மாணவர் முரசு
இ-பேப்பர்
தீபாவளி இன்பத்தை வெளிநாட்டு ஊழியர்களுக்கு வாகனங்களில் உணவாகக் கொண்டுசென்றது ‘இட்ஸ்ரெய்னிங்ரெய்ன்கோட்ஸ்’ (ஐஆர்ஆர்) அறநிறுவனம்.
சனிக்கிழமை காலை (நவம்பர் 8) தீவு முழுவதும் இந்த விநியோகம் நடைபெற்றது.
கொவிட்-19 தொற்றுக்கு முன்பிலிருந்தே ஆண்டுதோறும் தீபாவளியின்போது பீட்சா, சமோசா போன்ற உணவுவகைகளை ‘ஐஆர்ஆர்’ தொண்டூழியர்கள் விநியோகித்து வருகின்றனர்.
“ஏன் பிரியாணி கொடுக்கவில்லையென சிலர் கேட்கக்கூடும். ஆனால், வாரந்தோறும் வெளிநாட்டு ஊழியர்கள் உண்பது அரிசிதான். அவர்களின் சம்பளத்துக்கு பீட்சாக்களை வாங்க முடியாது. அதனால்தான் அவர்களுக்கு ஓர் அன்பளிப்பாக வழங்குகிறோம். அவர்களுக்கு பீட்சாக்கள் மிகவும் பிடிக்கும்!
“கொவிட்-19 தொற்றுக் காலத்தில் இவ்வாறு வாகனத்தில் பீட்சா, சமோசாக்களை விநியோகிப்பதைத் தொடங்கினோம். ஏனெனில், பாதுகாப்பான இடைவெளியோடு உணவைக் கொடுக்கவேண்டியிருந்தது. ஆயினும், இந்த விநியோகமுறை எங்களுக்கு ஏற்புடையதாக இருந்தது,” என்றார் ‘ஐஆர்ஆர்’ நிறுவனர் தீபா ஸ்வாமிநாதன்.
காலை 10 முதல் 11 மணிவரை, 89 வாகனங்கள் 1,250 பீட்சாக்கள், 4,500 சமோசாக்கள், 6,700 பானக்கலன்களை விநியோகித்தன. அவை 16 வேலையிடங்கள், 3 தங்குவிடுதிகளுக்குச் சென்றதுடன், ஆறு வாகனங்கள் ஆங்காங்கே சென்று வெளிநாட்டு ஊழியர்களுக்கு விநியோகித்தன.
இதைத் தவிர்த்து, இன்னும் 1,000 பீட்சாக்களை பீட்சாஹட் நேரடியாக விநியோகிக்கும்.
பொதுமக்களிடமிருந்து இணையவழி நடைபெற்ற நிதி திரட்டுடன், நிறுவனங்களின் ஆதரவும் இம்முயற்சியைச் சாத்தியமாக்கின.
தொடர்புடைய செய்திகள்
ஐந்து ஆண்டுகளுக்கு முன்பு தாமே வாகனம் ஓட்டி விநியோகம் செய்த ரேணுகா, முதல் ஆண்டாக பீட்சாக்களை அடுக்கி, வாகனங்களில் ஏற்றித் தொண்டாற்றினார்.
முதன்முறையாக இம்முயற்சியில் வாகனம் ஓட்டிப் பங்கேற்ற விஜய் பெரியண்ணன், “இது நல்ல செயலாகத் தெரிந்தது. சமூக ஊடகங்களில் அவர்களைப் பின்தொடர்கிறேன்,” என்றார்.
நவம்பர் 27 வரை நடைபெறும் நிதி திரட்டுக்கு மக்கள் தொடர்ந்து நன்கொடையளிக்கலாம். அதன்மூலம் கிடைக்கும் நிதிக்கேற்ப ‘ஐஆர்ஆர்’ தொடர்ந்து தீபாவளி உணவுகளை வரும் நாள்களில் வெளிநாட்டு ஊழியர்களிடம் கொண்டுசேர்க்கும்.
நன்கொடை வழங்குவதற்கான இணையத்தளம்: https://sites.google.com/itsrainingraincoats.com/deepavali-drive-2025/home
தங்கள் ஊழியர்களுக்கு பீட்சாக்கள், சமோசாக்கள் சென்றடையவேண்டுமெனில் ‘ஐஆர்ஆர்’ அமைப்பை நிறுவனங்களும் தங்குவிடுதிகளும் தொடர்புகொள்ளலாம். திரட்டப்படும் நிதிக்கேற்ப, இயன்றால் ‘ஐஆர்ஆர்’ அவர்களுக்கு விநியோகம் செய்யும்.
இதனைத் தொடர்ந்து, கிறிஸ்துமஸ் அன்பளிப்புகளை ஊழியர்களுக்கு வழங்க நவம்பர் இறுதிமுதல் மற்றொரு நிதி திரட்டையும் ‘ஐஆர்ஆர்’ ஏற்பாடுசெய்யவுள்ளது