மாணவர் முரசு
இ-பேப்பர்
உலகின் மிகத் தொன்மையான மொழியான தமிழை அலட்சியப்படுத்துவது இந்தியாவுக்கே அவமதிப்பு என்றும் அந்த மொழியைக் காத்து அதன் வளத்தைக் கட்டிக்காப்பது 130 கோடி இந்தியர்களின் கடமை என்றும் பிரதமர் நரேந்திர மோடி வலியுறுத்திக் கூறி இருக்கிறார்.
உத்தரப் பிரதேசத்தின் வாரணாசி நகரில் காசி தமிழ்ச் சங்கமம் என்ற ஒரு மாதகால நிகழ்ச்சியை பனாரஸ் பல்கலைக் கழகத்தில் தொடங்கிவைத்துப் பேசிய பிரதமர், உலகின் பழமையான மொழிகளில் ஒன்றான தமிழ் மொழியைப் பெற்று இருப்பது இந்தியர்கள் அனைவருக்கும் பெருமை என்று குறிப்பிட்டார்.
காசியும், தமிழகமும் காலத்தால் அழியாத கலாசாரம், நாகரிகத்தின் மையங்களாக திகழ்வதாகக் கூறிய திரு மோடி, காசி நகரம் துளசிதாசரின் பூமியாகத் திகழ்வதைப் போல தமிழகம் திருவள்ளுவரின் பூமியாகத் திகழ்கிறது என்றார்.
மகாகவி என்று போற்றப்படும் பாரதியாரைப் போன்ற பலரும் காசியையும் தமிழகத்தையும் இணைத்ததாகவும் அவர் குறிப்பிட்டார்.
உத்தரப் பிரதேச முதல்வர் யோகி ஆதித்யநாத், மத்திய அமைச்சர்கள் உள்ளிட்ட பிரமுகர்கள் கலந்துகொண்ட தொடக்க நிகழ்ச்சியில் இந்தி, உருது, அரபி உள்ளிட்ட 13 மொழிகளில் செம்மொழி தமிழாய்வு நிறுவனம் மொழி பெயர்த்துள்ள திருக்குறள் நூல்களை பிரதமர் மோடி வெளியிட்டார்.
நிகழ்ச்சியில் தமிழர்களின் கலாசாரத்தை எடுத்துக்காட்டும் குறும்படம் வெளியிடப்பட்டது. இசையமைப்பாளரும் நாடாளுமன்ற மேலவை உறுப்பினருமான இளையராஜாவின் இன்னிசை நிகழ்ச்சியும் நடந்தது.
தமது சொந்தத் தொகுதியான வாரணாசியில் நடந்த அந்த நிகழ்ச்சியில் பேசிய திரு மோடி, மொழி வேறுபாடுகளைக் கலைந்துவிட்டு உணர்வுபூர்வ ஐக்கியத்தைத் தோற்றுவிக்க வேண்டியது அவசியம் என்றும் வலியுறுத்திக் கூறினார்.
இந்த முயற்சியின் ஓர் அங்கமாக இந்தியர்கள் அனைவரும் தமிழ் மொழியைக் கட்டிக்காக்க வேண்டும் என்று அவர் குறிப்பிட்டார். தமிழ் மொழியை ஒரு குறிப்பிட்ட எல்லைக்குள் அடைத்துவிடக் கூடாது என்றும் திரு மோடி வலியுறுத்தினார்.
ஒரு மாதகால காசி தமிழ்ச் சங்கமம் நிகழ்ச்சிக்கு பனாரஸ் இந்து பல்கலைக்கழகம், ஐஐடி சென்னை ஆகியவற்றுடன் ேசர்ந்து இந்திய கல்வி அமைச்சு ஏற்பாடு செய்து இருக்கிறது.