மாணவர் முரசு
இ-பேப்பர்
வாஷிங்டன்: அமெரிக்க அதிபர் டோனல்ட் டிரம்ப் தமது விரோதிகளுக்கு எதிராக நடவடிக்கை எடுக்கும்படி நீதித்துறைக்குப் பகீரங்கமாகத் தெரிவித்துள்ளார்.
தலைமைச் சட்ட அதிகாரி பெம் பொண்டாய்யைக் குறிப்பிட்ட சமூக ஊடகத்தில் திரு டிரம்ப் பதிவிட்ட பதிவில், கலிஃபோர்னிய நாடாளுமன்ற உறுப்பினர் அடெம் ஸ்கிஃப், நியூயார்க் தலைமைச் சட்ட அதிகாரி லெட்டிஷியா ஜேம்ஸ் ஆகியோர்மீது சட்ட ரீதியான நடவடிக்கை எடுக்காதது குறித்து திரு டிரம்ப் அதிருப்தி தெரிவித்தார். அவர்கள் இருவரும் ஜனநாயகக் கட்சியைச் சேர்ந்தவர்கள்.
வீட்டு அடமான விண்ணப்பங்களுக்கான ஆவணங்களில் திரு ஸ்கிஃபும் திருவாட்டி ஜேம்ஸும் முறைகேடு செய்ததாக திரு டிரம்ப்பின் நெருங்கிய நண்பர்களில் ஒருவரான மத்திய வீடமைப்பு நிதி அமைப்பின் இயக்குநர் பில் புல்டே கூறினார்.
“நாம் இனியும் பொறுத்திருக்ககூடாது. இந்தத் தாமதம் நமது நற்பெயரையும் நம்பகத்தன்மையையும் கீழறுக்கிறது,” என்று திரு டிரம்ப் குறிப்பிட்டார்.
இம்மாதம் 19ஆம் தேதி, திருவாட்டி ஜேம்சின் வழக்கை விசாரிக்கும் மத்திய அரசாங்க வழக்கறிஞரைத் திரு டிரம்ப் பணிநீக்கம் செய்தார்.
வீட்டு அடமான விவகாரம் குறித்து திருவாட்டி ஜேம்ஸ்மீது குற்றம் சுமத்த போதுமான ஆதாரம் இல்லை என்று அந்த வழக்கறிஞர் கூறியதை அடுத்து அவர் பணிநீக்கம் செய்யப்பட்டார்.
“அதில் ஒரு பெரிய வழக்கு உள்ளது. பல வழக்கறிஞர்களும் சட்ட நிபுணர்களும் அவ்வாறு கூறினர். எனவேதான் வழக்கறிஞர்களைப் பணிநீக்கம் செய்தேன்,” என்று திரு டிரம்ப் குறிப்பிட்டார்.
திரு ஸ்கிஃபும் திருவாட்டி ஜேம்ஸும் இதற்கு முன் திரு டிரம்ப்புடன் மோதியுள்ளனர்.
தொடர்புடைய செய்திகள்
திரு டிரம்ப் அதிபராகப் பதவி வகித்த முதல் தவணைக் காலத்தின்போது அவர்மீதான முதல் அரசியல் குற்றச்சாட்டு விசாரணையைத் திரு ஸ்கிஃப் முன்னெடுத்தார்.
திருவாட்டி ஜேம்ஸ் திரு டிரம்ப்மீது மிகப் பெரிய உரிமையியல் மோசடி குற்றச்சாட்டைக் கொண்டுவந்தார்.