மாணவர் முரசு
இ-பேப்பர்
இந்தித் திரையுலகில் பரபரப்பாக இயங்கி வருகிறார் பிரபுதேவா. அங்கு முன்னணியில் உள்ள இயக்குநர்களில் அவரும் ஒருவர்.
அதேசமயம் தமிழ்ப் படங்களில் நடிப்பதிலும் கவனம் செலுத்துகிறார் பிரபுதேவா.
தற்போது ஏ.சி. முகில் இயக்கத்தில் இவர் நடித்து முடித்துள்ள 'பொன் மாணிக்கவேல்' படம் வெளியீடு காணத் தயாராக உள்ளது.
இதில் முதன்முறையாக பிரபுதேவா காவல்துறை அதிகாரியாக நடித்திருப்பதும் அவரது ஜோடியாக நிவேதா பெத்துராஜ் நடித்திருப்பதும் தெரிந்த சங்கதிகள்தான். சுரேஷ் மேனன், முகேஷ் திவாரி, மகேந்திரன் உள்ளிட்ட மேலும் பலர் நடித்துள்ளனர்.
சில மாதங்களுக்கு முன்பே இப்படம் வெளியாகி இருக்கக்கூடும். கொரோனா நெருக்கடியால் தாமதமாகி விட்டது.
இந்நிலையில் திரையரங்க வெளியீட்டிற்காக காத்திருக்காமல் நேரடியாக இணையத்தில் இப்படத்தை வெளியிட தயாரிப்பாளர் மேனிசந்த் ஜபக் முடிவு செய்துள்ளார்.
இதையடுத்து பிரபல ஓடிடி நிறுவனத்துடன் இதற்கான பேச்சுவார்த்தை நடைபெற்றது. எதிர்பார்த்த பேச்சுவார்த்தை வெற்றி பெற்றதை அடுத்து இப்படம் விரைவில் வெளியீடு காண்கிறது.
"டி. இமான் இசையமைத்துள்ள இப்படத்துக்கு வெங்கடேஷ் ஒளிப்பதிவு செய்துள்ளார். இது அடிதடியும் இதர வணிக அம்சங்களும் நிறைந்த படமாக உருவாகி உள்ளது. தேவாவின் ரசிகர்களை நிச்சயம் திருப்திப்படுத்தும்," என்கிறார் இயக்குநர் ஏ.சி. முகில்.
இதற்கிடையே பிரபுதேவா இந்தியில் இயக்கியுள்ள 'ராதே' படமும் இணையத்தில் நேரடியாக வெளியாகி உள்ளது. சல்மான் கான் நாயகனாக நடித்துள்ள இப்படத்துக்கு நல்ல வரவேற்பு கிடைத்துள்ளதாம்.
எனவே, தாம் நடித்துள்ள படத்தையும் இணையத்தில் வெளியிட ஆதரவு தெரிவித்துள்ளார் பிரபுதேவா.