மாணவர் முரசு
இ-பேப்பர்
ஆசியாவின் முதன்மையான தொழில்துறை புதுமைக் கொண்டாட்டமான ‘சிங்கப்பூர் புதுமை, தொழில்நுட்ப வாரம்’ (சுவிட்ச்) கடந்த அக்டோபர் 29, 30 தேதிகளில் சேண்ட்ஸ் எக்ஸ்போ மாநாட்டு மண்டபத்தில் நடைபெற்றது.
இந்தக் கொண்டாட்டம், தொழில்துறையின் திருப்புமுனைகளை ஆராய தொழில்துறை தலைவர்களையும் தொழில்முனைவோரையும் ஒன்றிணைத்தது.
சிங்கப்பூர் தனது 60வது பிறந்தநாளைக் கொண்டாடும் வேளையிலும், சுவிட்ச் தனது 10வது பதிப்பைக் குறிக்கும் வேளையிலும், நாட்டின் எதிர்காலத்தை வடிவமைக்கும் அடுத்த தலைமுறை மாற்றத்தை உருவாக்குபவர்களை வெளிச்சம் போட்டுக்காட்டுவதில் சிங்கப்பூர் பலதுறைத் தொழிற்கல்லூரி பெருமைகொள்கிறது.
‘ஸ்பின்ஆஃப்’ தொழில்முனைவோர் மையத்தைப் பிரதிநிதித்து, சிங்கப்பூரின் முன்னேற்றம் மற்றும் மாற்றத்தின் உணர்வை உள்ளடக்கிய புதுமையான தீர்வுகளைக் காட்சிப்படுத்த, சிங்கப்பூர் பலதுறைத் தொழிற்கல்லூரி நாலாவது ஆண்டாக சுவிட்ச் 2025க்குத் திரும்புகிறது.
‘ஹார்மனி குவெஸ்ட்’ என்ற அட்டை விளையாட்டு, பரபரப்பான மின்னுலகில் இளையர்களுக்கும் குடும்பங்களுக்கும் இடையே தொடர்பை மேம்படுத்துவதை நோக்கமாகக் கொண்டுள்ளது என்கிறார் ஸ்டீபன் ஃபியோனா ரோஷ்னி, 18.
சிங்கப்பூர் பலதுறைத் தொழிற்கல்லூரியின் இரண்டாம் ஆண்டு மின்னூடகம் மற்றும் தகவல்தொடர்பு படிக்கும் இவர், ‘ஹார்மோனிக்ஸ்’ என்ற பெயரில் தாமும் தம் குழுவினரும் உருவாக்கிய அட்டை விளையாட்டைப் பற்றிப் பகிர்ந்துகொண்டார்.
அந்த விளையாட்டானது அர்த்தமுள்ள, நேரடித் தொடர்புக்கான ஒரு பாதுகாப்பான இடத்தை வழங்குகிறது. இதனால் விளையாட்டாளர்கள் கவனச்சிதறல்கள் இல்லாமல் உணர்ச்சி ரீதியாக இணைய முடியும். கடினமான அட்டை விளையாட்டுகளைப் போலன்றி, ஹார்மனி குவெஸ்ட் விளையாட்டாளர்களைக் கருத்தாழமிக்க உரையாடல்களுக்குமுன், வேடிக்கையான செயல்பாடுகளுடன் எளிதாக்குகிறது. சமுதாய, குடும்ப மேம்பாட்டு அமைச்சு மற்றும் பிறருடன் இணைந்து நடத்தப்பட்ட சோதனையோட்டம், அதன் உணர்வுபூர்வமான இணைப்புத்தன்மையை உறுதிப்படுத்துகிறது.
சிங்கப்பூர் பலதுறைத் தொழிற்கல்லூரியின் மூன்றாம் ஆண்டு வணிக நிர்வாகம் படிக்கும் இரு மாணவர்கள் ‘மெமொய்ட்டி’ என்ற குழு பெயரில் உருவாக்கிய அட்டை விளையாட்டில் தங்கள் அனுபவங்களைப் பகிர்ந்தனர்.
தொடர்புடைய செய்திகள்
தம் தாத்தாவுக்கு ‘டிமென்ஷியா’எனப்படும் முதுமைக்கால மறதிநோய் ஏற்பட்டதால் குடும்ப உறவுகள் மாறியதாகக் குறிப்பிட்ட குகனேஷ்வரன் தியாகராஜன், 24, அதனால், மறதி நோயாளிகளுடன் ஈடுபடவும் அவர்களின் பழைய நினைவுகளைப் பாதுகாக்கவும் ‘லா லா லேண்ட்’ என்ற அட்டை விளையாட்டை உருவாக்கினார்.
“இந்த சிங்கப்பூர் கருப்பொருள் கொண்ட விளையாட்டு, தலைமுறையினரை இணைக்க உதவுகிறது. எங்கள் முக்கிய நிறுவன மதிப்பு இரக்கம் ஆகும். மறதிநோயைத் தொடக்கத்திலேயே கண்டறிவதில் கவனம் செலுத்துகிறோம். நினைவு அட்டைகள் மூலம், இந்தப் பலகை விளையாட்டு தலைமுறையிடையே பிணைப்பையும் அர்த்தமுள்ள உரையாடல்களையும் வளர்க்கிறது,” என்கிறார் கிரிஷ் கமல், 19.
இந்த விளையாட்டானது உடல்சார்ந்த அம்சத்தில் கவனம் செலுத்துவதன் மூலம் இளையர்களை ஈர்க்க முயல்கிறது. ஆரம்பத்தில் அமைக்கப்பட்ட ‘கார்டன்ஸ் பை பே’ கூடாரம் ஒரு மிகச் சிறந்த திட்டமாகும். இது, 10 நாள்களில் அனைத்து வயதுப் பிரிவுகளையும் சேர்ந்த 500க்கும் மேற்பட்டோரை ஈடுபடுத்தியது.
பயிலரங்கு மற்றும் பலகை விளையாட்டு விற்பனைக்கு அப்பால், குறிப்பாக மருத்துவத் துறையில் புதிய வருவாய் வழிகளை ஆராய்வது எதிர்காலத் திட்டங்களில் அடங்கும் என்றார் கிரிஷ் கமல்.