இசை, பாட்டு ஆகியவற்றில் பல ஆண்டுகளாக கலக்கி வரும் ஏ.ஆர்.ரகுமான் தற்போது நடனத்திலும் அசத்தியுள்ளார்.
உதயநிதி ஸ்டாலின் நடிப்பில் உருவாகி உள்ள ‘மாமன்னன்’ திரைப்படத்திற்கு ரகுமான் இசையமைத்துள்ளார்.
‘பரியேறும் பெருமாள்’, ‘கர்ணன்’ படங்களை இயக்கிய மாரி செல்வராஜ் மாமன்னன் படத்தை இயக்குகிறார்.
அப்படம் தொடர்பான அறிவிப்புகள் அவ்வப்போது சமூக ஊடகங்களிலும் வெளியாகிவருகிறது.
இந்நிலையில் படத்தின் இரண்டாவது பாடல் சில நாள்களுக்கு முன்னர் வெளியானது.
அந்தப் பாடலை ரகுமானே பாடியுள்ளார். பாட்டு வரிகள் காணொளியாகவும் வெளியானது.
காணொளியில் பாப் மன்னன் ‘மைக்கல் ஜாக்சன்’ ஆடும் சில நடன அசைவுகளை ரகுமான் ஆடினார்.
அது இணையவாசிகளிடையே பெரும் வரவேற்பைப் பெற்றது. பாடலும் மக்கள் மத்தியில் பிரபலமானதால் அவருக்கு சமூக ஊடகத்தில் பாராட்டு மழை பொழிந்தது.
‘மாமன்னன்’ அரசியல் பின்னணியைக் கொண்ட கதைக்களம் என்பதால் சினிமா ரசிகர்களிடையே அதிக எதிர்பார்ப்புகள் எழுந்துள்ளது.
வடிவேலு, பகத் ஃபாசில் இப்படத்தில் நடித்துள்ளனர்.