நார்வே சதுரங்கம்: உலகின் முதல் நிலை வீரரை வீழ்த்திய குகேஷ்

ஸ்டாவஞ்சர்: நார்வே சதுரங்கத் தொடரில் உலகின் முதல்நிலை சதுரங்க வெற்றியாளர் மேக்னஸ் கார்ல்சனை தமிழ்நாட்டு வீரர் குகேஷ் வீழ்த்தினார்.

நார்வே கிளாசிக்கல் அனைத்துலக சதுரங்கப் போட்டி அங்குள்ள ஸ்டாவஞ்சர் நகரில் நடந்து வருகிறது. இதில் பொதுப் பிரிவில் நடப்பு உலக வெற்றியாளரான குகேஷ் (இந்தியா), 5 முறை உலக வெற்றியாளரான மேக்னஸ் கார்ல்சன் (நார்வே) உள்பட 6 வீரர்கள் பங்கேற்கின்றனர். இதில் ஒவ்வொரு வீரரும், மற்றவர்களுடன் தலா 2 முறை மோத வேண்டும்.

இதன் 6வது சுற்று ஆட்டத்தில் தமிழகத்தைச் சேர்ந்த குகேஷ், உலகின் முதல்நிலை சதுரங்க வெற்றியாளர் மேக்னஸ் கார்ல்சனுடன் மோதினார். இந்த ஆட்டத்தில் மேக்னஸ் கார்ல்சனை குகேஷ் இறுதிவரை போராடி வீழ்த்தினார்.

அப்போது தோல்வியைத் தாங்கி கொள்ள முடியாமல் கார்ல்சன், சதுரங்கப் பலகையை ஓங்கி அடித்தார். வெற்றி பெற்ற மகிழ்ச்சியில் குகேஷ் அமைதியாக வாயைப் பொத்தியவாறு இருந்தார்.

இந்த வெற்றியின் மூலம் குகேஷ் 8.5 புள்ளிகளுடன் போட்டிப் பட்டியலில் மூன்றாவது இடத்திற்கு முன்னேறினார். மேலும், முதல் 2 இடத்தில் உள்ள கார்ல்சன் மற்றும் அமெரிக்க வீரர் ஃபேபியானோ ஆகியோரை விட குகேஷ் ஒரு புள்ளி மட்டுமே பின்தங்கியுள்ளார் என்பது குறிப்பிடத்தக்கது.