இரண்டு வாரங்கள் கழித்து கணவரின் படத்தைப் பார்த்த நஸ்ரியா

அண்மையில் வெளிவந்து பெரும்பாலான மக்கள் பார்த்து ரசித்த 'வேலைக்காரன்' படத்தை நஸ்ரியா நேற்று முன்தினம்தான் பார்த்திருக்கிறார். இந்தப் படத்தில் நஸ்ரியாவின் கணவர் ஃபஹத் ஃபாசில் முதன் முதலாக தமிழில் வில்லனாக நடித்திருக்கிறார். இந்தப் படத்தில் நாயகனாக சிவகார்த்திகேயன் நடித்திருக்கிறார். இந்தப் படத்தைப் பார்த்ததும் டுவிட்டரில் "வேலைக்காரன் படத்தை மிகவும் ரசித்துப் பார்த்தேன். என் கணவர் தமிழில் அறிமுகமானதற்கு நான் மகிழ்ச்சி அடைகிறேன்," என்று கூறியிருந்தார் நஸ்ரியா. அதைப் பார்த்த ரசிகர்கள் பதிலுக்கு, "கணவர் நடித்த படத்தை இத்தனை நாட்கள் கழித்துப் பார்த்திருக்கிறீர்கள். என்னம்மா இப்படி பண்றீங்களேம்மா," என்று கிண்டல் செய்து பதில் போட்டிருக்கின்றனர்.