மாணவர் முரசு
இ-பேப்பர்
ஜார்ஜியாவில் முகாமிட்டிருக்கிறது 'தளபதி 65' படக்குழு. நெல்சன் தலைமையில் படப்பிடிப்புக்கான அனைத்து ஏற்பாடுகளும் கச்சிதமாக இருப்பதாகப் பாராட்டுகிறாராம் விஜய்.
மொத்தம் 17 நாட்கள் அங்கு படப்பிடிப்பு நடக்க இருக்கிறது. கடும் மழை பெய்வதால் மூன்று நாட்கள் கூடுதலாக அங்கு தங்கிஇருக்கவும் வாய்ப்புண்டாம்.
ஒரு பாடல், ஒரு சண்டைக் காட்சி, விஜய், கதாநாயகி பூஜா ஹெக்டே சம்பந்தப்பட்ட காட்சிகளை ஜார்ஜியாவில் படமாக்க உள்ளனர்.
சட்டமன்றத் தேர்தலுக்கான வாக்குப்பதிவு முடிந்த கையோடு அன்றிரவே ஜார்ஜியா புறப்பட்டுச் சென்றார் விஜய்.
அதே தினத்தில்தான் பூஜாவும் அங்கு பறப்பதாக இருந்தாராம்.
ஆனால், தெலுங்கில் சிரஞ்சீவியுடன் நடித்துவரும் 'ஆச்சார்யா' படப்பிடிப்பின் முக்கிய காட்சிகளை அன்றைய தினம் படமாக்குவதாக தயாரிப்புத் தரப்பில் கூறப்பட்டதால் ஜார்ஜியா பயணத்தை ஒருநாள் தள்ளி வைத்துள்ளார்.
எனினும் மறுநாள் ஹைதராபாத்தில் இருந்து மும்பைக்குச் சென்ற பிறகு அங்கிருந்து ஜார்ஜியாவுக்குப் பறந்திருக்கிறார்.
அதன்பிறகு ஒருசில மணி நேரம் மட்டுமே ஓய்வெடுத்துவிட்டு படப்பிடிப்பில் பங்கேற்ற பூஜாவை, விஜய் உள்ளிட்ட அனைவரும் பாராட்டி உள்ளனர்.
ஜார்ஜியாவில் முதலில் ஒரு பாடல் காட்சியைத்தான் படமாக்கி உள்ளனர். அந்தப் பாடலை ஒருசில நாள்களுக்கு முன்பே தயார் செய்துவிட்டாராம் இசையமைப்பாளர் அனிருத். தென்னிந்திய சினிமாவில் பிரபலமாக உள்ள ஜானி மாஸ்டர் இப்பாடலுக்கு நடனம் அமைத்துள்ளார். அவர் முதன்முறையாக விஜய்யுடன் இணையும் படம் இது.
அதிரடியும் நகைச்சுவையும் கலந்துள்ள கதையில் விஜய்யின் நண்பராக நடிக்கிறார் யோகிபாபு. இயக்குநர் நெல்சனின் குழுவினர் என்று அடையாளப்படுத்தப்படும் மேலும் சிலர் முக்கிய கதாபாத்திரங்களை ஏற்றுள்ளனர்.
'டாக்டர்' படத்தில் நெல்சனின் உதவி இயக்குநராகப் பணிபுரிந்த கவின் முக்கிய கதாபாத்திரத்தை ஏற்றுள்ளார்.
'கே.ஜி.எஃப்.' படத்தின் இரு பாகங்களிலும் பணியாற்றிய சண்டைப் பயிற்சியாளர்களான இரட்டையர்கள் அன்பறிவ் அமைத்துள்ள சண்டைக் காட்சிகள் ரசிகர்களை சிலிர்க்க வைக்கும் என்கிறார்கள் படக்குழுவினர்.
இரண்டாவது நாயகியாக நடிக்கும் அபர்ணா தாஸ் மலையாளத்தில் நன்கு பிரபலம். பகத் ஃபாசிலுடன் இவர் நடித்த இரண்டு படங்களும் அங்கு வசூலில் வெற்றி கண்டுள்ளன.
"மொத்த கேரளாவும் கொண்டாடும் விஜய் சார் படத்தில் இவ்வளவு சீக்கிரமாக நானும் இடம்பெறுவேன் என்று எதிர்பார்க்கவே இல்லை. ஒரு பிரம்மாண்ட படைப்பில் நானும் பங்களிக்க உள்ளேன் என்பதே என் வாழ்வின் ஆகப்பெரிய மகிழ்ச்சியாக உள்ளது. நான் பெரிதும் ஆசிர்வதிக்கப்பட்டதாக உணர்கிறேன்," என்கிறார் அபர்ணா தாஸ்.
'தளபதி 65' படத்தில் சிவகார்த்திகேயனும் இணைந்துள்ளார் என்பதுதான் கோடம்பாக்கத்தின் தற்போதைய ஆகப்பெரிய செய்தி.
சிலர் நினைப்பதுபோல் அவர் இந்தப் படத்தில் நடிக்கவில்லை. மாறாக, தனது எழுத்தின் மூலம் பங்களிக்க உள்ளார்.
விஷயம் இதுதான். இயக்குநர் நெல்சனும் சிவகார்த்திகேயனும் அண்மைய நாட்களில் மிக நெருங்கிய நண்பர்களாகி விட்டனர். இதையடுத்து 'தளபதி 65' படத்துக்காக ஒரு பாடல் எழுதித் தருமாறு கேட்டாராம் நெல்சன்.
"விஜய் சார் படத்தில் என் பாடலா? இவ்வளவு பெரிய வாய்ப்பை ஏற்று என்னால் சரியாக இயங்க முடியுமா?" என்று சந்தேகத்துடன் கேட்டிருக்கிறார் சிவா. எனினும் நெல்சன் விடாமல் ஊக்குவித்ததால் ஒரு பாடலை எழுதிக் கொடுத்துள்ளார்.
இப்படத்தின் வில்லன் யாரென்பது மட்டும் இன்னும் முடிவாகவில்லை. 'பேட்ட' படத்தில் ரஜினியுடன் மோதிய நவாசுதீன் சித்திக், 'துப்பாக்கி'யில் நடித்த வித்யூத் ஜம்வால் உள்ளிட்ட சிலரது பெயர்கள் பரிசீலனைப் பட்டியலில் உள்ளன.
ஜார்ஜியாவில் இருந்து திரும்புவதற்குள் யார் வில்லன் என்பதை விஜய்யும் நெல்சனும் தீர்மானித்து விடுவார்கள் என்பது உறுதி.
'டாக்டர்' படத்தின் பாதி படப்பிடிப்பு முடிவடைந்த நிலையில்தான் விஜய்யை சந்தித்து கதை சொல்லியிருக்கிறார் நெல்சன். அவர் சில வரிகளில் சொன்ன கதை பிடித்துப் போகவே 'டாக்டரை' முடித்துவிட்டு வாருங்கள் நானும் 'மாஸ்டர்' படத்தை முடித்து விடுவேன். உடனே வேலையைத் தொடங்கி விடுவோம் என்று கூறியிருக்கிறார் விஜய்.
"இதன்பிறகு அனைத்து வேலைகளும் மடமடவென நடந்து முடிந்து இப்போது ஜார்ஜியாவில் படப்பிடிப்பு நடக்கிறது என்பதை என்னால் கூட நம்ப முடியவில்லை. இந்தப் படமும் விஜய் ரசிகர்களை உற்சாகப்படுத்தும்," என்கிறார் நெல்சன்.
, :
விஜய்