மாணவர் முரசு
இ-பேப்பர்
ஜூவல் கீயும் அவரது குடும்பத்தினரும் டிசம்பர் மாத பள்ளி விடுமுறையின் பெரும்பகுதியை நன்கொடையாக வழங்கப்பட்ட பழைய பள்ளிப் பாடப் புத்தகங்களை பிரித்து அடுக்கி வைப்பதில் நேரம் செலவழித்து வருகின்றனர். 2020ஆம் ஆண்டிலிருந்து அவர்கள் இந்த நற்காரியத்தை செய்து வருகின்றனர்.
“பழைய புத்தகங்களுக்கு இரண்டாவது முறையாக வாய்ப்பு கிடைப்பது என்னையும் உற்சாகப்படுத்துகிறது,” என்று 11 வயது ஜூவல் கூறினார்.
யூ நெங் தொடக்கப்பள்ளி மாணவரான இவர், ஃபேர்பிரைஸ் குழுமம் நடத்தும் பாடப் புத்தகப் பகிர்வு இயக்கத்தில் பங்கேற்றவர்களில் ஆக இளையர்.
“எனக்குப் புத்தகங்களை வாசிக்கப் பிடிக்கும். கதைப் புத்தங்களைத் தேடுவேன். எனக்குப் பிடித்த புத்தகம் கிடைத்தால் அதை வீட்டிற்குக் கொண்டு செல்வேன்,” என்று ஜூவல் மேலும் கூறினார்.
ஃபேர்பிரைஸ் குழுமம், இவ்வாண்டு 42வது முறையாக பாடப் புத்தக இயக்கத்தை நடத்துகிறது. இந்த இயக்கம் 1983ல் முதல் முறையாகத் தொடங்கப்பட்டது.
இதுவரை, இதில் திரட்டப்பட்ட ஏழு மில்லியன் பாடப் புத்தகங்கள் 280,000க்கும் மேற்பட்ட மாணவர்களுக்கு நன்கொடையாக வழங்கப்பட்டன என்று ஃபேர்பிரைஸ் குழுமம் தெரிவித்தது.
இவ்வாண்டில் ஏற்கெனவே மாணவர்களால் பயன்படுத்தப்பட்ட பாடப் புத்தகங்கள் ஒன்பது ஃபேர்பிரைஸ் எக்ஸ்ட்ரா பேரங்காடிகள், ட்சு ஷி மனிதநேய இளையர் நிலையம் (Tzu Chi Humanistic Youth Centre). விடாசிட்டி (Vidacity) சமூக நிலையம் ஆகியவற்றின் வழியாக நவம்பர் 16 முதல் 30 வரை சேகரிக்கப்பட்டன.
அதன் பிறகு ஈசூனில் உள்ள ட்சு ஷி மனிதநேய நிலையத்தில் 2,000க்கும் மேற்பட்ட தொண்டூழியர்களும் ஃபேர்பிரைஸ் குழுமத்தின் ஊழியர்களும் புத்தகங்களை வகுப்பு வாரியாக பிரித்து அடுக்கினர்.
தொடர்புடைய செய்திகள்
கிழிந்த, கிறுக்கப்பட்ட, தற்போதைய பாடத்திட்டத்துக்கு ஒத்து வராத புத்தகங்கள் மறுசுழற்சிக்கு அனுப்பி வைக்கப்பட்டன.
டிசம்பர் 7, 8 தேதிகளில் காலை 9.00 மணி முதல் மாலை 7.00 மணி வரை ட்சு ஷி மனிதநேய இளையர் நிலையத்திற்கு வந்த பொதுமக்கள் நன்கொடையாக வழங்கப்பட்ட புத்தகங்களை பெற்றுச் சென்றனர்.
டிசம்பர் 7ஆம் தேதி புத்தகங்களை எடுக்க ஆயிரக்கணக்கானவர்கள் வந்ததாக ஸ்ட்ரெய்ட்ஸ் டைம்ஸ் நாளேடு தெரிவித்தது.
தமது 11 வயது மகன், ஒன்பது வயது மகளுடன் வந்த திருவாட்டி ஹார் சியன் ஃபோங், இங்கு தொண்டூழியம் செய்த நண்பரிடம் கேள்விப்பட்டு முதல்முறையாக வந்ததாகத் தெரிவித்தார்.
“பாடப்புத்தகங்கள் விலை உயர்ந்தவை, பணத்தை சேமிக்க இந்த இயக்கம் எங்களுக்கு உதவுகிறது. பழைய புத்தகங்கள் தூக்கி எறியப்படுவது தடுக்கப்படுவதால் சுற்றுச்சூழலுக்கும் இந்த இயக்கம் உதவுகிறது,” என்று திருவாட்டி ஹார் குறிப்பிட்டார்.
