மாணவர் முரசு
இ-பேப்பர்
லிட்டில் இந்தியா வர்த்தகர்கள், மரபுடைமைச் சங்கம் (லிஷா) எற்பாட்டில் நடைபெறும் முன்முயற்சிகளில் இளையர் பங்களிப்பு அவசியம் என்று நீடித்த நிலைத்தன்மை, சுற்றுப்புறம் மற்றும் கல்வி மூத்த துணை அமைச்சர் ஜனில் புதுச்சேரி தெரிவித்துள்ளார்.
“லிட்டில் இந்தியா வட்டாரத்தை துடிப்பானதாக்கும் வர்த்தகங்களில் இளையர்களை ஈடுபடுத்துவது அவசியம்,” என்று டாக்டர் ஜனில் தெரிவித்தார்.
இளமைத் துள்ளலுடன் ‘ஆட்டம் பாட்டம் கொண்டாட்டம்’ என்ற கருப்பொருளில் செவ்வாய்க்கிழமை (நவம்பர் 18) லிஷா தனது தீபாவளி விருந்து நிகழ்ச்சிக்கு ஏற்பாடு செய்திருந்தது.
நிகழ்ச்சியில் சிறப்பு விருந்தினராகக் கலந்துகொண்ட டாக்டர் ஜனில் தமிழ் முரசிடம் பேசினார்.
லிஷாவின் 25வது ஆண்டு நிறைவைக் குறிக்கும் வகையில் ‘பார்க்ராயல் கலெக்ஷன் மரினா பே’ வளாகத்தில் நடைபெற்ற இவ்விருந்தானது நிதி திரட்டும் நிகழ்ச்சியாகவும் அமைந்தது.
“திரட்டப்படும் நிதியானது லிட்டில் இந்தியாவில் பல்வேறு முயற்சிகளை ஆதரிப்பதில் பெரும்பங்கு வகிக்கும்,” என்றார் டாக்டர் ஜனில்.
அவருடன் வெஸ்ட் கோஸ்ட் - ஜூரோங் வெஸ்ட் குழுத்தொகுதி நாடாளுமன்ற உறுப்பினர் டாக்டர் ஹமீது ரசாக்கும் நிகழ்ச்சியைச் சிறப்பித்தார்.
“வர்த்தகங்கள் வளர, நாட்டின் பொருளியலும் வளரும். அதனால், அவற்றின் வளர்ச்சிக்கு அடுத்த தலைமுறையினர் பெரிதும் பங்களிக்க வேண்டும்,” என்று திரு ரசாக் கேட்டுக்கொண்டார்.
தொடர்புடைய செய்திகள்
நிகழ்ச்சியில் ஏறத்தாழ 45 வர்த்தகங்களும் 450 பங்கேற்பாளர்களும் கலந்துகொண்டனர்.
நிகழ்ச்சியில் இடம்பெற்ற ஆடல்-பாடல், இசை அங்கங்கள் பெரும்பாலும் இளையர்களின் ஏற்பாட்டில் நடைபெற்றது ஒரு புதுமையான அம்சம் என்றார் நிகழ்ச்சியின் ஏற்பாட்டுக் குழுத் தலைவரும் லிஷா செயற்குழு உறுப்பினருமான கீர்த்தி ராஜேந்திரன், 39.
“ஆண்டுதோறும் நடைபெறும் இந்நிகழ்ச்சி, இவ்வாண்டு இளமை ததும்ப, துடிப்புடன் இருக்க வேண்டும் என்று விரும்பினேன்,” என்றார் அவர்.