திரைக்கு வரும் முன்பே பல விருதுகளைப் பெற்று வருகிறது 'கொடியன்' திரைப்படம். 'மூடர் கூடம்' படத்தின் ஒளிப்பதிவாளர் டோனி சான் இயக்கியுள்ள முதல் படம் இது.
திகில் படம் என்பதுடன் ஒரு சோதனை முயற்சி என்றும் சொல்லலாம் என்கிறார் டோனி.
"திகில் படம் என்றால் ரசிகர்களை இருக்கையின் நுனியில் அமர வைக்க வேண்டும், முடிந்தவரை பயமுறுத்த வேண்டும் என்பதெல்லாம் பழைய உத்திகள். இது அத்தகைய விதிமுறைகளில் இருந்து முற்றிலும் மாறுபட்டது.
"மேலும் பணத்தை மட்டுமே குறிக்கோளாகக் கொண்டு உருவான படமும் அல்ல. சினிமாவுக்கு ஏற்ற இலக்கணத்துடன் எடுக்கப்பட்ட படம்," என்கிறார் டோனி சான்.
'கொடியன்' கதையை எழுதும்போது விஜய் சேதுபதியை முக்கிய கதாபாத்திரத்தில் நடிக்க வைக்க வேண்டும் என்பதுதான் இவரது திட்டமாக இருந்துள்ளது. ஆனால் அவர் பல படங்களில் வரிசையாக நடித்துக்கொண்டிருந்ததால் கால்ஷீட் ஒதுக்க முடியவில்லையாம்.
"மேலும், இது பயணம் சம்பந்தப்பட்ட கதை. அதனால் ஒவ்வொரு காட்சியையும் வெவ்வேறு இடங்களில் படமாக்க வேண்டி இருந்தது. இதற்கு அதிகம் செலவாகும் என்பதால் தயாரிப்பாளருக்கு ஏற்படும் சிரமங்களையும் கவனத்தில் கொள்ள வேண்டி இருந்தது. அதனால் பெரும்பாலும் புதுமுகங்களை நடிக்க வைத்தோம். அவர்களும் சிறப்பாக நடித்துள்ளனர்," என்கிறார் டோனி.
'காக்கா முட்டை'யில் நடித்த நிவாஸ் ஆதித்தன் தான் நாயகன். நாயகி நித்ய கன்னடப் படங்களில் நடித்த அனுபவம் உள்ளவர். தமிழில் இப்போதுதான் அறிமுகமாகிறார். வில்லனாக 'பில்லா', 'சூது கவ்வும்' படங்களில் நடித்த யோக் ஜேப்பி நடித்துள்ளார்.
'இண்டோ - பிரெஞ்ச்' திரைப்பட விழா, கூடோ அனைத்துலக திரைப்பட விழா என அடுத்தடுத்த நிகழ்வுகளில் பங்கேற்று சிறந்த படம், சிறந்த குணச்சித்திர நடிகர், சிறந்த இயக்குநர் என வரிசையாக விருதுகளைப் பெற்று வருகிறது 'கொடியன்'.
"இதில் நடித்துள்ள எல்லாருமே கதாபாத்திரத்துக்குப் பொருத்தமான, திறமையுள்ள கலைஞர்கள். ஒருவர் கூட நட்சத்திர நடிகர் அல்ல. ஆனால் படம் வெளியான பிறகு ரசிகர்களால் நன்கு அறியப்பட்டவர்களாக மாறிவிடுவார்கள்.
"என்னை நம்பி தயாரிப்பாளர்கள் முதலீடு செய்துள்ளனர். எனவே இந்தப் படம் விருதுகளை மட்டுமல்லாமல் நல்ல வசூலையும் பெற வேண்டும். அப்போதுதான் எனக்கு மனநிறைவு ஏற்படும்," என்கிறார் டோனி.
திகில் படம் என்பதை மட்டுமே இப்போது சொல்ல இயலும் என்றும் சில விஷயங்களை திரையில் பார்க்கும்போது தெரிந்து கொண்டால்தான் சுவாரசியமாக இருக்கும் என்றும் சொல்கிறார்.