மாணவர் முரசு
இ-பேப்பர்
கனடா காட்டுத் தீ: நியூயார்க்கில் இலவச முகக்கவசம் விநியோகிக்கப்பட்டது
நியூயார்க்: கனடாவில் கொழுந்துவிட்டு எரியும் காட்டுத் தீ தீவிரமாக பரவி வருகிறது. அதன் காரணமாக அந்நாட்டில் எழுந்துள்ள புகைமூட்டம் அண்டை நாடான அமெரிக்காவின் ஆகாயவெளிகளையும் ஆக்ரமித்துள்ளது.
குறிப்பாக வடஅமெரிக்காவை புகைமூட்டம் பெரியளவில் பாதித்துள்ளது. அப்பகுதியின் காற்றின் தரக்குறியீடு இதுவரை இல்லாத வகையில் மோசமாகிக் கொண்டே செல்கிறது. எனவே, வீடுகளை விட்டு வெளியில் செல்லும்போது பாதுகாப்பாக 'என்95' முகக்கவசம் அணிந்துகொள்ள வேண்டும் அமெரிக்க அரசாங்கம் மக்களுக்கு வலியுறுத்தியுள்ளது.
நியூயார்க்கில், புகைமூட்டப் பாதிப்பில் இருந்து மக்களைப் பாதுகாக்க நேற்று மக்களுக்கு முகக்கவசங்கள் இலவசமாக விநியோகிக்கப்பட்டன.
கனடாவில் பெரும்பாலான மக்கள் வீட்டை விட்டு வெளியேறுவதைத் தவிர்த்து வருகின்றனர். அவ்வாறு வெளிவேலைகளில் ஈடுபட வேண்டிய அவசியமுள்ளவர்கள் முகக்கவசம் அணிந்துகொள்ள வேண்டும் என்று அந்நாட்டு அரசாங்கம் வலியுறுத்தி வருகிறது.
இவ்வாரக் கடைசியில் புகைமூட்டப் பிரச்சினை மிகக் மோசமாகக் கூடும் என்று அதிகாரிகள் எச்சரிக்கை விடுத்துள்ளனர். சுவாசப் பிரச்சினைகள் உள்ளோர் கடுமையாகப் பாதிக்கப்படுவர் என்று கூறப்படுகிறது.
இந்தப் புகைமூட்டம் குறிப்பாக கனடாவின் மாநிலங்களில் ஒன்றான கியூபெக் பகுதியில் இருந்தே அதிகம் வருவதாக அதிகாரிகள் தெரிவித்தனர்.
அங்குள்ள காடுகளில் கிட்டத்தட்ட 150 இடங்களில் தீ கொழுந்துவிட்டு எரிவது அடையாளம் காணப்பட்டுள்ளது.
வெப்பம் தாளாமல் அந்த வட்டாரங்களைச் சேர்ந்த மக்கள் வேறு மாநிலங்களுக்குக் குடிபெயர்ந்துள்ளனர். மேலும் குடியிருப்பாளர்கள் பலர், அங்கிருந்து வலுக்கட்டாயமாக அப்புறப்படுத்தப்பட்டு பாதுகாக்கப்படுவர் என்று எதிர்பார்க்கப்படுவதாக அதிகாரிகள் தெரிவித்தனர். இதுவே கியூபெக் மாநிலத்தில் நிகழும் மோசமான காட்டுத் தீ என்று கூறப்படுகிறது.
நியூயார்க் மாநில ஆளுநர் கேத்தி ஹோச்சுல், நியூயார்க்கில் ஒரு மில்லியன் இலவச முகக்கவசங்கள் விநியோகிக்கப்படும் என்று நேற்று முன்தினம் தெரிவித்தார். செய்தியாளர்களிடம் பேசிய ஆளுநர் கேத்தி, "இது ஒரு தற்காலிக நெருக்கடி காலம்தான். ஆனால், முன்பு நாம் சந்தித்த கொரோனா நெருக்கடி காலத்தைப்போல் இருக்காது. இருந்தாலும், இந்தப் புகைமூட்டப் பிரச்சினையால் நாம் பாதிக்கப்படாமல் முன்னெச்சரிக்கையாக இருக்கவேண்டும். அதேவேளையில் நியூயார்க்கில் பொதுப்போக்குவரத்துகளில் செல்வோர் கவலைப்பட வேண்டாம். நமது பொதுப் போக்குவரத்துகள் பாதுகாப்பான முறையில் சுத்தமான காற்றுவசதிகளைக் கொண்டவை என்று கூறினார்.
கனடாவின் டோரோண்டோவில் நேற்றைய நிலவரப்படி புகைமூட்டம் மோசமான நிலையை எட்டியுள்ளது என்று அந்நாட்டின் சுற்றுச்சூழல் துறை தெரிவித்துள்ளது. எனவே, வெளியில் செல்வோர் முகக்கவசம் அணிந்துசெல்வதே பாதுகாப்பானது என்று ஓர் அறிக்கையின் மூலம் அந்தத் துறை தெரிவித்துள்ளது.
குறிப்பாக நாட்டின் வடகிழக்குப் பகுதிதான் மோசமாகப் பாதிக்கப்பட்டுள்ளது. சுவாசப் பிரச்சினைகள் உள்ளோர் முன்னெச்சரிக்கை நடவடிக்கை எடுத்துக்கொள்ள வேண்டும் என்று சுற்றுச்சூழல் துறை கேட்டுக்கொண்டுள்ளது.
நியூயார்க்கில் வெளிப்புற நடவடிக்கைகளை இயன்றவரை குறைத்துக்கொள்ளுமாறு அந்நகர மேயர் எரிக் ஆடம்ஸ் நேற்று மக்களைக் கேட்டுக்கொண்டுள்ளார். அதேபோல் வாஷிங்டனிலும் வெளிப்புற நடவடிக்கைகள் நிறுத்தப்பட்டுள்ளன. இதுபோன்ற புகைமூட்டச் சூழலில் வெளியிடங்களில் உடற்பயிற்சி செய்வதைத் தவிர்க்க வேண்டும் என்றும் நியூயார்க் மக்களுக்கு வலியுறுத்தப்பட்டுள்ளது.