'சூரரைப்போற்று' திரைப்படம் நேற்று முன்தினம் வெளியான நிலையில் திரைத்துறை பிரபலங்கள் பலரும் சூர்யாவின் நடிப்பையும் சுதாவின் இயக்கத்தைப் பற்றியும் பாராட்டி வருகின்றனர்.
தொடர் தோல்விகளைச்
சந்தித்து வந்த சூர்யாவிற்கு இந்தப் படம் மீண்டும் திருப்புமுனையாக அமைந்துள்ளது. சுதா கொங்கராவின் இயக்கம், ஜிவியின் இசை, சூர்யா, அபர்ணா பாலமுரளியின் அசத்தலான நடிப்பு ஆகியவை படத்தை கோலிவுட்டில் மிகச் சிறந்த படமாக வடிவமைத்துள்ளது.
படத்தைப் பார்த்த அனைவரும் படம் எதிர்பார்க்காத அளவிற்கு பிரமாதமாக இருப்பதாக திரைப் பிரபலங்கள் சூர்யா, சுதா கொங்கராவைப் பாராட்டி வருகின்றனர்.
நடிகர் மாதவன் 'சூரரைப் போற்று' படத்தைப் பற்றி பாராட்டி பதிவிட்டுள்ளார். "சூர்யா, ஒரு சிறந்த, கட்டுப்
படுத்தப்பட்ட, நேர்மையான மற்றும் உற்சாகமான நடிப்பு. ஒரே நேரத்தில் என் சகோதரர் மீது பொறாமையும் பெருமையும் ஏற்படுகிறது. உங்களை இப்படிப் பார்க்கத்தான் ஆவலுடன் இருந்தோம். மேலும் நீங்கள் ஒரு நடிகராக எல்லா எதிர்பார்ப்பையும் தாண்டிவிட்டீர்கள். மொத்த படக்குழுவிற்கும் பெரிய கட்டிப்புடி வைத்தியம்," என்றார்.
நடிகர் அருண்விஜய் "இந்தப் படத்தில் சூர்யா அபாரமாக நடித்திருக்கிறார். அனைத்துக் கதாப்பாத்திரங்களும் அவர்களுடைய பாத்திரத்தை சிறப்பாக செய்துள்ளனர். அனைவரையும் ஊக்கப்படுத்தும் வகையில் உள்ளது. இயக்குநர் சுதா, மொத்த படக்குழுவுக்கும் பெரிய வணக்கம். சிறப்பாய் செய்திருக்கிறீர்கள். மேலும் உயர பறக்க வாழ்த்துகள்," என்று பதிவிட்டுள்ளார்.
இயக்குநர் அஜய் ஞானமுத்து, "இந்த வெற்றிப் படத்திற்காக 9 மாதங்கள் காத்திருந்தேன்.
'சூரரைப்போற்று' இதயத்தை நிறைத்தது. படம் அருமை. இதில் நடித்த சூர்யா, படக்குழுவினர் அனைவருக்கும் பாராட்டுக்கள்," என பதிவிட்டுள்ளார்.
தெலுங்கு நடிகர் மோகன் பாபு, "சூர்யா ஒரு நல்ல நடிகர். அவருடன் இணைந்து நடித்ததில் மகிழ்ச்சி. அற்புதமான இயக்குநர் சுதா கொங்கரா. இந்த படம் ஒரு 'மைல் ஸ்டோனாக' இருக்க வேண்டும். 'சூரரைப்போற்று' குழுவினருக்கு கடவுளின் ஆசிர்வாதங்கள்," என்று குறிப்பிட்டுள்ளார்.
இதுபோல் திரைக் கலைஞர்கள் பலரும் 'சூரரைப் போற்று' படத்தைப் பாராட்டி வருகின்றனர்.
மொத்தத்தில் 'சூரரைப்போற்று' சூர்யாவை போற்று.