மாணவர் முரசு
இ-பேப்பர்
கொரோனாவுக்கு எதிரான போராட்டத்தில் முன்னிலையில் உள்ள மருத்துவர்கள், காவல்துறையினர் உள்ளிட்டோர் மீது தாம் மிகுந்த மரியாதை வைத்திருப்பதாகச் சொல்கிறார் நடிகை பியா.
உலகமே முடங்கியுள்ள நிலையில் ஒருசிலர் 'நமக்கு ஒன்றும் ஆகாது' என்கிற மிதப்பில் பொறுப்பின்றி வெளியே சுற்றுவதைப் பார்த்தால் தமக்கு கோபம் வருவதாக அண்மைய பேட்டியில் அவர் குறிப்பிட்டுள்ளார்.
"ஒரு சாதாரண நகரில் இருந்து பிழைப்பு தேடி மும்பை வந்தவள் நான். அங்கு மிகவும் கஷ்டப்பட்டு எனக்கான வாய்ப்புகளைத் தேடி வாழ்க்கையில் உயர்ந்தேன்.
"குடும்பத்துக்கும் முடிந்த உதவிகளைச் செய்தேன். இதுதான் பொறுப்பான செயல். மாறாக ஊர் சுற்றுவது அல்ல," என்கிறார் பியா.
தமிழ் நடிகர்களில் இவருக்கு அஜித் மீது மிகுந்த மரியாதை உண்டாம்.
நடிகர் அஜித் எவ்ளவு பெரிய நடிகர் என்பதும் அவருக்குப் பல கோடி ரசிகர்கள் உள்ளனர் என்பதும் தெரியாமலேயே அவருடன் நடித்ததாகச் சொல்கிறார் நடிகை பியா பாஜ்பாய்.
'பொய் சொல்லப் போறோம்' படம் மூலம் தமிழில் அறிமுகமான இவர், அடுத்த படத்திலேயே அஜித்துடன் ஒன்றாக நடிக்கும் வாய்ப்பைப் பெற்றார்.
கடந்த 2008ஆம் ஆண்டு அஜித் நடிப்பில் வெளியான 'ஏகன்' படத்தில் நடித்தபோது அவரைப் பற்றி பியாவுக்கு அதிக விவரங்கள் தெரியாதாம். அதை நினைத்தால் இப்போதும் வருத்தமாக உள்ளது என்கிறார்.
"ராஜுசுந்தரம் இயக்கிய 'ஏகன்' படத்துக்கான ஒப்பந்தத்தில் கையெழுத்திட்டபோது அஜித் ஒரு நட்சத்திர நடிகர் என்பதை அறிந்திருக்கவில்லை. ஒரு பிரம்மாண்ட படத்தில் நடிக்கிறோம் என்பதையோ, அது வெளியான பிறகு தன்னைப் பற்றியும் ரசிகர்கள் அதிகம் பேசுவார்கள் என்பதையோ தாம் உணரவில்லை," என்கிறார் பியா.
"ஏற்காட்டில் படப்பிடிப்பு நடைபெற்றது. முதல்நாள் எனக்கான காட்சியில் நடிக்க அழைத்தபோது கேரவேனில் இருந்து வெளியே வந்தேன். அப்போது அங்கு கூடியிருந்த நூற்றுக் கணக்கான ரசிகர்கள் ஆரவாரம் செய்தனர். நிச்சயமாக அது எனக்கான ஆரவாரம் அல்ல என்று தெரியும்.
"மறுபக்கம் திரும்பிப் பார்த்தபோதுதான் அஜித் சார் அங்கு வந்திருப்பதையும் ரசிகர்கள் உற்சாக மிகுதியில் துள்ளிக் குதிப்பதையும் கவனித்தேன். அந்த நொடியில்தான் அவர் ஒரு சூப்பர் ஸ்டார் என்பதைப் புரிந்துகொண்டேன்.
"ஒருவேளை வாழ்க்கையில் நாம் இழந்த ஒன்றை மீண்டும் பெறுவதற்காக வாழ்க்கையைப் பணயம் வைக்க வேண்டி இருந்தால் நிச்சயமாக அஜித் சாருடன் ஒருநாள் செலவிட அவ்வாறு செய்வேன்," என்கிறார் தியா.
"அஜித் சாரை பற்றித் தெரிந்துகொள்ளவும் அவரைப் பின்தொடரும் ரசிகர்களைப் பார்க்கவும் அவர்களுடைய அன்பைப் பெறவும் விரும்புகிறேன். அவர் என்னிடம் இனிமையாகப் பேசிப் பழகினார்.
"உண்மையாகவே அவர் ஒரு சூப்பர் ஸ்டார் என்பதுடன் மிகவும் பணிவான ஒரு மனிதர்," எனப் பாராட்டுகிறார் பியா.