மாணவர் முரசு
இ-பேப்பர்
‘பன்னிகுட்டி’ என்று தனது படத்துக்குத் தலைப்பு வைத்துள்ளார் இயக்குநர் அனு சரண். ஏன் இந்தத் தலைப்பு என்று கேட்டால், அவர் கூறும் மற்ற விஷயங்களும் ஆச்சரியப்பட வைக்கின்றன.
கதிர் நடிப்பில் ‘கிருமி’ எனும் திகில் கதையைப் படமாக்கிய அனுபவம் உள்ளவர் இவர்.
இப்போது யோகி பாபு, கருணாகரன், லியோனி, சிங்கம் புலி, ராமர், தங்கதுரை என மிகப்பெரிய நகைச்சுவைப் பட்டாளத்தோடு ‘பன்னிகுட்டி’யை உருவாக்கி வருகிறார்.
“ஒரு பன்றிக்குட்டியை இரண்டு குழுக்கள் தேடிக் கண்டுபிடிக்க வேண்டிய அவசியம் எழுகிறது. இந்த ஒற்றை வரிக் கதையை வைத்துக்கொண்டு, வணிக ரீதியிலான, நகைச்சுவையான திரைக்கதையை அமைத்துள்ளோம்.
“படத்தில் பெரும் பன்றிக்கூட்டத்தைக் காட்டியுள்ளோம். அதற்காக கணினித் தொழில்நுட்பத்தை அதிகம் பயன்படுத்தியதாக முடிவுக்கு வரவேண்டாம்.
“இது ‘கிருமி’ படத்தில் இருந்து முற்றிலும் மாறுபட்டு இருக்கும். முழுக்க ஜாலியான படம். இதற்காக கொஞ்சம் மெனக்கெட்டுள்ளேன்.
“என் நண்பர் ரவிமுருகையா சொன்ன ‘பன்னிகுட்டி’ கதை நினைவுக்கு வந்ததும் உடனே அவருடன் கலந்து பேசினேன். நிறைய விவாதித்தோம். அவருக்கு இயல்பாகவே நகைச்சுவை உணர்வு அதிகம்.
“கிராமப்புற பின்னணியில் இருந்து வந்தவர். அவரும் நானும் சேர்ந்து திரைக்கதை எழுதியிருக்கிறோம். படம் முழுவதும் ஒவ்வொரு காட்சியும் மண்வாசனையோடு இருக்கும். முக்கியமாக படத்தின் கதைக்களமாக மதுரை அருகே இருக்கும் கிராமத்தைக் காட்டியிருக்கிறோம்.
“கிட்டத்தட்ட ஆறுமாத கால இடைவெளியில் நிறைய கிராமங்களைச் சுற்றிய பிறகே காட்சிகளைப் படமாக்க முடிவு செய்தோம். இதற்காக கள ஆய்வு மேற்கொண்டேன்.
“பன்றி வளர்ப்பு தற்போது குறைந்துகொண்டே வருகிறது. அதனால் பன்றிக் கூட்டத்தைக் காட்டுவது சவாலாக இருந்தது. ஒவ்வொரு ஊரிலும் பன்றி வளர்ப்பவர்களைத் தேடி அலைந்து கண்டுபிடிக்க வேண்டியிருந்தது.
“படத்தின் கதையை எழுதும்போதே கருணாகரன், யோகிபாபு இருவரும் மனதில் வந்தனர். இவர்கள்தான் முக்கிய கதாபாத்திரங்களை ஏற்றுள்ளனர். இருவரும் நடிப்பில் தங்கள் பலத்தை நிரூபித்துள்ளனர்,” என்கிறார் இயக்குநர் அனு சரண்.
இதில் கருணாவுக்கு லட்சுமி பிரியாவும் யோகிபாபுவுக்கு மலையாள நடிகை அஸானாவும் ஜோடியாக நடித்துள்ளனர். படம் விரைவில் வெளியீடு காணுமாம்.
“பன்றிகளைக் கட்டி மேய்ப்பது சுலபமல்ல. ஆனாலும் படப்பிடிப்புக்கு அழைத்து வரப்பட்ட அவை நாங்கள் சொல்வதையெல்லாம் கேட்டு ஒத்துழைப்பு வழங்கின. பன்றிகளுக்கு தேன் மிட்டாய் ரொம்பப் பிடித்திருந்தது.
“தினமும் மிட்டாய் கொடுத்தே அவற்றை எங்கள் வழிக்கு கொண்டு வந்தோம். என்னைப் பொறுத்தவரை பன்றிக்குட்டிகளும் கூட ஸ்டைல் செய்யக்கூடியவை தான். அவற்றின் உடல்மொழியை ரசிகர்களுக்குப் பிடிக்கும் வகையில் படமாக்கி உள்ளோம். இது வித்தியாசமான படமாக இருக்கும்,” என்று சிரிக்கிறார் அனு சரண்.
