மாணவர் முரசு
இ-பேப்பர்
தாம் கடந்து வந்த பாதையை எப்போதும் மறந்ததில்லை என்கிறார் நடிகை சமந்தா.
சினிமாவில் நடிகையாக அறிமுகமாவதற்கு முன்பு சென்னை மாநகரப் பேருந்தில் சன்னல் ஓரத்தில் அமர்ந்து இளையராஜாவின் பாடல்களைக் கேட்டபடி பயணம் செய்த நாள்கள் தம் வாழ்க்கையைக் கவிதையைப் போல் மாற்றிய தருணங்கள் என்று அண்மைய பேட்டியில் குறிப்பிட்டுள்ளார்.
“பத்து ஆண்டுகளுக்கு முன்பு வரை, உடற்பயிற்சி மட்டுமே நம் உடலைப் பாதுகாக்கும் என்று நினைத்துக்கொண்டிருந்தேன். 30 வயதைக் கடந்ததும்தான் அமைதியான மனம் மட்டுமே நல்ல உடல்நலத்தையும் வாழ்க்கையையும் தரும் என்பது புரிகிறது,” என்று பக்குவமாகப் பேசும் சமந்தா, இந்த ஆண்டு தாம் எதிர்பார்த்தபடி நம்பிக்கை அளிக்கும் விதமாகவும் மகிழ்ச்சி தருவதாகவும் அமைந்துள்ளதாகக் கூறியுள்ளார்.
“இந்த ஆண்டுத் தொடக்கத்திலேயே நம்பிக்கையூட்டும் தகவல்கள் கிடைத்தன. ஆண்டு இறுதிக்குள் எனக்கென புதிய வாழ்க்கையும் அமையும் என நம்புகிறேன்.
“என்னைப் பார்க்கும் பெரும்பாலானோர் திருமணம், குடும்ப வாழ்க்கை, திரையுலகம் குறித்துத்தான் அதிகம் பேசுகிறார்கள்.
“திரையுலகில் கவர்ச்சியாக நடிப்பதில் எந்தச் சிரமமும் இல்லை. ஆனால், படப்பிடிப்பில் நூறு பேர் கூடியிருக்கும்போது நம்முடன் நடிக்கும் ஒருவரைப் பேரழகனாக நினைத்து உருகி உருகி காதலிப்பதுதான் கஷ்டம்.
“சினிமா இன்னும் பெண்களை ‘பார்க்கத்தான்’ செய்கிறது, உணரவில்லை என்ற வருத்தம் எனக்குண்டு. நடிப்புதான் எனக்குச் சோறு போடுகிறது என்பதை மறுக்கவில்லை.
“ஆனால், பணத்துக்காக மட்டும் நடிக்காமல் என் தனிப்பட்ட மனநிறைவுக்காகவும் நடிக்கிறேன் என்பதுதான் உண்மை,” என்று சொல்லும் சமந்தாவுக்குப் பிடித்த நடிகர் ரஜினிகாந்த்.
மற்ற நடிகர்களுக்கெல்லாம் இவரது பட்டியலில் அடுத்தடுத்த இடங்கள்தானாம்.
சமந்தா எதையும் வெளிப்படையாகப் பேசக்கூடியவர் என்பது மட்டுமல்ல, மிகுந்த சமூக அக்கறை கொண்டவர் என்றும் அவரது ரசிகர்கள் சமூக ஊடகங்களில் பாராட்டுவதில் உண்மை இருக்கிறது.
“நாயைப் போல் நன்றி மறக்காமல் இருந்தாலும், பூனையைப் போல் துளியும் அச்சமற்றவளாக இருக்க விரும்புகிறேன்.
“நான் ‘ஷவரி’ல் குளிப்பதை நிறுத்தி பல ஆண்டுகள் ஆகிவிட்டன. வாளியில் தண்ணீர் பிடித்து, அதில்தான் குளிக்கிறேன். இந்த உலகில் தண்ணீரைவிட சேமிப்பதற்கு அரிதான பொக்கிஷம் ஏதுமில்லை.
“எனக்குள் நானும் ஒரு நடிகையும் இருப்பதை நினைக்கும்போது சில சமயங்களில் மூச்சு முட்டும். எப்போது, யார் வெளியில் தெரிய வேண்டும் என்று முடிவெடுக்க முடியாமல் குழம்பி நிற்பேன். பிறகு எப்போதும் நான் நானாகவே இருக்க வேண்டும் என முடிவு செய்து அந்தக் கொள்கையைத்தான் பின்பற்றி வருகிறேன்,” என்று சமந்தா தெரிவித்துள்ளார்.
இளையர்களுக்கு இவர் கூறும் அறிவுரை?
“இது இளம்பெண்களுக்கான அறிவுரை. ‘அவர் என்னை நன்றாக, அக்கறையுடன் பார்த்துக்கொள்வார்’ என்று என் தோழிகள் யாராவது தன் காதலனைப் பற்றி கூறும்போது எரிச்சல் வரும். ‘ஏன் உனக்கு கை, கால், அறிவு என்று எதுவும் இல்லையா’ என்று கேட்கத் தோன்றும். வெறுமனே சாப்பிடுவதுதான் வாழ்க்கை என்றால், அதற்கு வாய் மட்டும் போதுமே.
“மூன்று நிமிடங்களுக்கு மேல் உங்களிடம் பேசும் பெண்களைப் பற்றி அதிக எதிர்பார்ப்புகள் வேண்டாம். காரணம், அவர்கள் ஒன்று முட்டாளாக இருப்பார்கள் அல்லது அவர்களுக்குக் காது கேட்காமல் இருக்கக்கூடும்.
“எனினும் இதில் விதிவிலக்கு உண்டு என்பதை இளையர்கள் மறக்க வேண்டாம்,” என்று தனது பேட்டியில் நகைச்சுவையாகக் குறிப்பிட்டுள்ளார் சமந்தா.