ஜோகூர் தேர்தல்: சிங்கப்பூரிலிருந்து திரும்பும் வாக்காளர்கள் எல்லையைக் கடக்கும் செயல்முறை எளிதாக்கப்படும்

ஜோகூர் பாரு: வரவிருக்கும் ஜோகூர் மாநிலத் தேர்தலில் வாக்களிப்பதற்காக, மலேசிய வாக்காளர்கள், குறிப்பாக சிங்கப்பூரில் பணிபுரியும் ஜோகூர்வாசிகள், எல்லையைக் கடந்து வருவதற்கு மலேசியாவின் உள்துறை அமைச்சு வசதி செய்து தரும் என்று மலேசிய உள்துறை அமைச்சர் சைஃபுதீன் நசுதியன் இஸ்மாயில் தெரிவித்தார்.

இருப்பினும், செயல்படுத்தப்படவுள்ள நடவடிக்கைகள், ஜூன் 12ஆம் தேதியன்று நடைபெறும் தேர்தல் ஆணையத்தின் கூட்டத்தைத் தொடர்ந்து அறிவிக்கப்படவுள்ள முக்கியத் தேர்தல் தேதிகளைப் பொறுத்தே அமையும் என்றும் அவர் மேலும் கூறினார்.

“நாங்கள் தேர்தல் ஆணையத்தின் கூட்டத்திற்காகக் காத்திருப்போம். வழக்கமாக, கூட்டத்திற்குப் பிறகு, தேர்தல் ஆணையம் வேட்புமனு தாக்கல் நாள், பிரசாரக் காலம், வாக்குப்பதிவு நாள் ஆகியவற்றை அறிவிக்கும்.

“அந்த அறிவிப்பின் அடிப்படையில் உள்துறை அமைச்சு, குறிப்பாக குடிநுழைவுத் துறை மற்றும் அது தொடர்பான அமைப்புகள் பதிலளிக்கும்,” என்று செவ்வாய்க்கிழமையன்று (ஜூன் 9) ஜோகூரில் நடந்த ஒரு நிகழ்விற்குப் பிறகு அவர் செய்தியாளர்களிடம் கூறினார்.

வாக்குப்பதிவு நாளைத் தேர்ந்தெடுப்பது, ஜோகூருக்கும் சிங்கப்பூருக்கும் இடையிலான எல்லை தாண்டிய பயணத்தில் பல்வேறு தாக்கங்களை ஏற்படுத்தும் என்று சைஃபுதீன் நசுதியன் கூறினார்.

ஜோகூர் மக்களுக்கான வாக்குப்பதிவு செயல்முறையை எளிதாக்க அமைச்சு தன்னால் இயன்ற அனைத்தையும் செய்யும் என்றும் அவர் மேலும் கூறினார்.

சிங்கப்பூரில் பணிபுரியும் ஜோகூர் மக்கள் திரும்பி வந்து வாக்களிக்க உதவுவதற்காக, எல்லைச் சோதனைச் சாவடிகளில் சாத்தியமான விரைவுப் பாதை வசதிகள் உள்ளிட்ட சிறப்பு ஏற்பாடுகள் அறிமுகப்படுத்தப்படுமா என்று அவரிடம் கேட்கப்பட்டிருந்ததாக தி ஸ்டார் செய்தி குறிப்பிட்டது.

16வது மாநிலத் தேர்தலுக்கு வழிவகுக்கும் வகையில், ஜோகூர் மாநிலச் சட்டமன்றம் ஜூன் 1ஆம் தேதி கலைக்கப்பட்டது.