மாணவர் முரசு
இ-பேப்பர்
காரைக்கால்: தன் மகளைவிட படிப்பில் சிறந்து விளங்கியதால் குளிர்பானத்தில் நஞ்சு கலந்து சிறுவனைக் கொன்ற பெண்ணுக்கு ஆயுள் தண்டனை விதிக்கப்பட்டது.
புதுச்சேரி ஒன்றிய ஆட்சிப் பகுதிக்குட்பட்ட காரைக்காலைச் சேர்ந்தவர்கள் ராஜேந்திரன் - மாலதி இணையர். அவர்களின் மகனான 13 வயது பாலமணிகண்டன், அப்பகுதியிலுள்ள தனியார் பள்ளியில் எட்டாம் வகுப்பில் பயின்று வந்தார்.
பள்ளியில் படிப்பு, விளையாட்டு, கலைநிகழ்ச்சிகள் என அனைத்திலும் பாலமணிகண்டன் முதன்மையான மாணவராகத் திகழ்ந்தார்.
இது, அவரது சக மாணவி ஒருவரின் தாயான சகாயராணி விக்டோரியாவிற்கு எரிச்சலை ஏற்படுத்தியது. அதனால், பள்ளியில் தன் மகளுக்குப் போட்டியாக விளங்கிய பாலமணிகண்டனைக் கொலைசெய்ய அவர் திட்டம் தீட்டினார்.
இந்நிலையில், கடந்த 2022 செப்டம்பர் 2ஆம் தேதி பள்ளி ஆண்டுவிழா ஒத்திகை முடிந்து வீடு திரும்பிய பாலமணிகண்டனுக்கு வாந்தி, மயக்கம் ஏற்பட்டது. பெற்றோர் விசாரித்ததில், உறவினர் கொடுத்தனுப்பிய குளிர்பானத்தை அருந்தியதாக அவர் கூறினார்.
அதனைத் தொடர்ந்து, பாலமணிகண்டனைக் காரைக்கால் அரசு மருத்துவமனையில் சேர்த்த அவனது பெற்றோர், பின்னர் பள்ளிக்குச் சென்று விசாரித்தனர். அப்போது, சக மாணவியின் தாயான சகாயராணி, பால மணிகண்டனின் உறவினர் கொடுத்ததாகச் சொல்லி, பள்ளிக் காவலாளியிடம் குளிர்பானத்தைக் கொடுத்துச் சென்றது தெரியவந்தது.
மறுநாள் 3ஆம் தேதி இரவு பாலமணிகண்டன் சிகிச்சை பலனின்றி உயிரிழந்தார். அதன்பின் சகாயராணி கைதுசெய்யப்பட்டு சிறையில் அடைக்கப்பட்டார்.
இச்சம்பவம் அச்சமயத்தில் தமிழகத்தில் பேரதிர்ச்சியை ஏற்படுத்தியது.
தொடர்புடைய செய்திகள்
கடந்த மூன்று ஆண்டுகளாக நடைபெற்றுவந்த இவ்வழக்கில் வியாழக்கிழமை (அக்டோபர் 23) தீர்ப்பு வழங்கப்பட்டது. குற்றவாளிக்குத் தூக்குத் தண்டனை விதிக்க வேண்டுமென அரசுத் தரப்பு வழக்கறிஞர் வாதாடினார்.
ஆனால், தூக்குத் தண்டனை விதிக்கும் அளவிற்கு இவ்வழக்கில் முகாந்திரம் இல்லை எனக் குறிப்பிட்ட நீதிபதி, குற்றவாளி சகாயராணிக்கு ஆயுள் தண்டனையும் ரூ.20,000 அபராதமும் விதித்துத் தீர்ப்பளித்தார்.