மாணவர் முரசு
இ-பேப்பர்
நியூயார்க்: அமெரிக்க மத்திய வங்கி, வட்டி விகிதத்தை மீண்டும் குறைத்துள்ளது. வட்டி விகிதம், கால் விழுக்காட்டுப் புள்ளி குறைக்கப்பட்டது. அது இப்போது 3.75 விழுக்காட்டுக்கும் 4 விழுக்காட்டுக்கும் இடைப்பட்டிருக்கும்.
பணவீக்கம் குறித்த அச்சம் பின்னுக்குத் தள்ளப்பட்டு, தேக்கமடைந்துள்ள ஊழியர் சந்தை பற்றிய கவலைக்கு முக்கியத்துவம் தரப்பட்டுள்ளதாகக் கவனிப்பாளர்கள் கருதுகின்றனர்.
அமெரிக்க அரசாங்கம் முடங்கிக் கிட்டத்தட்ட ஒரு மாதமாகிவிட்டது. அதனால் அதிகாரத்துவத் தரவுகளைப் பெறுவதில் மத்திய வங்கித் துறையினருக்குச் சிக்கல். எனவே வேலைச் சந்தை குறித்துக் கணிக்கமுடியாத நிலையில் அவர்கள் இருப்பதாகப் பொருளியல் வல்லுநர்கள் கூறுகின்றனர். இந்நிலையில்தான் வட்டி விகிதம் குறைக்கப்பட்டுள்ளது.
சென்ற ஆண்டு (2024) டிசம்பருக்குப் பிறகு, இந்த ஆண்டில் முதன்முறையாகக் கடந்த மாதம் (செப்டம்பர்) மத்திய வங்கி வட்டி விகிதத்தைக் குறைத்தது.
வங்கிக் குழுவில் வாக்களிக்கும் உரிமை பெற்ற உறுப்பினர்கள் இருவர், வட்டி விகிதத்தைக் குறைப்பதற்கு எதிராகக் குரல் கொடுத்தனர்.
மத்திய வங்கி அதிகாரிகள், ஒருமித்த கருத்தை எட்டுவதில் சிரமத்தை எதிர்நோக்கியிருப்பதாக அதன் தலைவர் ஜெரோம் பவல் சொன்னார். அதனால் வரும் டிசம்பரில் வட்டி விகிதம் மீண்டும் குறைக்கப்படும் என நிதிச் சந்தைகள் ஊகிக்கக்கூடாது என்றார் அவர்.
அமெரிக்காவில் அரசாங்க முடக்கநிலை காரணமாக கடந்த ஒரு மாதகாலமாக ஊழியரணி, மொத்த உள்நாட்டு உற்பத்தி போன்ற பொருளியல் சார்ந்த முக்கியத் தரவுகள் வெளியிடப்படுவது நிறுத்திவைக்கப்பட்டுள்ளது.
இதனால் கொள்கை வகுப்பாளர்கள், நிதி நிறுவனங்கள், தொழில்முனைவோர் ஆகியோர் கண்ணைக் கட்டி காட்டில் விட்டதுபோல் செய்வதறியாத நிலைக்குத் தள்ளப்பட்டுள்ளனர்.
தொடர்புடைய செய்திகள்
இந்நிலைக்கு குடியரசுக் கட்சி எம்.பி.க்களும் ஜனநாயகக் கட்சி எம்.பி,க்களும் மாறி மாறி குற்றம் சுமத்தி வருவதால் முடக்கநிலை விரைந்து முடிவிற்கு வருவதற்கான அறிகுறிகள் தெரியவில்லை. இதனால், மில்லியன்கணக்கானோர்க்கு உணவுதவி கிடைப்பது கேள்விக்குறியாகி இருக்கிறது.
தகவல் முடக்கம் தொடர்ந்தால் நிறுவனங்கள் ஆட்சேர்ப்பதும் முதலீடு செய்வதும் குறையக்கூடும் என்று பகுப்பாய்வாளர்கள் எச்சரித்துள்ளனர்.