மாணவர் முரசு
இ-பேப்பர்
கதாபாத்திரங்களுக்கு ஏற்ப நடிகர், நடிகையரைத் தேர்வு செய்வதில் இயக்குநர் வெற்றிமாறன் கெட்டிக்காரர். தனது தயாரிப்பில் உருவாகும் புதிய படத்தில் நடிக்க ஆண்ட்ரியாவை ஒப்பந்தம் செய்துள்ளார்.
ஏற்கெனவே வெற்றிமாறன் இயக்கத்தில் தனுஷ் நடித்த 'வடசென்னை' படத்தில் நடித்துள்ளார் ஆண்ட்ரியா. அதன் மூலம் அவருக்கான ரசிகர்களின் எண்ணிக்கை அதிகரித்தது.
இந்நிலையில் வெற்றிமாறனின் கிராஸ் ரூட் புரொடக்ஷன்ஸ் தயாரிக்கும் புதிய படத்தை அறிமுக இயக்குநர் ஆனந்த் என்பவர் இயக்குகிறார். இப்படத்தில் இடம்பெற்றுள்ள ஒரு கதாபாத்திரத்துக்கு ஆண்ட்ரியா பொருத்தமாக இருப்பார் என ஆனந்துக்கு ஆலோசனை வழங்கினாராம் வெற்றிமாறன்.
தயாரிப்பாளரும் மூத்த இயக்குநருமான அவரே வலிய வந்து இவ்வாறு கருத்து தெரிவித்த பிறகு ஆனந்த் வேறு எதுவும் யோசிக்காமல் உடனடியாக ஆண்ட்ரியாவை சந்தித்துப் பேசியுள்ளார்.
இது ஒரு பெண் கதாபாத்திரத்தை மையப்படுத்தி உருவாக்கப்படும் படம். இதன் மூலம் ஆண்ட்ரியாவுக்கு தமிழ் ரசிகர்கள் மத்தியில் கூடுதல் வரவேற்பு கிடைக்கும் என்கிறார்கள் கோடம்பாக்கத்தினர்.
வெற்றிமாறன் இதற்குமுன் இயக்குநர் 'சங்கத்தலைவன்' என்ற படத்தைத் தயாரித்துள்ளார். மேலும், ராகவா லாரன்ஸ் நடிக்கும் 'அதிகாரம்' படத்துக்கான கதையை எழுதி, ஃபைவ் ஸ்டார் கதிரேசனுடன் இணைந்து தயாரிக்கிறார்.
