மாணவர் முரசு
இ-பேப்பர்
கிழக்கு-மேற்கு பெருவிரைவு ரயில் பாதையின் ஒரு பகுதியில் தண்டவாளப் பணிகள் திட்டமிட்டபடி மேற்கொள்ளப்பட்டு வருவதாகத் தெரிவிக்கப்பட்டுள்ளது.
சம்பந்தப்பட்ட கிழக்கு-மேற்குப் பாதைப் பகுதியில் ரயில் சேவை திட்டமிட்டபடி புதன்கிழமையன்று (டிசம்பர் 11) மீண்டும் தொடங்கும் என்று எதிர்பார்க்கப்படுவதாகவும் தெரிவிக்கப்பட்டுள்ளது.
மோசமான வானிலை போன்ற காரணங்களால் இடையூறு நேராதிருந்து பாதிக்கப்பட்ட ரயில் பாதைப் பகுதியில் சோதனைகள் சரியாகச் சென்றால் ரயில் சேவை திட்டமிட்டபடி மீண்டும் தொடங்கும் என்று நிலப் போக்குவரத்து ஆணையத்தின் ரயில் (மின்சார, இயந்திரவியல்) பிரிவுக்கான குழுமத் தலைவர் சியா சூன் போ கூறினார்.
“40 விழுக்காட்டுத் தண்டவாளப் பணிகள் நிறைவடைந்துள்ளன. மின்சார விநியோகம், சமிக்ஞை ஆகியவற்றின் தொடர்பிலான பணிகள் அவற்றில் அடங்கும்,” என்று திரு சியா ஞாயிற்றுக்கிழமையன்று (டிசம்பர் 8) செய்தியாளர் சந்திப்பில் சொன்னார்.
கிழக்கு-மேற்குப் பாதையில் தெம்பனிஸ், தானா மேரா நிலையங்களுக்கு இடையிலான ரயில் சேவை சனிக்கிழமை முதல் வரும் செவ்வாய்க்கிழமை (டிசம்பர் 7- 10) வரை தற்காலிகமாக நிறுத்தி வைக்கப்பட்டுள்ளது.
ஞாயிற்றுக்கிழமை காலை நிலவரப்படி சம்பந்தப்பட்ட ரயில் பாதைப் பகுதியில் பழைய தண்டவாளங்களும் அவற்றுக்கு அருகே உள்ள கருவிகளும் அகற்றப்பட்டு புதியவை பொருத்தப்பட்டன.
எட்டுப் புதிய தண்டவாளக் கட்டங்கள் (track panels) பொருத்தப்பட்டு உருக்கி ஒன்றுசேர்க்கப்பட்டுள்ளதாக (welded) திரு சியா தெரிவித்தார். அந்தத் தண்டவாளங்கள்தான், புதிய ரயில் முனையத்திலிருந்து வரும் பாதையை கிழக்கு-மேற்குப் பதையில் அமையும் சந்திப்புடன் இணைக்கும் என்றும் அவர் குறிப்பிட்டார்.
பணிகள் மேற்கொள்ளப்படும் பகுதிக்கு ஞாயிற்றுக்கிழமையன்று ஸ்ட்ரெய்ட்ஸ் டைம்ஸ் நேரில் சென்றுப் பார்வையிட்டது. அங்கு தண்டவாளப் பணிகள் தொடர்வதையும் 80 ஊழியர்கள் இருந்ததையும் ஸ்ட்ரெய்ட்ஸ் டைம்ஸ் கண்டது.
தொடர்புடைய செய்திகள்
வானிலை ஒத்துழைத்தால் திங்கட்கிழமையன்று (டிசம்பர் 9) பொறியாளர்கள் மின்சார, சமிக்ஞை சோதனைகளைத் தொடங்குவர். பிறகு இறுதிச் சோதனைகளை மேற்கொள்ள சம்பந்தப்பட்ட பாதைப் பகுதியில் ரயில் ஒன்று செயல்படுத்தப்படும். அதன் பின்னர் புதன்கிழமையன்று பயணிகளுக்கான ரயில் சேவை மீண்டும் தொடங்கும்.
தண்டவாளப் பணிகளைப் பொறியாளர்கள் சிறப்பாக மேற்கொண்டு வருகின்றனர் என்றும் கூடுமானவரை பணிகளை விரைவில் முடிக்கத் தீவிரமாக முயற்சி செய்து வருவதாகவும் திரு சியா குறிப்பிட்டார்.
“அதேவேளை, எதிர்பாரா வகையில் கனமழை பெய்தாலோ மின்னல் தாக்கினாலோ நாங்கள் பணிகளை நிறுத்தவேண்டியிருக்கும். அது எனது கட்டுப்பாட்டில் இல்லை,” என்றும் அவர் சுட்டினார்.