மாணவர் முரசு
இ-பேப்பர்
புதிய கதாநாயகனுடன் கௌரி கிஷன் நடிப்பில் அண்மையில் வெளியாகியுள்ள ‘அதர்ஸ்’ திரைப்படத்தின் செய்தியாளர் சந்திப்பு வியாழக்கிழமை (நவம்பர் 6) சென்னையில் நடைபெற்றது.
அப்போது யூடியூப் பிரபலம் ஒருவர் கதாநாயகனிடம், “கெளரி கிஷனின் எடை என்ன?” என்று கேட்டது தொடர்பாக விவாதம் எழுந்துள்ளது.
அக்கேள்விக்குக் குறுக்கிட்டுப் பதிலளித்த கௌரி, “இந்தப் படத்துக்கும் உங்கள் கேள்விக்கும் என்ன தொடர்பு? எனது எடை பற்றி தனிப்பட்ட கேள்விகளைக் கேட்பது தவறு. நான் 20 கிலோ இருப்பேன், 80 கிலோகூட இருப்பேன், அதைப் பற்றி நீங்கள் எப்படிக் கேட்கலாம்,” என்றார்.
“அதுவும் நடிகரிடம் எனது எடை என்னவென்று கேட்கிறீர். என் எடையைத் தெரிந்துகொண்டு என்ன செய்யப் போகிறீர்? இது முழுக்க முழுக்க பாடி ஷேமிங்.
“நடிகர்களிடம் செய்தியாளர்கள் இப்படிப்பட்ட கேள்விகளைக் கேட்பதில்லை. நடிகைகளிடம் மட்டும் தனிப்பட்ட, உடல் சார்ந்த கேள்விகளைக் கேட்பது ஏன்?
“இவற்றையெல்லாம் இயல்பானதாக்க முயற்சி செய்கின்றனர். இந்த அரங்கத்தில் இத்தனை பேர் இருக்கிறீர்கள், யாரும் அவர் கேட்டது தவறு என்று கண்டிக்கவில்லை.
“இங்கு என்னைத் தவிர ஒரு பெண்கூட இல்லை. நான் தனியாக நின்று இதுபோன்ற கேள்விகளையும் எதிர்கொள்கிறேன்,” என்று கௌரி ஆதங்கத்துடன் பேசினார்.
இந்தச் சம்பவம் சமூக ஊடகங்களில் பரவலானதைத் தொடர்ந்து நடிகைகள் உள்ளிட்ட திரைத்துறையினர் கௌரிக்கு ஆதரவாகக் குரல்கொடுத்து வருகின்றனர்.
தொடர்புடைய செய்திகள்
பாடகி சின்மயி தமது எக்ஸ் பக்கத்தில், “கௌரி தனக்காகப் பேசத் துணிந்ததற்குப் பாராட்டுகள்! அவர் ஒரு ஊடகவியல் மாணவி, மிகவும் புத்திசாலி. அந்தச் செய்தியாளர் இதில் இரட்டை நிலைப்பாடு எடுத்தது வெட்கக்கேடானது.” எனச் சாடினார்.
பாஜக மாநிலத் துணைத் தலைவர் குஷ்பு, தனியார் செய்தி நிறுவனத்துக்கு அளித்த பேட்டியில், “பெண்களின் எடை குறித்து கேள்வி எழுப்புவது வெட்கக்கேடானது. பெண்களின் எடை குறித்து பேசுவது உங்களின் வேலையும் இல்லை.
“இப்படி பேசுபவர்களின் குடும்பப் பெண்களிடம் நாங்களும் இதே கேள்வியைக் கேட்கலாமா?’’ என வினவினார்.
தமது நிலைப்பாட்டில் உறுதியாக நின்று பதிலடிக் கொடுத்த கௌரிக்கு குஷ்பு வாழ்த்து தெரிவித்தார்.
“மரியாதை என்பது ஒருவழிப்பாதை இல்லை, உங்களுக்கு மரியாதை தேவை என்றால் அதை கொடுத்து பெற்றுக்கொள்ளுங்கள்,” என அவர் கூறினார்.
இயக்குநர் பா.ரஞ்சித் தமது எக்ஸ் பக்கத்தில், “கௌரி, உங்கள் தைரியத்தைப் பாராட்டுகிறேன். உங்களிடம் கேள்வி கேட்ட செய்தியாளரின் செயல் வன்மையாகக் கண்டிக்கத்தக்கது, வெட்கக்கேடானது.
“நடிகைகள் இன்னும் இந்த அநாகரிகமான கேள்விகளை எதிர்கொள்ள வேண்டியிருப்பது, தமிழ்த் திரைத்துறை இன்னும் செல்ல வேண்டிய தூரம் எவ்வளவு என்பதைக் காட்டுகிறது,” எனப் பதிவிட்டார்.
கௌரியிடம் மன்னிப்பு
இந்நிலையில், கௌரியின் எடை குறித்து அநாகரிக கேள்வி எழுப்பியது தொடர்பாக வருத்தம் தெரிவித்து அந்த யூடியூப் பிரபலம் கார்த்திக் காணொளி வெளியிட்டுள்ளார். அதில், தாம் எழுப்பிய கேள்வி தவறாகப் புரிந்துகொள்ளப்பட்டதாக அவர் விளக்கம் அளித்துள்ளார்.
தமது கேள்வியால் வருத்தம் ஏற்பட்டிருந்தால் கௌரியிடம் மன்னிப்பு கேட்டுக்கொள்வதாக அவர் சொன்னார்.