மாணவர் முரசு
இ-பேப்பர்
சென்னை: நடிகர் விஜய் தலைமையிலான தமிழக வெற்றிக் கழகம் கட்சிக்கு உறுப்பினர்களைச் சேர்க்கும் பணி விறுவிறுப்பாக நடைபெற்று வருகிறது. இந்நிலையில் உறுப்பினர் சேர்க்கைக்கு என தனி அணி அமைக்கப்பட்டுள்ளது.
சுமார் 2 கோடி உறுப்பினர்களை கட்சியில் சேர்க்க வேண்டும் என விஜய் இலக்கு நிர்ணயித்திருப்பதாகக் கூறப்படுகிறது. இந்நிலையில், உறுப்பினர் சேர்க்கை அணிக்கான நிர்வாகிகளின் பெயர்களை கட்சித்தலைவர் விஜய் அறிவித்துள்ளார்.
இந்தப் புதிய அணி பெண்கள் தலைமையில் உருவாக்கப்பட்டுள்ளது. இதுதொடர்பாக அறிக்கை ஒன்றை வெளியிட்டுள்ள விஜய், பெண்கள் தலைமையில் முதன்முதலாக உருவாக்கப்பட்டுள்ள இந்த அணி கழகத் தோழர்களோடு இணைந்து மக்களுக்கு உதவி செய்வார்கள்.
“தமிழக வெற்றிக் கழகத்தின் உறுப்பினர் சேர்க்கை அணிக்கு தற்போது நிர்வாகிகள் நியமிக்கப்பட்டுள்ளனர். இந்த புதிய அணி கழக கட்டமைப்பை சார்ந்து விரைவில் விரிவாக்கம் செய்யப்படும். இந்த புதிய அணிக்கு அனைவரும் முழு ஒத்துழைப்பை நல்குமாறு கேட்டுக்கொள்கிறேன்,” என விஜய் கூறியுள்ளார்.
இதற்கிடையே, தமிழக வெற்றிக் கழகம் சார்பில் உறுப்பினர் சேர்க்கைக்கான புதிய செயலி அறிமுகப்படுத்தப்பட்டுள்ளது. அதன் மூலம் கட்சியின் முதல் உறுப்பினராக தன் பெயரைப் பதிவு செய்துள்ளார் விஜய். இனி உறுப்பினர் சேர்க்கை பணி வேகம் பெறும் எனத் தெரிகிறது.
