மாணவர் முரசு
இ-பேப்பர்
வாஷிங்டன்: அமெரிக்க அதிபர் டிரம்ப்பின் நிர்வாகம், 42 மில்லியனுக்கும் மேற்பட்ட அமெரிக்கர்களுக்கு உணவு நிதியில் ஒரு பகுதியை வழங்கப்போவதாக அறிவித்துள்ளது. அரசாங்க முடக்கம் தொடரும் நிலையில் அந்த அறிவிப்பு வந்திருக்கிறது.
வரலாற்றில் முன்னெப்போதும் காணாத அளவுக்கு நீண்ட முடக்கத்தைச் சந்திக்கிறது அமெரிக்கா. தீர்வுக்கான அறிகுறி தென்படுவதாகத் தெரியவில்லை என்று கவனிப்பாளர்கள் கூறுகின்றனர்.
மாதாந்திர உணவு உதவி பெற்றுவந்த அமெரிக்கர்களுக்கு, வழக்கத்தைவிட இப்போது பாதி அளவு கொடுக்கப்படும் என்று அமெரிக்க வேளாண் துறை தெரிவித்தது. அந்த உதவியை வழங்குவதற்கு அரசாங்கம் அவசர நிதியைப் பயன்படுத்துகிறது.
துணைச் சத்துணவு உதவித் திட்டத்திற்கு (Snap) எவ்வாறு செலவிடப்போகிறது என்பதற்கான பரிந்துரையை முன்வைக்கத் திங்கட்கிழமை (நவம்பர் 10) வரை நீதிபதிகள் அவகாசம் கொடுத்திருக்கின்றனர்.
ஒரு மாதத்திற்கும் மேலாக அரசாங்கம் முடங்கியிருப்பதால் அந்தத் திட்டத்திற்கான நிதியை ஒதுக்குவதில் சிக்கல் நிலவுகிறது.
திட்டத்தின் அனுகூலங்களை அமெரிக்க மாநிலங்கள் தனித்தனியே நிர்வகிக்கின்றன. இருப்பினும் திட்டத்தை நடத்துவதற்கு அவை மத்திய அரசாங்கத்தின் நிதி உதவியை நம்பியிருக்கின்றன. அக்டோபர் முதல் தேதியிலிருந்து அரசாங்கம் செயல்படாத காரணத்தால், நிதி உதவி வழங்கப்படவில்லை.
குறைவாகக் கொடுக்கப்படும் நிதியுதவியை மாநிலங்கள் எவ்வாறு பயன்படுத்த வேண்டும் என்பது திங்கட்கிழமைக்குள் தெரிவிக்கப்படும்.
அமெரிக்கர்களுக்குக் குறிப்பிட்ட அளவு தொகை கொடுக்க அவசர நிதியிலிருந்து வேளாண் துறை, 5.25 பில்லியன் அமெரிக்க டாலரைப் பயன்படுத்த வேண்டும் என்று மசாசூசெட்ஸ், ரோட் ஐலண்ட் மாநிலங்களில் பணியாற்றும் மத்திய அரசாங்க நீதிபதிகள் கூறினர். உணவு உதவித் திட்டத்திற்கு மாதந்தோறும் எட்டு பில்லியன் அமெரிக்க டாலர் செலவாகும்.
தொடர்புடைய செய்திகள்
நெருக்கடிநிலைக்காக ஒதுக்கப்பட்ட அந்த நிதியை டிரம்ப் அரசாங்கம் பயன்படுத்திக்கொள்ளலாம் என்று நீதிபதிகள் தெரிவித்தனர்.
குறைந்த வருமானம் ஈட்டும் அமெரிக்கர்கள் பலர் மளிகைப் பொருள்களை வாங்குவதற்கு நிதியுதவி கைகொடுக்கிறது.
உதவித் திட்டத்தின்கீழ், நான்கு பேர் கொண்ட ஒரு குடும்பத்திற்கு மாதந்தோறும் சராசரியாக 715 அமெரிக்க டாலர் கிடைக்கும்.