‘ரேனிகுண்டா’ மூலம் தமிழ் சினிமா ரசிகர்களைத் தன் பக்கம் திரும்ப வைத்தவர் இயக்குநர் ஆர். பன்னீர்செல்வம்.
அதையடுத்து ‘18 வயசு’, விஜய் சேதுபதியின் ‘கருப்பன்’ உள்ளிட்ட படங்களை இயக்கி உள்ளார்.
இந்நிலையில் இவரது இயக்கத்தில் அடுத்து உருவாகி வருகிறது ‘நான்தான் சிவா’. இதை இயக்குநர் லிங்குசாமி தயாரிக்கிறார்.
வினோத் என்ற புதுமுகத்தை அறிமுகப்படுத்துகின்றனர். அவருக்கு ஜோடியாக ‘உதயம் NH4’ அர்ஷிதா ஷெட்டி நடித்துள்ளார். மேலும் பிரசாந்த் நாராயணன், அழகம்பெருமாள், சுஜாதா, விஷாலினி ஆகியோரும் முக்கிய கதாபாத்திரங்களை ஏற்றுள்ளனர்.
இது தன் வாழ்க்கைப் பயணத்தில் தாம் சந்திக்கும் இரு நபர்களால் ஓர் இளைஞன் எவ்வாறு பாதிக்கப்படுகிறான் என்பதை விவரிக்கும் படமாம்.
“எதிர்பாராத வகையில் குறிப்பிட்ட இருவரையும் சந்திக்கிறான் நாயகன். அவர்கள் இருவரும் அவனுக்கு வாழ்க்கையை வெவ்வேறு வகையில் சிதறடிக்கிறார்கள். அதிலிருந்து அவன் எப்படி மீண்டு வருகிறான் என்பதுதான் கதையின் மையக்கரு.
“இதில் காதல், அதிரடி, நகைச்சுவை என இதர வணிக அம்சங்களும் நிறைந்திருக்கும். கும்பகோணம், திருச்சி உள்ளிட்ட பகுதிகளில் படப்பிடிப்பை நடத்தி உள்ளோம்.
“அறிமுக நாயகன் என்று சொல்ல முடியாத வகையில் நிறைவான நடிப்பை வழங்கி உள்ளார் வினோத். லிங்குசாமியின் திருப்பதி பிரதர்ஸ் நிறுவனம் தயாரிக்கும் படம் என்றால் ரசிகர்கள் மத்தியில் எப்போதுமே தனி எதிர்பார்ப்பும் வரவேற்பும் இருக்கும்.
“இந்தப் படம் உங்கள் எதிர்பார்ப்பைப் பூர்த்தி செய்யும்,” என்கிறார் பன்னீர்செல்வம்.