நடிகை பிந்து கோஷ் காலமானார்

பழம்பெரும் துணை நடிகை பிந்து கோஷ் காலமானார். அவருக்கு வயது 76.

கடந்த சில மாதங்களாகவே வயது மூப்பின் காரணமாக உடல்நலப் பாதிப்புகளால் அவதிப்பட்டு வந்தார் பிந்து கோஷ். பல்வேறு பிரச்சினைகள் இருந்த நிலையில் மருத்துவச் செலவுக்குப் பணமின்றி அவர் சிரமப்பட்டார்.

இதனை அறிந்து பல்வேறு திரையுலகப் பிரபலங்கள் அவருக்கு உதவி செய்தனர். எனினும், சிகிச்சை பலனின்றி ஞாயிற்றுக்கிழமை (மார்ச் 16) பிற்பகல் 2 மணிக்குக் காலமானார். இதனை அவருடைய மகன்கள் உறுதிப்படுத்தினர்.

1980களில் தமிழ்த் திரையுலகில் முன்னணி நடிகர்களின் படங்களில் நகைச்சுவை கலந்த துணைக் கதாபாத்திரங்களில் நடித்து பிரபலமானவர் பிந்து கோஷ்.

ரஜினி, கமல், சிவாஜி கணேசன், மோகன், பிரபு, கார்த்திக் எனப் பல முன்னணி நட்சத்திரங்களுடன் இவர் நடித்துள்ளார். இவரது அறிமுகப் படம் ‘கோழி கூவுது’. ‘தூங்காதே தம்பி தூங்காதே’, ‘சூரக்கோட்டை சிங்கக்குட்டி’ உள்ளிட்ட பல படங்கள் இவருடைய நடிப்பில் பிரபலமானவை.

சென்னையில் விருகம்பாக்கத்தில் உள்ள அவரது இல்லத்தில் உடல் அஞ்சலிக்காக வைக்கப்பட்டுள்ள நிலையில், திங்கட்கிழமை இரவு அவரது ஈமச்சடங்கு நடைபெறும் எனத் தெரிவிக்கப்பட்டது.