அவர் வலியுறுத்தினார்.
குடும்பத்தோடு நேரம் செலவிட்டு குடும்பத்தினரோடு இருக்கும் பிணைப்பை வலுப்படுத்த இது போன்ற நிகழ்ச்சிகள் உதவும் என்றார் அவர்.
மற்ற அமைப்புகளோடு ஒன்றிணைந்து குடும்பங்களுக்கான பல திட்டங்களை ஜாலான் புசாரில் செயல்படுத்துவோம் என்றும் அவர் உறுதியளித்தார்.
‘அம்மாவை நினைக்கும்போது’ என்ற தலைப்பில் 4 முதல் 17 வயது வரையிலான சிறுவர்களுக்கான ஓவியப் போட்டியும் நடத்தப்பட்டது. 4 பிரிவுகள் கொண்ட இப்போட்டியில் வெற்றி பெற்றவர்களுக்கு அமைச்சர் பரிசுகளை வழங்கினார்.
தொடர்புடைய செய்திகள்
“பரிசுபெற்ற ஆக இளைய சிறுவருக்கு 6 வயதுதான். இருந்தாலும் அனைத்து ஓவியங்களும் ஈர்க்கக்கூடிய வகையில் மிகவும் அழகாக இருக்கின்றன,” என்றார் அமைச்சர்.
ஆடல், பாடல் நிகழ்ச்சிகள் மட்டுமன்றி, தாயாரோடு இணைந்து வாழ்த்து அட்டைகள், கைவினைப் பொருள்களைச் செய்தல், பலூன் சிற்பங்கள் உருவாக்குதல் போன்ற பல உற்சாகமான நடவடிக்கைகளை வழங்கும் சாவடிகளும் அங்கு அமைக்கப்பட்டிருந்தன.
“தாயாக எப்போதும் நாம் கொடுத்துக்கொண்டுதான் இருக்கிறோம். அன்பைப் பெறுவது அரிது. இந்த வயதில் கள்ளங்கபடமின்றி பிள்ளைகள் அம்மாவுக்காக அன்பை வெளிப்படுத்த எடுக்கும் முயற்சிகளைப் பார்க்கும்போது நெகிழ்ச்சியாக இருக்கிறது,” என்றார் வாழ்த்து அட்டைச் சாவடியில் சேவை செய்த தொண்டூழியர் ஷில்பா, 33.
ஒரு வர்த்தக நிறுவனத்தில் மேலாளராகப் பணிபுரியும் இவர், 8 வயதுச் சிறுவனின் தாயாரும்கூட. நேரப் பற்றாக்குறை இருந்தபோதும் வாரயிறுதியில் தொண்டூழியம் செய்வதை வழக்கமாகக் கொண்டுள்ளதாக ஷில்பா தெரிவித்தார்.
“வித்தியாசமான பல நடவடிக்கைகளிலும் விளையாட்டுகளிலும் ஈடுபட்டு, குடும்பத்தோடு நேரம் செலவிட்டதில் எனக்கு மிகவும் மகிழ்ச்சி,” என்று தன் மகளோடும் தாயோடும் இந்நிகழ்ச்சியில் கலந்துகொண்ட இந்துஜா, 31, கூறினார்.
ஓவியப் போட்டியில் இரண்டாவது பரிசு வென்ற தன் நான்கு வயது மகள் ரித்திகா தினேஷின் படைப்பு அங்கீகரிக்கப்பட்டது மகிழ்ச்சியளிப்பதாகவும் அவர் சொன்னார்.