மாணவர் முரசு
இ-பேப்பர்
பெண் குழந்தைக்குத் தந்தையாகி உள்ளார் ஜி.வி. பிரகாஷ். குழந்தை பிறந்து நான்கு மாதங்கள் ஆகின்றன. ஏதோ சொர்க்கத்தில் வாழ்வது போல் உணர்வதாக பிரகாஷ், சைந்தவி தம்பதியர் குறிப்பிடுகின்றனர்.
ஒரு தந்தையாக அளித்துள்ள முதல் பேட்டியில் பல விவரங்களைப் பகிர்ந்துகொண்டுள்ளார் ஜி.வி.
"எங்களுக்கு ஒரு குழந்தை என்பது ஏழு வருடக் கனவு. சைந்தவி தாய்மை அடைந்திருப்பதாக மருத்துவர் தெரிவித்தபோது நான் அடைந்த மகிழ்ச்சிக்கு அளவே இல்லை. எங்கள் குடும்பத்தில் புது உறுப்பினர் இணையப் போவதை நினைத்து அப்பா, அம்மா, தங்கை என்று எல்லோருக்குமே மகிழ்ச்சி.
"பொதுவாக வயிற்றில் குழந்தையைச் சுமந்திருக்கும் மனைவிக்கு ஒரு கணவர் என்னவெல்லாம் செய்வாரோ அதையெல்லாம் நானும் சரியாகச் செய்திருப்பதாக நம்புகிறேன்.
"சைந்தவி எதற்காகவும் அழக்கூடாது, கோபப்படக்கூடாது, எப்போதும் மகிழ்ச்சியாக இருக்க வேண்டும் என்று அனைத்தையும் பார்த்துப் பார்த்து செய்தேன்.
"பலரும் எங்களிடம் ஆணா, பெண்ணா எதை எதிர்பார்க்கிறீர்கள்? என்று பலமுறை கேட்டுள்ளனர். எந்தக் குழந்தையாக இருந்தாலும் மகிழ்ச்சிதான் என்று கூறியபோதும் பெண் குழந்தையாக இருந்தால் நன்றாக இருக்கும் என்று மனதோரத்தில் ஓர் எண்ணம் இருந்தது. மாதந்தோறும் நடத்தப்படும் பரிசோதனைகளின்போது கண்டிப்பாக உடன் இருக்க வேண்டும் என்று சைந்தவி சொல்லிவிட்டார். அதன்படி ஒருமுறை கூட அவரைத் தனியாக விடவில்லை.
"பரிசோதனைகளின்போது குழந்தையின் உடல் உறுப்புகளை ஒவ்வொன்றாக மருத்துவர் காட்டும்போது இனம்புரியாததோர் மகிழ்ச்சி ஏற்பட்டது. அதிலும் குழந்தையின் அசைவுகளை தாயின் வயிற்றில் கைவைத்து உணர்ந்து பார்க்கும்போது மெய்சிலிர்க்கும்," என்று சொல்லும்போதே ஜிவி பிரகாஷின் உள்ளம் பூரித்துப் போயிருப்பதை நாமும் உணர முடிகிறது.
கடந்த ஏப்ரல் 19ஆம் தேதிதான் அழகிய பெண் குழந்தையைப் பெற்றெடுத்துள்ளார் சைந்தவி. 'உங்கள் வீட்டில் இன்னொரு பாடகி பிறந்திருக்கிறார்' என்று மருத்துவர் குறிப்பிட்டாராம். முதன்முறை கையில் ஏந்தியபோது குழந்தை அழாமல் தன்னை நன்கு விழித்துப் பார்த்ததாகச் சொல்கிறார் ஜி.வி.
அந்த இனிமையான தருணத்தைப் பதிவு செய்யவேண்டும் என்பதற்காக புகைப்படம் எடுத்துக் கொண்டாராம்.
சரி, குழந்தைக்கு என்ன பெயர்?
"அழகுத் தமிழில் பெயர் வைக்க வேண்டும் என்று எனக்கு ஆசை. எனவே, வானம் என்ற பெயரைத் தேர்வு செய்தேன். ஆனால் சைந்தவியும் என் தங்கை பவானியும் அனுமதிக்கவில்லை. அவர்கள் இருவரும் சேர்ந்து அன்வி என்ற பெயரைத் தேர்ந்தெடுத்துள்ளனர். அன்வி என்றால் குஜராத்தி மொழியில் சூரியனிலிருந்து வெளிவரும் முதல் கதிர் என்று அர்த்தமாம்," என்று சிரிக்கிறார் ஜி.வி. பிரகாஷ்.