விரிவாக்கம் காண்கிறது மதுரை விமான நிலையம்

மதுரை: மதுரை விமான நிலையத்தில் இருந்து சென்னை, பெங்களுரூ, ஹைதராபாத், டெல்லி, மும்பை உள்நாட்டுச் சேவைகளும், துபாய், இலங்கை, அபுதாபி என வெளிநாடுகளுக்கும் விமானங்கள் இயக்கப்படுகின்றன.

இந்நிலையில், அண்மையில் பயணிகளின் வருகையை அடிப்படையாக கொண்டு, மதுரை விமான நிலையம், 3ஆம் தரநிலையில் இருந்து 2ஆம் தரநிலைக்கு உயர்த்தப்பட்டது. இதனால், மதுரை விமான நிலையத்தைப் பயன்படுத்தும் பயணிகளின் எண்ணிக்கை நாளுக்கு நாள் அதிகரித்த வண்ணம் உள்ளது.

ரூ.88 கோடி நிதி ஒதுக்கீடு

கூடுதல் விமானங்களைக் கையாளும் வகையில் மதுரை விமான நிலையத்தை விரிவாக்கம் செய்யும் பணிகளும் மும்முரமாக நடந்து வருகிறது.

இதுதவிர விமான ஓடு தளம் விரிவாக்கம் உள்ளிட்ட பல்வேறு கட்ட மேம்பாட்டுப் பணிகள், மதுரை விமான நிலையத்தில் நடந்து வருகிறது. அதன் ஒரு பகுதியாக புதிய வான்வழிக் கட்டுப்பாட்டு கோபுரம் (ஏ.டி.சி. டவர்) அமைக்கும் பணிகள் கடந்த 2021-ல் தொடங்கப்பட்டது.

அதிநவீன வசதிகளுடன் அமையும் இந்த வான் வழிக்கட்டுப்பாட்டு மையத்திற்கு, ரூ.88 கோடி நிதி ஒதுக்கீடு செய்யப்பட்டு தற்போது அந்த பணிகள் முடிவடைந்து சோதனை ஓட்டம் நிறைவு பெற்றுள்ளது.

இதுகுறித்துப் பேசிய மதுரை விமான நிலைய இயக்குநர், “புதிய வான்வழிக் கட்டுப்பாட்டு மையக் கட்டுமானப் பணிகள் முடிவுற்ற நிலையில், கடந்த சில மாதங்களாக பாதுகாப்பு தொடர்பான சோதனை ஓட்டம் நடைபெற்று வருகிறது. விமானப் போக்குவரத்து அமைச்சின் அனுமதி கிடைத்ததும் புதிய வான்வழிக் கட்டுப்பாட்டு மையம் இயங்கத் தொடங்கும்,” என்று கூறியதாக தமிழக ஊடகங்கள் தெரிவித்துள்ளன.